ଚଟଗାଓଁ: ଆଫଗାନିସ୍ତାନ କ୍ରିକେଟ ଟିମ୍ର ଅଲରାଉଣ୍ଡର ମହମ୍ମଦ ନବୀ ନିଜ କ୍ରିକେଟ କ୍ୟାରିଅରର ଅନ୍ତିମ ମ୍ୟାଚ ଖେଳୁଛନ୍ତି । ବାଂଲାଦେଶ ବିପକ୍ଷରେ ଏହି ଅନ୍ତିମ ମ୍ୟାଚ ସେ ଖେଳୁଛନ୍ତି । ତେବେ ଟେଷ୍ଟ କ୍ୟାରିଅରରୁ ସନ୍ୟାସ ନେବା ପୂର୍ବରୁ ତାଙ୍କର ଏକ ଭିଡିଓ ଆଫଗାନିସ୍ତାନ କ୍ରିକେଟ ବୋର୍ଡ ନିଜର ଟ୍ବିଟର ଅକାଉଣ୍ଟରେ ସେୟାର କରିଛି ।
ତେବେ ସେହି ଭିଡିଓରେ ନବୀ କହିଛନ୍ତି ଯେ, ଖେଳାଳୀଙ୍କ ପାଇଁ ଟେଷ୍ଟ କ୍ରିକେଟ ଅତ୍ୟନ୍ତ ଆବଶ୍ୟକୀୟ । ମୁଁ ଦେଶ ପାଇଁ 18ବର୍ଷ ହେଲା କ୍ରିକେଟ ଖେଳୁଛି । ଟେଷ୍ଟ ମ୍ୟାଚ ଖେଳିବା ମୋର ସ୍ବପ୍ନ ଥିଲା । ଏହି ସ୍ବପ୍ନ ପୂରା ହୋଇଛି । ବର୍ଷରେ ଅତିକମ୍ରେ ଗୋଟିଏ କିମ୍ବା 2ଟା ଟେଷ୍ଟ ମ୍ୟାଚ ଖେଳିବାକୁ ମିଳେ । ଯେଉଁ ଯୁବ ଖେଳାଳୀମାନେ ଘରୋଇ ମ୍ୟାଚ ଖେଳୁଛନ୍ତି ସେମାନଙ୍କୁ କହିବାକୁ ଚାହିୁଁଛି ଯେ, ଦେଶ ପାଇଁ ଟେଷ୍ଟ ମ୍ୟାଚ ନିହାତି ଖେଳନ୍ତୁ ।
ମହମ୍ମଦ ନବୀ ଆହୁରୀ ମଧ୍ୟ କହିଛନ୍ତି ଯେ, ଯେବେ ଯାଏଁ ସମ୍ଭବ ସେ ପର୍ଯ୍ୟନ୍ତ ଦେଶ ପାଇଁ ଟେଷ୍ଟ ଓ ଟି-20 ମ୍ୟାଚ ଖେଳିବି । ମୋ ସହ ଖେଳୁଥିବା ଯୁବ ଖେଳାଳୀଙ୍କ ସହ ଅନୁଭବ ସେୟାର କରିବି ।
ସୂଚନାଥାଉକି, ଅଲରାଉଣ୍ଡର ନବୀ ଏଯାଏଁ 121 ଦିନିକିଆ ମ୍ୟାଚ ଖେଳି 2699ରନ୍ ହାସଲ କରିବା ସହ 128 ଓ୍ବିକେଟ ମଧ୍ୟ ଅକ୍ତିଆର କରିଛନ୍ତି । ଏଥିସହ ଟି-20 ମ୍ୟାଚରେ 1161ରନ୍ ହାସଲ କରିବା ସହ 69 ଓ୍ବିକେଟ ନିଜ ନାଁରେ କରିଛନ୍ତି । ଆଇସିସି ବିଶ୍ବକପ୍ରେ ନିଜ ଦେଶ ପାଇଁ ନଅଟି ମ୍ୟାଚରେ 10ଟି ଓ୍ବିକେଟ ନେଇଥିଲେ ।
