ଲକ୍ଷ୍ନୌ: ବିବାହ ବନ୍ଧନରେ ବାନ୍ଧି ହୋଇଛନ୍ତି ଭାରତୀୟ ଦ୍ରୁତ ବୋଲର ମୁକେଶ କୁମାର । ବିହାରର ଛପ୍ରା ଅଞ୍ଚଳର ଦିବ୍ୟା ସିଂହଙ୍କୁ ଜନ୍ମ ଜନ୍ମାନ୍ତରର ସାଥି କରିଛନ୍ତି ମୁକେଶ । ଉତ୍ତର ପ୍ରଦେଶର ଗୋରଖପୁରର ଏକ ହୋଟେଲରେ ଏହି ବିବାହ ସମ୍ପନ୍ନ ହୋଇଛି । ଆସନ୍ତା ଡିସେମ୍ବର ୪ ତାରିଖରେ ମୁକେଶ ନିଜ ପୈତୃକ ଗ୍ରାମ କାକଡକୁଣ୍ଡରେ ଏକ ରିସେପ୍ସନ ପାର୍ଟି ପ୍ରଦାନ କରିବେ ବୋଲି ଜଣା ପଡ଼ିଛି । ଚଳିତ ବର୍ଷ ଫେବୃୟାରୀ ମାସରେ ଦିବ୍ୟାଙ୍କ ସହିତ ମୁକେଶଙ୍କର ନିର୍ବନ୍ଧ ଶେଷ ହୋଇଥିଲା । ଏବେ ବିବାହ ସରିଥିବାବେଳେ ସୋସିଆଲ୍ ମିଡିଆରେ ଅନେକ ପ୍ରଶଂସକ ଓ ସାଥି କ୍ରିକେଟର ନବଦମ୍ପତ୍ତିଙ୍କୁ ବୈବାହିକ ଜୀବନ ପାଇଁ ଶୁଭେଚ୍ଛା ଜଣାଇଛନ୍ତି ।
ବିଶ୍ବକପ୍ ୨୦୨୩ ପରେ ପରେ ଭାରତ ଓ ଅଷ୍ଟ୍ରେଲିଆ ମଧ୍ୟରେ ଖେଳାଯାଉଥିବା ୫ ମ୍ୟାଚ୍ ବିଶିଷ୍ଟ ଟି୨୦ ଶୃଙ୍ଖଳାରେ ଭାରତୀୟ ଦଳର ଅଂଶ ଥିଲେ ପେସର ମୁକେଶ କୁମାର । ପ୍ରଥମ ଦୁଇଟି ମ୍ୟାଚ୍ ଖେଳିଥିଲେ ମଧ୍ୟ ତୃତୀୟ ମ୍ୟାଚ୍ ପୂର୍ବରୁ ବିବାହ ପାଇଁ ସେ ବିସିସିଆଇଠାରୁ ଛୁଟି ନେଇଥିଲେ । ତାଙ୍କ ସ୍ଥାନରେ ତୃତୀୟ ମ୍ୟାଚ୍ରେ ଅଭେଶ ଖାନଙ୍କୁ ଚୂଡ଼ାନ୍ତ ଏକାଦଶରେ ସ୍ଥାନ ମିଳିଥିଲା । ସେହିଭଳି ଦ୍ରୁତ ବୋଲର ଦୀପକ ଚହରଙ୍କୁ ମୁକେଶଙ୍କ ସ୍ଥାନରେ ଭାରତୀୟ ସ୍କ୍ବାଡ୍ରେ ସାମିଲ କରାଯାଇଛି । ଏନେଇ ବିସିସିଆଇ ମୁକେଶ କୁମାରଙ୍କ ସମ୍ପର୍କରେ ଏକ ବିବୃତ୍ତି ଜାରି କରିଥିଲା । ଏଥିରେ ସ୍ପଷ୍ଟ କରାଯାଇଥିଲା ଯେ, 'ମୁକେଶ କୁମାର ଅଷ୍ଟ୍ରେଲିଆ ବିପକ୍ଷ ତୃତୀୟ ଟି୨୦ ପୂର୍ବରୁ ତାଙ୍କୁ ଦଳରୁ ମୁକ୍ତ କରିବାକୁ ବିସିସିଆଇକୁ ଅନୁରୋଧ କରିଛନ୍ତି । ମୁକେଶ ବିବାହ କରୁଛନ୍ତି ଏବଂ ତାଙ୍କୁ ବିବାହ ଉତ୍ସବ ପାଇଁ ଦଳରୁ ମୁକ୍ତ କରାଯାଇଛି । ସିରିଜର ଅବଶିଷ୍ଟ ମ୍ୟାଚ୍ ପାଇଁ ପେସର୍ ଦୀପକ ଚହରଙ୍କୁ ଦଳରେ ସାମିଲ କରାଯାଇଛି ।'
ଭାରତ ପାଇଁ ସମସ୍ତ ତିନୋଟି ଫର୍ମାଟରେ ଡେବ୍ୟୁ କରିଛନ୍ତି ମୁକେଶ: ଭାରତୀୟ ସିନିୟର ଦଳରେ ମୁକେଶ କୁମାର ସମସ୍ତ ତିନୋଟି ଫର୍ମାଟରେ ଡେବ୍ୟୁ କରିସାରିଛନ୍ତି । ସେ ଚଳିତ ବର୍ଷ ଜୁଲାଇରେ ୱେଷ୍ଟଇଣ୍ଡିଜ୍ ବିପକ୍ଷରେ ଟେଷ୍ଟ ଏବଂ ପରେ ଦିନିକିଆରେ ଡେବ୍ୟୁ କରିଥିଲେ । ଏହାପରେ ସେ ଅଗଷ୍ଟରେ ୱେଷ୍ଟଇଣ୍ଡିଜ୍ ବିପକ୍ଷରେ ଟି୨୦ ଅନ୍ତର୍ଜାତୀୟରେ ମଧ୍ୟ ଡେବ୍ୟୁ କରିଥିଲେ । ବର୍ତ୍ତମାନ ପର୍ଯ୍ୟନ୍ତ ସେ ଭାରତ ପାଇଁ ଗୋଟିଏ ଟେଷ୍ଟ, ୩ ଦିନିକିଆ ଏବଂ ୭ ଟି୨୦ ଅନ୍ତର୍ଜାତୀୟ ମ୍ୟାଚ୍ ଖେଳିଛନ୍ତି । ସେ ଏକମାତ୍ର ଟେଷ୍ଟରେ ୨ଟି ୱିକେଟ୍ ନେଇଥିବାବେଳେ ଦିନିକିଆ ଓ ଟି୨୦ରେ ୪ଟି ଲେଖାଏଁ ୱିକେଟ୍ ଅକ୍ତିଆର କରିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
