ଜୟପୁର: ଆରମ୍ଭ ହୋଇଯାଇଛି ବିଶ୍ବକପ୍ ୨୦୨୩ ମହାଲଢ଼େଇ । ଉଦ୍ଘାଟନୀ ମ୍ୟାଚ୍ରେ ନ୍ୟୁଜିଲାଣ୍ଡ ଓ ଦ୍ବିତୀୟ ମ୍ୟାଚ୍ରେ ଶୁକ୍ରବାର ପାକିସ୍ତାନ ବିଜୟର ସହ ଆରମ୍ଭ କରିଛନ୍ତି ବିଶ୍ବକପ୍ ଅଭିଯାନ । ତେବେ ଭାରତ ଏହାର ପ୍ରଥମ ମୁକାବିଲା ଶକ୍ତିଶାଳୀ କଙ୍ଗାରୁ ଦଳ ବିପକ୍ଷରେ ରବିବାର ଚେନ୍ନାଇର ଏମ୍ଏ ଚିଦାମ୍ବରମ ଷ୍ଟାଡିୟମ୍ରୁ ଆରମ୍ଭ କରିବ । ଏହା ପୂର୍ବରୁ ଅନେକ ପୂର୍ବତନ କ୍ରିକେଟର ଓ କ୍ରିକେଟ ବିଶେଷଜ୍ଞ ଏଥର ବିଶ୍ବକପ୍ ଚମ୍ପିଆନ୍ ପାଇଁ ଭାରତକୁ ସେମାନଙ୍କର ପ୍ରଥମ ପସନ୍ଦ ଭାବେ ରଖିଛନ୍ତି । ଏହି ତାଲିକାରେ ପୂର୍ବତନ ଭାରତୀୟ ଦୃତ ବୋଲର ପଙ୍କଜ ସିଂହ ମଧ୍ୟ ସାମିଲ ହୋଇଛନ୍ତି । ଏଥର ଭାରତୀୟ ଦଳରେ ରହିଥିବା କି-ଅଲରାଉଣ୍ଡରମାନଙ୍କ ପ୍ରଦର୍ଶନ ଭାରତର ବିଜୟରେ ପ୍ରମୁଖ ଭୂମିକା ଗ୍ରହଣ କରିବ ବୋଲି ଇଟିଭି ଭାରତ ସହ ଏକ ସ୍ବତନ୍ତ୍ର ସାକ୍ଷାତକାରରେ ସେ ଆକଳନ କରିଛନ୍ତି ।
ସେ କହିଛନ୍ତି, "ପୂର୍ବ (୨୦୧୯) ବିଶ୍ବକପ୍ ତୁଳନାରେ ଏଥର ଭାରତର ବ୍ୟାଟିଂ ଅର୍ଡର ଯଥେଷ୍ଟ ସନ୍ତୁଳିତ ଥିବା ଜଣାପଡୁଛି । ଗତଥର ଚତୁର୍ଥ ସ୍ଥାନରେ ଖେଳିବାକୁ ଭାରତ ପାଖରେ ଉପଯୁକ୍ତ ବ୍ୟାଟର ନଥିବାବେଳେ ଏଥର ସେହି ସମସ୍ୟା ନାହିଁ । ଶ୍ରେୟସ୍ ଆୟର ଏବଂ କେଏଲ୍ ରାହୁଲ ଗୁରୁତ୍ବପୂର୍ଣ୍ଣ ଚତୁର୍ଥ ସ୍ଥାନରେ ବ୍ୟାଟିଂ କରିପାରିବେ । ଏଥର ସମସ୍ତ ଖେଳାଳି ଭଲ ଫର୍ମରେ ଅଛନ୍ତି । ଟିମ୍ ଇଣ୍ଡିଆ ନିକଟରେ ଏସିଆ କପ୍ ଜିତିଛି ଏବଂ ଏହାପରେ ୩ ମ୍ୟାଚ୍ ବିଶିଷ୍ଟ ଦିନିକିଆ ସିରିଜ୍ରେ ଅଷ୍ଟ୍ରେଲିଆକୁ ପରାସ୍ତ କରିଛି ।" ଏହା ଦଳକୁ ବିଶ୍ବକପ୍ରେ ଭଲ ପ୍ରଦର୍ଶନ କରିବାକୁ ପ୍ରେରଣା ଯୋଗାଇବ ବୋଲି ସେ ବିଶ୍ବସ ରଖିଛନ୍ତି । ଏପରିକି ଅଧିନାୟକ ରୋହିତ ଶର୍ମାଙ୍କ ସହ ପାଳି ଆରମ୍ଭ ପାଇଁ ଉଭୟ ଈଶାନ କିଷାନ ଓ ଶୁଭମନ ଗିଲ୍ ନିଜ ନିଜକୁ ପ୍ରମାଣିତ କରିସାରିଛନ୍ତି ବୋଲି ସେ କହିଛନ୍ତି । ସେହିଭଳି ମିଡିଲ୍-ଅର୍ଡରରେ ଧୂଆଁଧାର ବ୍ୟାଟର ସୂର୍ଯ୍ୟକୁମାର ଯାଦବଙ୍କ ଉପସ୍ଥିତି ଦଳକୁ ଉପଯୁକ୍ତ ଶକ୍ତି ଯୋଗାଇବ । ଡେଥ୍ ଓଭରରେ ଦୃତ ଗତିରେ ରନ୍ ବନାଇବାର କଳା କଠିନ ପରିସ୍ଥିତିରୁ ଦଳକୁ ମୁକୁଳାଇ ପାରିବ ବୋଲି ପଙ୍କଜ କହିଛନ୍ତି ।
