ହାଇଦ୍ରାବାଦ: ଆଇପିଏଲ 2020 ଆରମ୍ଭ ପୂର୍ବରୁ ଚେନ୍ନାଇ ସୁପର କିଙ୍ଗ୍ସକୁ ବଡ ଆଉ ଏକ ଝଟକା । ଟିମର ଭେଟେରାନ ସ୍ପିନର ହରଭଜନ ସିଂହ ଆଇପିଏଲ 2020ରୁ ଓହରି ଯାଇଛନ୍ତି । ବ୍ୟକ୍ତିଗତ କାରଣ ଦର୍ଶାଇ ୟୁଏଇରେ ଖେଳାଯିବାକୁ ଥିବା ଆଇପିଏଲରେ ହରଭଜନ ଖେଳିବେ ନାହିଁ ବୋଲି ଘୋଷଣା କରିଛନ୍ତି ।
ଆଇପିଏଲର 13ତମ ସଂସ୍କରଣ ପାଇଁ ଚେନ୍ନାଇ ସୁପର କିଙ୍ଗ୍ସର ଖେଳାଳି ୟୁଏଇ ଗସ୍ତ କରିଥିବାବେଳେ, ହରଭଜନ ଯାଇନଥିଲେ । ପରେ ସେ ଆଇପିଏଲରୁ ଓହରିବା ନେଇ ଚର୍ଚ୍ଚା ଆରମ୍ଭ ହୋଇଥିଲା । ତେବେ ପରେ ସେପ୍ଟେମ୍ବର ପହିଲାରେ ଭଜି ୟୁଏଇ ଗସ୍ତ କରିପାରନ୍ତି ବୋଲି କୁହାଯାଇଥିଲା ।
ତେବେ ସବୁ କଳ୍ପନା ଜଳ୍ପନାର ଅନ୍ତ ଘଟିଛି । ଟ୍ବିଟ କରି ହରଭଜନ ଆଇପିଏଲ 2020 ଖେଳିବେ ନାହିଁ ବୋଲି ଘୋଷଣା କରିଛନ୍ତି । ତେବେ ଚେନ୍ନାଇ ସୁପର କିଙ୍ଗ୍ସ ଟିମ ମ୍ୟାନେଜମେଣ୍ଟକୁ ହରଭଜନ ବହୁତ ସହଯୋଗୀ କହିବା ସହ ଆଗାମୀ ଆଇପିଏଲ ପାଇଁ ଶୁଭେଚ୍ଛା ଜଣାଇଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
