ନୂଆଦିଲ୍ଲୀ: କ୍ରିକେଟର ତିନୋଟି ଫର୍ମାଟରେ ଭାରତୀୟ ପେସର ଜସପ୍ରୀତ ବୁମରାଙ୍କୁ ବର୍ତ୍ତମାନର ଶ୍ରେଷ୍ଠ ବୋଲର ଭାବରେ ପରିଗଣିତ କରାଯାଉଛି । ଇଣ୍ଡିଆନ ପ୍ରିମିୟର ଲିଗରେ ମୁମ୍ବାଇ ଇଣ୍ଡିଆନ୍ସ ପାଇଁ ଖେଳୁଥିବା ଡାହାଣହାତୀ ବୋଲର ନିଜ ପ୍ରଦର୍ଶନ ବଳରେ ନିଜ ପାଇଁ ଏହି ପରିଚୟ ସୃଷ୍ଟି କରିଛନ୍ତି । ସେ 2013 ଠାରୁ ମୁମ୍ବାଇ ଇଣ୍ଡିଆନ୍ସ ସହ ଅଛନ୍ତି ଏବଂ ଏପର୍ଯ୍ୟନ୍ତ ଆଇପିଏଲର 77ଟି ମ୍ୟାଚରେ ସେ 7.55 ଇକୋନୋମି ସହ 82 ୱିକେଟ ନେଇଛନ୍ତି । ତେବେ ବୁମରା ବି ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ପାଇଁ ଖେଳିଥାନ୍ତେ ବୋଲି କହିଛନ୍ତି ଭାରତୀୟ କ୍ରିକେଟର ପାର୍ଥିବ ପଟେଲ ।
ଏକ ସାକ୍ଷାତକାରରେ ପାର୍ଥିବ କହିଛନ୍ତି ଯେ, ସେ ନିଲାମ ସମୟରେ ବୁମରାଙ୍କୁ କିଣିବା ପାଇଁ କୋହଲିଙ୍କୁ କହିଥିଲେ । ବୁମରାଙ୍କୁ ନେଇ ପଚରା ଯାଇଥିବା ଏକ ପ୍ରଶ୍ନର ଉତ୍ତରରେ ଏହା କହିଥିଲେ ପାର୍ଥିବ ।
ବୁମରାଙ୍କୁ ନେଇ ନିଜ ପ୍ରତିକ୍ରିୟାରେ ବାମହାତୀ ବ୍ୟାଟ୍ସମ୍ୟାନ୍ କହିଛନ୍ତି ଯେ, “ବିଦର୍ଭ ବିପକ୍ଷରେ ତାଙ୍କର ଡେବ୍ୟୁ ମ୍ୟାଚ ମୋର ମନେ ଅଛି । ମୁଁ ଜନ ରାଇଟଙ୍କ ସହ କଥା ହୋଇଛି, ମୁଁ ରାହୁଲ ସାଙ୍ଗଭିଙ୍କ ସହ ମଧ୍ୟ କଥା ହୋଇସାରିଥିଲି, ମୁମ୍ବାଇ ଇଣ୍ଡିଆନ୍ସ ତାଙ୍କୁ ବାଛିବା ପୂର୍ବରୁ ମୁଁ ବିରାଟଙ୍କ ସହ ମଧ୍ୟ କଥା ହୋଇଥିଲି । ମୁଁ ଆରସିବିରେ ଥିଲି ଏବଂ ମୁଁ ବିରାଟଙ୍କୁ କହିଥିଲି ଯେ ସେ ହେଉଛନ୍ତି ସେହି ବ୍ୟକ୍ତି, ଆମେ ତାଙ୍କୁ ଆମ ଟିମରେ ନେବା ଉଚିତ ।
“କିନ୍ତୁ ମୁମ୍ବାଇ ଇଣ୍ଡିଆନ୍ସ ଆରସିବିକୁ ପରାସ୍ତ କରିଥିଲା ଓ ବୁମରା ଏମଆଇକୁ ଯାଇଥିଲେ। ମୁଁ ଜନ ରାଇଟଙ୍କ ସହ କଥା ହୋଇଥିଲି ଓ କହିଥିଲି ଯେ ଏହି ଖେଳାଳି ଭିତରେ କିଛି ଖାସ ରହିଛି,’’ ବୋଲି କହିଛନ୍ତି ପାର୍ଥିବ ।
ବୁମରା ବର୍ତ୍ତମାନ ଆଇସିସିର ଦିନିକିଆ ବୋଲିଂ ରାଙ୍କିଙ୍ଗରେ ଦ୍ବିତୀୟ ସ୍ଥାନରେ ରହିଛନ୍ତି । ଟେଷ୍ଟ ବୋଲିଂ ରାଙ୍କିଙ୍ଗରେ 7ମ ସ୍ଥାନରେ ଅଛନ୍ତି ସେ । 14ଟି ଟେଷ୍ଟ ଖେଳି 20.3 ଆଭରେଜରେ ବୁମରା 68 ୱିକେଟ ନେଇଥିବା ବେଳେ 64ଟି ଦିନିକିଆରେ 24.4 ଆଭରେଜ ସହ 104 ୱିକେଟ ନେଇଛନ୍ତି । ବୁମରା ଭାରତୀୟ କ୍ରିକେଟ ଦଳ ପାଇଁ 50 ଟି -20 ମଧ୍ୟ ଖେଳିଛନ୍ତି ଯେଉଁଥିରେ ସେ 26.6 ଆଭରେଜରେ 59ଟି ୱିକେଟ ନେଇଛନ୍ତି ।
