ଲଣ୍ଡନ: ବୋଝ ଉପରେ ନଳିତା ବିଡା ପରି ଭାରତୀୟ ଟିମ ଉପରେ ବୋଝ ମାଡି ପଡୁଛି । 4ର୍ଥ ସ୍ଥାନକୁ ନେଇ ଏବେ ବି ଭାରତୀୟ ଦଳ ଦ୍ବନ୍ଦ୍ବରେ ଥିବା ବେଳେ ମଧ୍ୟକ୍ରମ ବ୍ୟାଟ୍ସମ୍ୟାନ ବିଜୟ ଶଙ୍କର ଅଭ୍ୟାସ ସମୟରେ ଆହତ ହୋଇଥିଲେ । ମାତ୍ର ପରେ ମିଳିଥିବା ସୂଚନାନୁସାରେ ବିଜୟ ଶଙ୍କରଙ୍କ ଆଘାତ ସେତେଟା ଗୁରୁତର ନୁହେଁ ।
ତେବେ ଶନିବାର ନ୍ୟୁଜିଲାଣ୍ଡ ବିପକ୍ଷ ୱାର୍ମଅପ ମ୍ୟାଚ ପୂର୍ବରୁ ନେଟ୍ସରେ ବ୍ୟାଟିଂ ଅଭ୍ୟାସ କରୁଥିଲେ ବିଜୟ । ବୋଲିଂ କରୁଥିବା ଖଲିଲ ଅହମ୍ମଦଙ୍କ ଏକ ଶଟ୍ ପିଚ୍ ବଲ ଶଙ୍କରଙ୍କ ରିଷ୍ଟରେ ବାଜିଥିଲା। ଯନ୍ତ୍ରଣା ହେବା ପରେ ସେ ଆଉ ଅଭ୍ୟାସରେ ଅଂଶଗ୍ରହଣ କରି ନ ଥିଲେ।
ତେବେ ଦଳର ଜଣେ ମୁଖପାତ୍ର ମିଡିଆକୁ ବିଜୟଙ୍କ ସୁସ୍ଥ ହେବା ଖବର ଦେଇଛନ୍ତି । ସେ କହିଛନ୍ତି, "ବିଜୟଙ୍କ ଆଘାତ ସାମାନ୍ୟ, ଫ୍ୟାକ୍ଚର ନୁହେଁ । ତାଙ୍କ ରିଷ୍ଟର ସ୍କାନ କରାଯିବା ପରେ ଫ୍ୟାକ୍ଚର ହୋଇ ନ ଥିବା ଜଣାପଡ଼ିଛି ।"
ଉଲ୍ଲେଖଥାଉ କି, ଶଙ୍କର ଭାରତୀୟ ଦଳର ୪ର୍ଥ କ୍ରମରେ ବ୍ୟାଟିଂ କରିବା ଲାଗି ପ୍ରଥମ ପସନ୍ଦ। ସେ ୨୮ ତାରିଖରେ ଖେଳାଯିବାକୁ ଥିବା ବାଂଲାଦେଶ ବିପକ୍ଷ ଓ୍ବାର୍ମଅପ୍ ମ୍ୟାଚ୍ରେ ଖେଳିବା ନେଇ ଆଶା କରାଯାଉଛି।
