ମୁମ୍ବାଇ: ଖେଳ ସହ ରାଜନୀତିକୁ ମିଶ୍ରଣ କରିବା ଅନୁଚିତ୍ । ଏହା କହିଛନ୍ତି ଭାରତୀୟ ବ୍ୟାଡ୍ମିଣ୍ଟନ କିମ୍ବଦନ୍ତୀ ପ୍ରକାଶ ପାଦୁକୋନ୍ । ଆଗାମୀ ଟି-୨୦ ବିଶ୍ବକପ୍ରେ ପୂର୍ବରୁ ନିର୍ଦ୍ଧାରିତ ଭାରତ ବନାମ ପାକିସ୍ତାନ ମ୍ୟାଚ୍ ଖେଳାଯିବା ଉଚିତ ବୋଲି କହିଛନ୍ତି ଭେଟେରାନ ବ୍ୟାଡମିଣ୍ଟନ ଷ୍ଟାର ।
ଦୁବାଇରେ ଅକ୍ଟୋବର ୨୪ରେ ଭାରତ ଓ ପାକିସ୍ତାନ ମଧ୍ୟରେ ମ୍ୟାଚ୍ ଖେଳାଯିବା ନେଇ ସୂଚୀ ରହିଛି ।
ପୂର୍ବରୁ ଆମ-ଆଦମୀ ପାର୍ଟି ପକ୍ଷରୁ ଦୁବାଇରେ ପାକିସ୍ତାନ ବିପକ୍ଷରେ ଖେଳାଯିବାକୁ ଥିବା ଟି-୨୦ ବିଶ୍ବକପର ମ୍ୟାଚ୍ରୁ ଭାରତ ଓହରିଯିବା ନେଇ ଦାବି କରାଯାଇଥିଲା ।
ଏକ ସାମ୍ବାଦିକ ସମ୍ମିଳନୀରେ AAPର କାଲକାଜି ବିଧାୟକ କହିଥିଲେ, "କାଶ୍ମୀରରେ ସାଧାରଣ ଜନତାଙ୍କୁ ଆତଙ୍କବାଦୀମାନେ ଆକ୍ରମଣ କରୁଥିବା ଦେଖାଯାଉଛି । ପାକିସ୍ତାନ ପକ୍ଷରୁ ପ୍ରାୟୋଜିତ ଏହି ଆତଙ୍କବାଦୀ ଭାରତରେ ଜୀବନ ନେଉଥିବାବେଳେ, ସେମାନଙ୍କ ସହ କ୍ରିକେଟ ଖେଳିବା ଉଚିତ୍ କି ? ପାକିସ୍ତାନ ସହ କ୍ରିକେଟ ମ୍ୟାଚ୍ ଖେଳାନଯିବା ଦାବି ସହ ପ୍ରଧାନମନ୍ତ୍ରୀ ମଧ୍ୟ ରାଜି ହେବେ ବୋଲି ଆଶା ।"
ତେବେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ(BCCI) ଉପସଭାପତି ରାଜୀବ ଶୁକ୍ଳା ଏହି ମାମଲାରେ ସ୍ପଷ୍ଟୀକରଣ ରଖିସାରିଛନ୍ତି । ଟି-୨୦ ବିଶ୍ବକପ ଅନ୍ତର୍ଜାତୀୟ କ୍ରିକେଟ ପରିଷଦ(ICC) ଦ୍ବାରା ଆୟୋଜିତ ଟୁର୍ଣ୍ଣାମେଣ୍ଟ ହୋଇଥିବାରୁ କୌଣସି ଦେଶ ଅନ୍ୟ ଦେଶ ସହ ମ୍ୟାଚ୍ ଖେଳିବାକୁ ମନା କରିପାରିବେ ନାହିଁ ।
ବ୍ୟୁରୋ ରିପୋର୍ଟ, ଇଟିଭି ଭାରତ
