ମୁମ୍ବାଇ: ଗୋଟିଏ ପଟେ କ୍ରିକେଟ ବିଶ୍ବକପ ଫିଭର । ଅନ୍ୟପଟେ ଟିକେଟ କଳାବଜାରୀ । ମାତିଛନ୍ତି ବିଶ୍ବକପ ଟିକେଟ ଦଲାଲୀ । ଆଇସିସି ବିଶ୍ବକପ 2023 ଭାରତ ନ୍ୟୁଜିଲାଣ୍ଡ ସେମିଫାଇନାଲ ଟିକେଟ କଳାବଜାରୀ ହୋଇଛି । 2500 ଟଙ୍କିଆ ଟିକେଟ 25 ହଜାର ଟଙ୍କାରେ ବିକ୍ରି ହୋଇଥିବା ବେଳେ 4 ହଜାର ମୂଲ୍ୟର ଟିକେଟ 2 ଲକ୍ଷ 50 ହଜାର ଟଙ୍କାରେ ବିକ୍ରି ହୋଉଥିବା ଜଣାପଡିଛି । ଘଟଣାରେ ଜଣଙ୍କୁ ଗିରଫ କରିଛି ମୁମ୍ବାଇ ପୋଲିସ । ଆଇପିସି ଧାରା 511 ଓ 420ରେ ମାମଲା ରୁଜୁ ହୋଇଛି । ଏହି ରାକେଟରେ ଅଧିକ ସମ୍ପୃକ୍ତି ଥିବା ଅନୁମାନ କରାଯାଉଛି ।
ମହାରାଷ୍ଟ୍ର ପୋଲିସ ମାଲଦାରୁ ଭାରତ ନ୍ୟୁଜିଲାଣ୍ଡ ବିଶ୍ବକପ ସେମିଫାଇନାଲ ଟିକେଟ କଳାବଜାରୀ ଘଟଣାରେ ଜଣଙ୍କୁ ଗିରଫ କରିଛି । ଆସନ୍ତାକାଲି ମୁମ୍ବାଇର ୱାଙ୍ଖଡେ ଷ୍ଟାଡିୟମରେ ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ପ୍ରଥମ ସେମି ଫାଇନାଲ ମ୍ୟାଚ ଖେଳାଯିବ । ଭାରତ- ନ୍ୟୁଜିଲାଣ୍ଡ ମ୍ୟାଚ ଦେଖିବାକୁ ଡିମାଣ୍ଡ ବଢୁଛି । ଏହାକୁ ନେଇ କ୍ରିକେଟ ପ୍ରେମୀଙ୍କ ମଧ୍ୟରେ ନାହିଁ ନଥିବା ଉତ୍ସାହ ଦେଖିବାକୁ ମିଳିଛି । ଏହାର ଫାଇଦା ଉଠାଇ ଟିକେଟ କାଳବାଜାରୀ କରିଛନ୍ତି କିଛି ଦଲାଲ । 2500 ଟଙ୍କିଆ ଟିକେଟକୁ 25 ହଜାର ଓ 4 ହଜାର ଟଙ୍କିଆ ଟିକେଟକୁ 2 ଲକ୍ଷ 50 ହଜାର ଟଙ୍କାରେ ବିକ୍ରି କରିଛନ୍ତି । ଯାହା ପ୍ରକୃତ ଟିକେଟ ମୂଲ୍ୟଠୁ 10ରୁ 100 ଗୁଣା ଅଧିକ । ପୋଲିସ ଘଟଣାରେ ଗିରଫ କରିଥିବା ଜଣେ ହେଲେ ଆକାଶ କୋଠାରୀ । ଜେଜେ ପୋଲିସ ଆକାଶଙ୍କୁ ତାଙ୍କ ଘରୁ ଉଠାଇ ନେଇଛି ।
ମୁମ୍ବାଇ ସର୍କଲ-1 ଡିସିପି ପ୍ରଣବ ମୁଣ୍ଡେ କହିଛନ୍ତି, ''ଭାରତ-ନ୍ୟୁଜିଲାଣ୍ଡ ସେମି ଫାଇନାଲ ଟିକେଟ ଦର 2500ରୁ 4 ହଜାର ରହିଛି । ଯାହାକୁ 25 ହଜାରରୁ 5 ଲକ୍ଷରେ ବିକ୍ରି କରୁଛନ୍ତି ଦଲାଲ । ଏ ନେଇ ଖବର ମିଳିବା ପରେ ଆମ ଟିମ୍ ଜଣେ ଅଭିଯୁକ୍ତଙ୍କୁ ଗିରଫ କରିଛି । ଘଟଣାର ତଦନ୍ତ ଚାଲିଛି ଏହି ରାକେଟରେ ଆଉ କିଏ ସାମିଲ ଅଛନ୍ତି ତାହା ଜଣାପଡିବ ।''
ପ୍ରକାଶ ଥାଉକି, ଭାରତ ଚଳିତ ବିଶ୍ବକପରେ ଦମଦାର ପ୍ରଦର୍ଶନ କରି ସେମିଫାଇନାଲରେ ପ୍ରବେଶ କରିଛି । ଲିଗ ପର୍ଯ୍ୟାୟରେ ଦଳ ଅପରାଜେୟ ରହିଛି । ସମସ୍ତ 9ଟି ମ୍ୟାଚରେ ବାଜିମାତ କରିଛି ରୋହିତ ସେନା । ଆସନ୍ତାକାଲି (ବୁଧବାର) ବିଶ୍ବକପ 2023ରେ ପ୍ରଥମ ସେମିଫାଇନାଲ ମ୍ୟାଚ ଖେଳାଯିବ । ମୁମ୍ବାଇର ୱାଙ୍ଖଡେ ଷ୍ଟାଡିୟମରେ ମୁହାଁମୁହିଁ ହେବେ ଭାରତ ଓ ନ୍ୟୁଜିଲାଣ୍ଡ । ସେହିପରି 16 ତାରିଖରେ ଦକ୍ଷିଣ ଆଫ୍ରିକା ଓ ଅଷ୍ଟ୍ରେଲିଆ ମଧ୍ୟରେ ଦ୍ବିତୀୟ ସେମି ଫାଇନାଲ ମ୍ୟାଚ ଖେଳାଯିବ ।
