ନୂଆଦିଲ୍ଲୀ: ଆସନ୍ତା 23 ତାରିଖରେ ଆନୁଷ୍ଠାନିକ ଭାବେ ଘୋଷଣା ହେବ ଭାରତୀୟ କ୍ରିକେଟ ବୋର୍ଡ (ବିସିସିଆଇ) ଅଧିକାରୀ ଦଳ । ଅପ୍ରତିଦ୍ବନ୍ଦ୍ବୀ ପ୍ରାର୍ଥୀ ଭାବେ ସଭାପତି ପଦ ପାଇଁ ଚୟନ ହୋଇଛନ୍ତି ଦଳର ପୂର୍ବତନ ଅଧିନାୟକ ସୌରଭ ଗାଙ୍ଗୁଲି । ଏହି ପରିପ୍ରେକ୍ଷୀରେ ତାଙ୍କୁ କ୍ରିକେଟ୍ ଜଗତରୁ ଶୁଭେଚ୍ଛା ସୁଅ ଛୁଟିଛି ।
ଭାରତୀୟ ପୂର୍ବତନ ଓପନର ବୀରେନ୍ଦ୍ର ସେହ୍ୱାଗ ଟ୍ୱିଟ କରି ଲେଖିଛନ୍ତି, ‘ଦାଦା ଆପଣଙ୍କୁ ଅଭିନନ୍ଦନ। ବିଳମ୍ବ କିନ୍ତୁ ଅନ୍ଧାର ନୁହେଁ । ଭାରତୀୟ କ୍ରିକେଟ୍ ପାଇଁ ଏହା ଏକ ଭଲ ସଙ୍କେତ। ଆଶା କରୁଛି ଯେ ଭାରତୀୟ କ୍ରିକେଟରେ ଆପଣଙ୍କ ଯୋଗଦାନ ନିଶ୍ଚିତ ସଫଳ ରହିବ। ’
ସେହିପରି ପୂର୍ବତନ ବ୍ୟାଟ୍ସମ୍ୟାନ୍ ଭିଭିଏସ୍ ଲକ୍ଷ୍ମଣ ମଧ୍ୟ ଗାଙ୍ଗୁଲିଙ୍କୁ ଟ୍ୱିଟ୍ କରି ଶୁଭେଚ୍ଛା ଜଣାଇଛନ୍ତି। ଲକ୍ଷ୍ମଣ ଲେଖିଛନ୍ତି, ‘ବିସିସିଆଇ ସଭାପତି ପାଇଁ ଆପଣଙ୍କୁ ଅଭିନନ୍ଦନ । ମୋର ପୂର୍ଣ୍ଣ ବିଶ୍ୱାସ ଯେ, ଆପଣଙ୍କ ନେତୃତ୍ୱରେ ଭାରତୀୟ କ୍ରିକେଟ୍ ନିଶ୍ଚିତ ଆଗକୁ ବଢ଼ିବ । ଆପଣଙ୍କୁ ନୂଆ ଭୂମିକା ପାଇଁ ଅଭିନନ୍ଦନ। ’
ତେବେ ସବୁଠାରୁ ମଜାଦାର ଟ୍ବିଟ କରିଛନ୍ତି କ୍ରିକେଟ କିମ୍ବଦନ୍ତୀ ସଚିନ ତେନ୍ଦୁଲକର । ସେ ଟ୍ବିଟରେ ଦାଦଙ୍କୁ 'ଦାଦି' ବୋଲି ସମ୍ବୋଧନ କରିଛନ୍ତି। ସେ ଲେଖିଛନ୍ତି, ‘ବିସିସିଆଇ ସଭାପତି ପାଇଁ ଆପଣଙ୍କୁ ଅଭିନନ୍ଦନ। ମୁଁ ନିଶ୍ଚିତ ଯେ ଦାଦି ତୁମେ ପୂର୍ବରୁ ଯାହା ଭାରତୀୟ କ୍ରିକେଟ ପାଇଁ କରି ଆସିଥିଲ ତାହାକୁ ତୁମେ ଦୋହରାଇବ। ’
