ମୁମ୍ବାଇ: ଆଜି (ମଙ୍ଗଳବାର) ଶ୍ରୀଲଙ୍କାକୁ ଘରୋଇ ମାଟିରେ ଭେଟିବ ମେନ୍ ଇନ୍ ବ୍ଲୁ । ତିନି ଟିକିଆ ବିଶିଷ୍ଟ ଏହି ଟି୨୦ ସିରିଜର ଦାୟିତ୍ବ ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟାଙ୍କ ଉପରେ ନ୍ୟସ୍ତ ରହିଛି । ତେବେ ଆଜିର ପ୍ରଥମ ଟି୨୦ ରେ ମ୍ୟାଚରେ ୨୦୨୨ ଏସିଆ କପ ବିଜେତା ଶ୍ରୀଲଙ୍କା ବିପକ୍ଷରେ ଏକ ସନ୍ତୁଳିତ ଚୂଡାନ୍ତ ଏକାଦଶ ବାଛିବାକୁ ପଡିବ । ଘରୋଇ ମାଟିରେ ଟିମ ଇଣ୍ଡିଆ ଖେଳାଳି ସୂର୍ଯ୍ୟକୁମାର ଯାଦବ, ହାର୍ଦ୍ଦିକ ପାଣ୍ଡ୍ୟା, ଅର୍ଶଦୀପ ସିଂହଙ୍କ ଭଳି ପ୍ରତିଭାବାନ ଖେଳାଳିଙ୍କୁ ଉପରେ ସମସ୍ତଙ୍କର ନଜର ରହିବ । ଟି୨୦ ବିଶ୍ବକପରେ ଦମଦାର ପ୍ରଦର୍ଶନ କରିଥିବା କ୍ରିକେଟର ଦ୍ବିପାକ୍ଷିକ ସିରିଜରେ ଘରୋଇ ମାଟିରେ କିଭଳି ନିଜର ପ୍ରଦର୍ଶନ ଦେଖାଇବେ ସେନେଇ ସମସ୍ତଙ୍କର ନଜର ରହିଛି । ସେପଟେ ଶ୍ରୀଲଙ୍କାର ୱାନିନ୍ଦୁ ହସରଙ୍ଗା, ପଥୁମ ନିଶଙ୍କା, କୁଶଲ ମେଣ୍ଡିସ, ଏବଂ ମହେଶ ଥିକଶାନାଙ୍କ ପ୍ରଦର୍ଶନ ଉପରେ ମଧ୍ୟ ସମସ୍ତଙ୍କ ନଜର ରହିବ । ଶ୍ରୀଲଙ୍କାର ଏହି କ୍ରିକେଟର ଏବେ ଫର୍ମରେ ଥିବା ବେଳେ ଦଳ ପାଇଁ ଜବରଦସ୍ତ ପ୍ରଦର୍ଶନ ଜାରି ରଖିଛନ୍ତି ।
ୱାଙ୍ଖଡେ ଷ୍ଟାଡିୟମ ଟି୨୦ ରେକର୍ଡ
ୱାଙ୍ଖଡେ ଷ୍ଟାଡିୟମରେ ଏପର୍ଯ୍ୟନ୍ତ ୭ଟି ଟି-୨୦ ମ୍ୟାଚ ଖେଳାଯାଇଛି । ଯେଉଁଥିରେ ଭାରତ ୪ ଟି ମ୍ୟାଚ ଖେଳିଛି । ଏଥିରେ ଭାରତ ୨ ଟି ମ୍ୟାଚରେ ବିଜୟ ହାସଲ କରିଛି । ଅନ୍ୟ ଦଳ ୩ ଟି ମ୍ୟାଚ ଖେଳିଛି । ଏହି ପିଚରେ ପ୍ରଥମେ ବ୍ୟାଟିଂ କରୁଥିବା ଦଳ ୨ ଟି ମ୍ୟାଚରେ ବିଜୟୀ ହୋଇଛି । ପରେ ବ୍ୟାଟିଂ କରିଥିବା ଦଳ ୫ ଥର ବିଜୟ ହାସଲ କରିଛନ୍ତି । ଏହି ପିଚରେ ଏପର୍ଯ୍ୟନ୍ତ ସର୍ବାଧିକ ସ୍କୋର 240/3 ରହିଛି । ବର୍ଷ ୨୦୧୯ରେ ଭାରତ ବନାମ ୱେଷ୍ଟଇଣ୍ଡିଜ ମ୍ୟାଚରେ ଏହି ବଶାଳ ସ୍କୋର ହୋଇଥିଲା । ଏହି ମଇଦାନରେ ଖେଳାଯାଇଥିବା ଏହା ଶେଷ ଟି-୨୦ ମ୍ୟାଚ ଥଲା। । ଏହି ମ୍ୟାଚରେ ଭାରତ ୬୭ ରନରେ ବିଜୟ ଲାଭ କରିଥିଲା । ଏଠାରେ ସର୍ବନିମ୍ନ ସ୍କୋର ୧୭୨ ରନ ରହିଛି ।
ହେଡ ଟୁ ହେଡ
ଭାରତ ଏବଂ ଶ୍ରୀଲଙ୍କା ମଧ୍ୟରେ ଏପର୍ଯ୍ୟନ୍ତ ୨୬ଟି ଟି୨୦ ମ୍ୟାଚ ଖେଳାଯାଇଛି । ଏଥି ମଧ୍ୟରୁ ୧୭ଟି ମୁକାବିଲାରେ ଭାରତ ବିଜୟୀ ହୋଇଛି । ଶ୍ରୀଲଙ୍କା ୮ ଟି ମ୍ୟାଚରେ ବିଜୟ ଲାଭ କରିଛି । ଗୋଟିଏ ମ୍ୟାଚର କିଛି ଫଳାଫଳ ବାହାରି ନଥିଲା । ବର୍ଷ ୨୦୨୨ରେ ଦୁଇ ଦଳ ମଧ୍ୟରେ ତିନି ଟିକିଆ ଟି୨୦ ସିରିଜ ଖେଳାଯାଇଥିଲା । ଏଥିରେ ଭାରତ ୩-୦ ରେ ସିରିଜ କ୍ଲିନ ସ୍ବପ କରିଥିଲା ।
ଶ୍ରୀଲଙ୍କା ବିପକ୍ଷ ଭାରତୀୟ ଟି-20 ସ୍କ୍ବାଡ୍
ହାର୍ଦ୍ଦିକ ପାଣ୍ଡ୍ୟା (ଅଧିନାୟକ), ସୂର୍ଯ୍ୟକୁମାର ଯାଦବ (ଉପଅଧିନାୟକ), ଇଶାନ କିଷନ, ଋତୁରାଡ ଗାଏକୱାଡ୍ , ଶୁଭମନ ଗିଲ, ଦୀପକ ହୁଡା, ରାହୁଲ ତ୍ରୀପାଠୀ, ସଞ୍ଜୁ ସାମସନ, ୱାଶିଂଟନ ସୁନ୍ଦର, ଅକ୍ଷର ପଟେଲ, ୟୁଜିବେନ୍ଦ୍ର ଚହଲ, ଅର୍ଶଦୀପ ସିଂହ, ହର୍ଷଲ ପଟେଲ, ଉମ୍ରାନ ମଲ୍ଲିକ, ଶିବମ ମାଭି, ମୁକେଶ କୁମାର
