କଟକ: ବାରବାଟୀରେ ଭାରତ-ୱେଷ୍ଟଇଣ୍ଡିଜ ଦିନିକିଆ ମ୍ୟାଚ ଆୟୋଜନ ପାଇଁ ଅଣ୍ଟା ଭିଡିଛି ଓଡିଶା କ୍ରିକେଟ ଆସେସିଏସନ(ଓସିଏ) । ଏନେଇ ଆଜି ଓସିଏର ଗୁରୁତ୍ବପୂର୍ଣ୍ଣ ବୈଠକ ଅନୁଷ୍ଠିତ ହୋଇଛି । ବୈଠକରେ ଓସିଏ ସଭାପତି, ସମ୍ପାଦକଙ୍କ ସମେତ ଅନ୍ୟ ସମସ୍ତ ଅଧିକାରୀ ଉପସ୍ଥିତ ରହିଥିଲେ । 2 ଘଣ୍ଟାରୁ ଉର୍ଦ୍ଧ୍ବ ସମୟ ଧରି ବୈଠକ ପରେ ମ୍ୟାଚ ପାଇଁ ଓସିଏର ବଜେଟ ପ୍ରସ୍ତୁତି ନେଇ ତଥ୍ୟ ରଖିଥିଲେ ସମ୍ପାଦକ ସଞ୍ଜୟ ବେହେରା ।
ଏଥିସହିତ ବିସିସିଆଇ ପକ୍ଷରୁ ଓସିଏକୁ 10 କୋଟି ଟଙ୍କାର ଅର୍ଥ ମିଳିଥିବା ସୂଚନା ଦେଇଛନ୍ତି ଓସିଏ ସମ୍ପାଦକ । ତେବେ ମ୍ୟାଚ ପାଇଁ ଆଉ ଏକ ବୈଠକ ଖୁବଶୀଘ୍ର ବସିବା ନେଇ ସଞ୍ଜୟ କହିଛନ୍ତି । ଓସିଏ ଆସନ୍ତା ଏକଦିବସୀୟ ମ୍ୟାଚ ପାଇଁ ଖର୍ଚ୍ଚ ବାବଦକୁ 6 କୋଟି ଟଙ୍କାର ବଜେଟ ଆକଳନ କରିଛି । ମ୍ୟାଚ ପାଇଁ 22 କୋଟି ଟଙ୍କାର ବୀମା ମଧ୍ୟ କରିଛି ଓସିଏ । ତେବେ ଫନିରେ କ୍ଷତି ହୋଇଥିବା ଷ୍ଟାଡିୟମର ବିଭିନ୍ନ ଅଂଶର ମରାମତି କାର୍ଯ୍ୟ ଖୁବଶୀଘ୍ର କରାଯିବ ବୋଲି ମଧ୍ୟ ସେ କହିଛନ୍ତି ।
କଟକରୁ ପ୍ରଭୁକଲ୍ୟାଣ ପାଲ, ଇଟିଭି ଭାରତ
