ହାଇଦ୍ରାବାଦ: ପାଖେଇ ଆସିଲାଣି କ୍ରିକେଟ ଜଗତର ମହାଲଢ଼େଇର ସମୟ । ହାତରେ ଆଉ ମାତ୍ର ୨ଟା ଦିନ ରହିଥିବାବେଳେ କ୍ରିକେଟପ୍ରେମୀଙ୍କ ସହ ସମସ୍ତ ଖେଳାଳିଙ୍କ ମଧ୍ୟରେ ଉତ୍କଣ୍ଠା ମଧ୍ୟ ବୃଦ୍ଧି ପାଇବାରେ ଲାଗିଛି । ସମସ୍ତଙ୍କ ନଜର ରହିଛି ବିଶ୍ବକପ୍ ଜିତିବା ପାଇଁ ବିଭିନ୍ନ ଦଳର ରଣନୀତି ତଥା ହାତ ଗଣତି ଗୁରୁତ୍ବପୂର୍ଣ୍ଣ ଖେଳାଳିଙ୍କ ଉପରେ । ବିଗତ ଦୁଇ ଦୁଇଥରର ଉପବିଜେତା ନ୍ୟୁଜିଲାଣ୍ଡ ଏଥର ଟାଇଟଲ ହାତେଇବାକୁ ଜୋରଦାର ଶକ୍ତି ପ୍ରୟୋଗ କରିବ । ଗତ ସଂସ୍କରଣ ଫାଇନାଲରେ ଉଭୟ ମ୍ୟାଚ୍ ଏବଂ ସୁପର ଓଭରରେ ଇଂଲଣ୍ଡ ଓ ନ୍ୟୁଜିଲାଣ୍ଡ ମଧ୍ୟରେ ମ୍ୟାଚ୍ ଅମିମାଂସିତ ରହିଥିଲା । ପରବରତ୍ତୀ ମୂହୁର୍ତ୍ତରେ ବାଉଣ୍ଡରି ଗଣତିରେ ଅଧିକ ବାଉଣ୍ଡରି ମାରିଥିବାରୁ ଇଂଲଣ୍ଡ ଟ୍ରଫି ନେଇଯାଇଥିଲା । ହେଲେ ଏଥର ମଧ୍ୟ ଟ୍ରଫି ମରୁଡ଼ିର ଅନ୍ତ ଘଟାଇବା କିୱି ଦଳ ପାଇଁ ଏତେ ସହଜ ହେବନି । ଜାଣନ୍ତୁ ଦଳରେ କଣ ରହିଛି ସାମର୍ଥ୍ୟ, ଦୁର୍ବଳତା, ଆହ୍ବାନ ଓ ସୁଯୋଗ ।
ସାମର୍ଥ୍ୟ:
(୧) ଅଭିଜ୍ଞ ନେତୃତ୍ବ ଓ ମଧ୍ୟକ୍ରମ- ନ୍ୟୁଜିଲାଣ୍ଡ ଅଧିନାୟକ କେନ୍ ୱିଲିୟମସନ ବିଶ୍ବର ସର୍ବୋତ୍ତମ ବ୍ୟାଟର ତଥା ଜଣେ ଦକ୍ଷ ଅଧିନାୟକ । ତାଙ୍କର ଅଭିଜ୍ଞତା ଏବଂ ଶାନ୍ତ ବ୍ୟବହାର ତାଙ୍କ ଦଳକୁ କଠିନ ସମୟରେ ସାହାଯ୍ୟ କରେ । ଆହତଜନିତ ସମସ୍ୟାରୁ ସୁସ୍ଥ ହୋଇ ଏହି ବିଶ୍ବକପ୍ରେ ସେ ପ୍ରତ୍ୟାବର୍ତ୍ତନ କରିଛନ୍ତି । ସେ ମଧ୍ୟ ବିରାଟ କୋହଲି, ଜୋ ରୁଟ୍ ଏବଂ ଷ୍ଟିଭ୍ ସ୍ମିଥ୍ଙ୍କ ସହ 'ଫାବ୍ ଫୋର୍'ର ଅଂଶ ଅଟନ୍ତି । ୱିଲିୟମ୍ସନ୍ ଆଇପିଏଲ୍ ୨୦୨୩ର ପ୍ରଥମ ମ୍ୟାଚରେ ଆହତ ହୋଇଥିଲେ ଏବଂ ସେପ୍ଟେମ୍ବର ୨୯ରେ ପାକିସ୍ତାନ ବିପକ୍ଷ ୱାର୍ମ-ଅପ୍ ମ୍ୟାଚ୍ ପର୍ଯ୍ୟନ୍ତ ଖେଳଠାରୁ ଦୂରରେ ରହିଥିଲେ । ଏହି ମ୍ୟାଚ୍ରେ ସେ ୫୦ ବଲରେ ୮ଟି ଚୌକା ସହ ଅପରାଜିତ ୫୪ ରନ୍ ସ୍କୋର କରିଥିଲେ । ଦିନିକିଆ କ୍ରିକେଟରେ ୱିଲିୟମସନ ତାଙ୍କ ଦଳ ପାଇଁ କେତେ ଗୁରୁତ୍ବପୂର୍ଣ୍ଣ, ତାହା ତାଙ୍କ ରେକର୍ଡ କହିଥାଏ । ସେ ଏପର୍ଯ୍ୟନ୍ତ ୧୩୧ଟି ଦିନିକିଆ ମ୍ୟାଚରେ ୬,୫୫୫ ରନ୍ ସଂଗ୍ରହ କରିଛନ୍ତି । ଏଥିରେ ୧୩ ଶତକ ଓ ୪୨ ଅର୍ଦ୍ଧଶତକ ସାମିଲ ରହିଛି । ସେହିଭଳି ୱିକେଟକିପର-ବ୍ୟାଟର ଟମ ଲାଥମ ସ୍ପିନ ବିପକ୍ଷରେ ବହୁତ ଭଲ ଖେଳିପାରନ୍ତି । ୱିକେଟକିପର ଭୂମିକାରେ ଅଭିଜ୍ଞତା କାରଣରୁ ବୋଲରଙ୍କ ରଣନୀତି ପଢ଼ିବା ତାଙ୍କ ପାଇଁ ସହଜ ହୋଇପାରେ । ଭାରତରେ ମଧ୍ୟ ତାଙ୍କର ଅନେକ ଖେଳ ଅଭିଜ୍ଞତା ରହିଛି । ଦିନିକିଆରେ ଡେବ୍ୟୁ କରିବା ପରଠାରୁ ତାଙ୍କର ସର୍ବାଧିକ ରନ ସେ ଭାରତ ମାଟିରୁ ସଂଗ୍ରହ କରିଛନ୍ତି ।
(୨) ବହୁମୁଖୀ ବୋଲିଂ ଆକ୍ରମଣ- ଟ୍ରେଣ୍ଟ ବୋଲ୍ଟ, ଟିମ୍ ସାଉଦୀ ଏବଂ ଲକି ଫର୍ଗୁସନଙ୍କ ଭଳି ଅଭିଜ୍ଞ ପେସରଙ୍କ ସହ ନ୍ୟୁଜିଲାଣ୍ଡ ନିକଟରେ ଏକ ଶକ୍ତିଶାଳୀ ବୋଲିଂ ଆକ୍ରମଣ ରହିଛି । ଏମାନଙ୍କ ନିକରଟରେ ରହିଥିବା ବିଭିନ୍ନ ସମୟରେ ବଲ୍ ସ୍ବିଙ୍ଗ୍ କରିବାର କ୍ଷମତା ଯେକୌଣସି ବ୍ୟାଟିଂ ଲାଇନ୍ଅପକୁ ଅସୁବିଧାରେ ପକାଇପାରେ । ଏହାସହ ଦଳରେ ଦକ୍ଷ ସ୍ପିନର ଭାବରେ ଇଶ୍ ସୋଧୀ ଏବଂ ମିଚେଲ୍ ସାଣ୍ଟନର୍ ମଧ୍ୟ ଅଛନ୍ତି । ଯାହା ଦଳର ବୋଲିଂ ଲାଇନ୍-ଅପ୍କୁ ଆହୁରି ଦୃଢ଼ କରିଛି ।
ଦୁର୍ବଳତା:
(୧) ମଧ୍ୟକ୍ରମ ଚିନ୍ତା- ଯଦିଓ ଦଳର ଶୀର୍ଷକ୍ରମ ସୁଦୃଢ଼ ରହିଛି, ହେଲେ ମଧ୍ୟକ୍ରମ ଦଳ ପାଇଁ ଚିନ୍ତା ପାଲଟିବ । ଆଇପିଏଲ୍ରେ ସନରାଇଜର୍ସ ହାଇଦ୍ରାବାଦ ପାଇଁ ଖେଳୁଥିବା ମଧ୍ୟକ୍ରମ ବ୍ୟାଟର ଗ୍ଲେନ ଫିଲିପ୍ସଙ୍କ ବ୍ୟତୀତ ଅନ୍ୟ କୌଣସି ବ୍ୟାଟରଙ୍କ ନିକଟରେ ଭାରତୀୟ ମାଟିରେ ଖେଳିବାର ଅଭିଜ୍ଞତା ନାହିଁ । କଠିନ ପରିସ୍ଥିତିରେ ଦଳକୁ ମାର୍କ ଚାପମ୍ୟାନ୍, ଗ୍ଲେନ୍ ଫିଲିପ୍ସ ଏବଂ ରଚିନ୍ ରବିନ୍ଦ୍ରଙ୍କ ଭଳି ଖେଳାଳିଙ୍କ ସ୍ଥିର ପ୍ରଦର୍ଶନ ଆବଶ୍ୟକ ହେବ ।
