ମାଞ୍ଚେଷ୍ଟର: ଚଳିତ ବିଶ୍ବକପରେ ଭାରତର ପ୍ରଦର୍ଶନ ରହିଛି ବେଶ ଦମଦାର । କିନ୍ତୁ ଫାଷ୍ଟ ବୋଲର ଭୁବନେଶ୍ବର କୁମାରଙ୍କ ଅନୁପସ୍ଥିତି ଟିମର ଚିନ୍ତା ବଢ଼ାଇପାରେ । ଇତି ମଧ୍ୟରେ କିନ୍ତୁ ଇଂଲଣ୍ଡରୁ ଖୁସି ଖବର ଆସିବାର ସମ୍ଭାବନା ରହିଛି । କାରଣ ଆହତ ଭୁବନେଶ୍ବର କୁମାରଙ୍କୁ ମଙ୍ଗଳବାର ନେଟରେ ଖୁବ ଅଭ୍ୟାସ କରୁଥିବାର ଦେଖିବାକୁ ମିଳିଥିଲା । ମାଞ୍ଚେଷ୍ଟରରେ ଇନଡୋର ପ୍ରାକ୍ଟିସ ବେଳେ ଭୁବିଙ୍କୁ ବୋଲିଂ କରୁଥିବାର ଦେଖିବାକୁ ମିଳିଥିଲା ।
ବିସିସିଆଇ ଏକ ଭିଡିଓ ସେୟାର କରିଛି, ଯେଉଁଥିରେ ଭୁବନେଶ୍ବରଙ୍କୁ ବୋଲିଂ କରୁଥିବାର ଦେଖିବାକୁ ମିଳିଛି । ଏହାସହ ଅଭ୍ୟାସ ବେଳର ଫଟୋ ସବୁ ମଧ୍ୟ ସେୟାର କରିଛି ବିସିସିଆଇ । ଏହି ଫଟୋରେ କୋଚ ରବି ଶାସ୍ତ୍ରୀ ଟିମ ଇଣ୍ଡିଆର ଅଧିନାୟକ କୋହଲି ଓ ଅଲରାଉଣ୍ଡର ବିଜୟ ଶଙ୍କରଙ୍କ ସହ ଆଲୋଚନା କରୁଥିବାର ଦେଖିବାକୁ ମିଳିଛି । ଗୁରୁବାର ଭାରତୀୟ ସେନା ୱେଷ୍ଟଣ୍ଡିଜ ବିପକ୍ଷରେ ମଇଦାନକୁ ଓହ୍ଲାଇବ ।
ସୂଚନା ଯୋଗ୍ୟ ଯେ ପାକିସ୍ତାନ ବିପକ୍ଷ ମ୍ୟାଚରେ ବୋଲିଂ କରିବା ବେଳେ ଭୁବିଙ୍କ ମାଂସପେସୀ ଟାଣି ହୋଇଯାଇ ସମସ୍ୟା ଉତ୍ପନ୍ନ ହୋଇଥିଲା । ଏହି କାରଣରୁ ତାଙ୍କୁ ମ୍ୟାଚ ମଝିରୁ ମଇଦାନ ଛାଡିବାକୁ ପଡିଥିଲା । ତାଙ୍କ ସ୍ଥାନରେ ବୋଲିଂ କରିଥିଲେ ବିଜୟ ଶଙ୍କର । ସେପଟେ ଆହତ ଭୁବନେଶ୍ବରଙ୍କ ସ୍ଥାନରେ ଟିମରେ ସାମିଲ ହେବାକୁ ମାଞ୍ଚେଷ୍ଟର ପହଁଞ୍ଚିଛନ୍ତି ନବଦୀପ ସୈନୀ । ତେବେ ଟିମ ମ୍ୟାନେଜମେଣ୍ଟ ଭୁବନେଶ୍ବରଙ୍କ ସ୍ଥିତି ନେଇ କୌଣସି ସୂଚନା ଦେଇ ନାହାନ୍ତି ।
ଭାରତୀୟ ଟିମ ସ୍ପଷ୍ଟ କରିଛି ଯେ ନବଦୀପ କେବଳ ଜଣେ ନେଟ ବୋଲର ଭାବେ ଟିମ ସହ ଯୋଡି ହୋଇ ରହିଥିଲେ । ବିଶ୍ବକପ ପାଇଁ ଚୟନ କରାଯାଇଥିବା 15 ଜଣିଆ ଟିମରେ ଜଣେ ଷ୍ଟାଣ୍ଡ ବାଏ ଭାବରେ ନବଦୀପଙ୍କୁ ନିଆଯାଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
