ପୁଣେ: ଦକ୍ଷିଣ ଆଫ୍ରିକା ବିପକ୍ଷରେ ଖେଳାଯାଉଥିବା ଟେଷ୍ଟ ସିରିଜର ଦ୍ବିତୀୟ ମ୍ୟାଚରେ ଭାରତୀୟ ଟିମର ଓପନର ମୟଙ୍କ ଅଗ୍ରୱାଲ ପୁଣିଥରେ ଶାନଦାର ଶତକ କରିଛନ୍ତି । 195 ବଲରେ 108ରନ ସ୍କୋର କରିଛନ୍ତି ମୟଙ୍କ । ତେବେ ‘ଇଟିଭି ଭାରତ’ ସହ ସ୍ବତନ୍ତ୍ର ସାକ୍ଷାତକାରରେ ନିଜର ଗୋଟିଏ ବର୍ଷର କ୍ୟାରିୟର ବିଷୟରେ କହିଛନ୍ତି ସେ ।
ବିଶାଖାପଟ୍ଟନମରେ ଦ୍ବିଶତକ କରିଥିବା ମୟଙ୍କ କହିଛନ୍ତି, ‘‘ଗତ 12 ମାସ ମୋ ପାଇଁ ବହୁତ ଭଲ ଥିଲା । ମୁଁ ବ୍ୟାଟିଂ ନେଇ ବେଶ ଖୁସି ଅଛି, ଏମିତି ରନ କରୁଥିଲେ ମୋ ପାଇଁ ଭଲ । ଜଣେ ଖେଳାଳି ଭାବେ ମୁଁ ପ୍ରତିଦିନ ଭଲ ପ୍ରଦର୍ଶନ କରିବାକୁ ଚେଷ୍ଟା କରେ । ପ୍ରତି ଦିନକୁ ଏକ ନୂଆ ଚ୍ୟାଲେଞ୍ଜ ଭାବେ ଗ୍ରହଣ କରେ । ସ୍ପୋର୍ଟସ ଏମିତି ଏକ ଜିନିଷ ଯେଉଁଥିରେ ଭାରସାମ୍ୟ ରଖିବା ନିହାତି ଜରୁରୀ । ଆଜି ଯଦି ଆପଣ 100 ରନ କରିଛନ୍ତି ଆଉ କାଲି ମଧ୍ୟ ଆପଣ ଖେଳିବେ ତେବେ ଆପଣ ଭାବିବା ଦରକାର ଯେ ନୂଆ ଦିନ ନୂଆ ଆରମ୍ଭ ହେବ । ରନ ଅଧିକ କରିବି କିମ୍ବା ରନ କରି ହେବନି ଏକଥା ଭାବିବା ଉଚିତ ନୁହେଁ ।’’
ନିଜ ଖେଳର ପରିବର୍ତ୍ତନ ବିଷୟରେ ମୟଙ୍କ କହିଛନ୍ତି, ‘‘ମୁଁ ନିଜ ଖେଳର ବାଲାନ୍ସ ଉପରେ ବେଶ ଗୁରୁତ୍ବ ଦେଇଛି ଓ ଖେଳକୁ ସବୁବେଳେ ବୁଝିବାକୁ ଚେଷ୍ଟା କରିଛି । ନିଜ ଖେଳକୁ ବୁଝିଗଲେ ଆପଣଙ୍କ ପାଇଁ ଅନେକ ଜିନିଷ ସହଜ ହେଇଯାଏ । ତେଣୁ ଗତ ତିନି ବର୍ଷ ଧରି ମୁଁ ଏହା ଉପରେ ଅଧିକ ଗୁରୁତ୍ବ ଦେଉଛି ।
ମୟଙ୍କ ଆହୁରି ମଧ୍ୟ କହିଛନ୍ତି ଯେ ଶୋଇବା ପୂର୍ବରୁ ପ୍ରତିଦିନ ସେ ଆଗାମୀ ଦିନ ପାଇଁ ଲକ୍ଷ୍ୟ ଧାର୍ଯ୍ୟ କରନ୍ତି । ସକାଳୁ ଉଠି ସେ ତାହା ଉପରେ କାର୍ଯ୍ୟ କରନ୍ତି । ଧୋନି ଓ କୋହଲିଙ୍କ ବିଷୟରେ ମୟଙ୍କ କହିଛନ୍ତି ଯେ ଉଭୟଙ୍କ ଠାରୁ ସେ ଅନେକ କିଛି ଶିଖିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
