ହାଇଦ୍ରାବାଦ: ୱେଷ୍ଟଇଣ୍ଡିଜ୍ ଅଲରାଉଣ୍ଡର ଡ୍ବେନ ବ୍ରାଭୋ ବୁଧବାର ପ୍ରଥମ କ୍ରିକେଟର ଭାବରେ ଟି -20 କ୍ରିକେଟରେ 500 ୱିକେଟ୍ ନେଇଛନ୍ତି । କାରିବିଆନ୍ ପ୍ରିମିୟର ଲିଗରେ ସେଣ୍ଟ ଲୁସିଆ ଜୁକ୍ସଙ୍କ ବିପକ୍ଷରେ ଟ୍ରିନିବାଗୋ ନାଇଟ୍ ରାଇଡର୍ସ ପାଇଁ ଖେଳିବା ସମୟରେ ବ୍ରାଭୋ ଏହି ସଫଳତା ହାସଲ କରିଛନ୍ତି |
ବୁଧବାର ମ୍ୟାଚ୍ର ପ୍ରଥମ ଓଭରରେ ସେଣ୍ଟ୍ ଲୁସିଆ ଜୁକ୍ସ ଓପନର୍ ରହକିମ୍ କର୍ଣ୍ଣୱାଲ୍ଙ୍କୁ ଆଉଟ କରିବା ପରେ ବ୍ରାଭୋ ଏହି ମାଇଲଖୁଣ୍ଟ ଛୁଇଁଛନ୍ତି । ଟି -20 କ୍ରିକେଟ୍ ଇତିହାସରେ ଅନ୍ୟ କୌଣସି ବୋଲର 400 ୱିକେଟ୍ ମାର୍କ ମଧ୍ୟ ଅତିକ୍ରମ କରି ନାହାଁନ୍ତି ।
ଡ୍ବେନ ବ୍ରାଭୋ ତାଙ୍କର 459 ତମ ଟି -20 ମ୍ୟାଚରେ ଏହି ମାଇଲଖୁଣ୍ଟ ହାସଲ କରିଛନ୍ତି | 2006 ରେ ନିଜର T-20 ଡେବ୍ୟୁ କରିଥିଲେ ବ୍ରାଭୋ । ସେ ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍) ରେ ମୁମ୍ବାଇ ଇଣ୍ଡିଆନ୍ସ ଏବଂ ଚେନ୍ନାଇ ସୁପର କିଙ୍ଗ୍ସ ପାଇଁ ଖେଳିସାରିଛନ୍ତି । ସେହିପରି ସେ ସିଡନୀ ସିକ୍ସର୍ସ ଏବଂ ମେଲବୋର୍ଣ୍ଣ ଷ୍ଟାର୍ସ ଏବଂ ରେନେଗେଡ୍ସ ସମେତ କିଛି ବଡ ଟି -20 ଫ୍ରାଞ୍ଚାଇଜର ଅଂଶବିଶେଷ ରହିଛନ୍ତି ।
ଉଲ୍ଲେଖଯୋଗ୍ୟ, ଡ୍ବେନ ବ୍ରାଭୋ 2018ରେ ଅନ୍ତର୍ଜାତୀୟ କ୍ରିକେଟରୁ ଅବସର ନେଇଥିଲେ । କିନ୍ତୁ ସେ ୟୁ-ଟର୍ନ କରିଥିଲେ ଏବଂ ଡିସେମ୍ବର 2019 ରେ ଟି -20 ରେ ୱେଷ୍ଟଇଣ୍ଡିଜ ପାଇଁ ଚୟନ ପାଇଁ ଉପଲବ୍ଧ ହେବେ ବୋଲି ଘୋଷଣା କରିଥିଲେ । ବ୍ରାଭୋ ସ୍ପଷ୍ଟ କରିଛନ୍ତି ଯେ ସେ ଟେଷ୍ଟ ଏବଂ ଦିନିକିଆ ଖେଳିବେ ନାହିଁ । 2020 ରେ 4 ବର୍ଷର ଅନୁପସ୍ଥିତି ପରେ ବ୍ରାଭୋ ୱେଷ୍ଟଇଣ୍ଡିଜ୍ ଦଳକୁ ଫେରିଥିଲେ ଏବଂ ଆୟର୍ଲାଣ୍ଡ ଏବଂ ଶ୍ରୀଲଙ୍କା ବିପକ୍ଷରେ 5 ଟି -20 ଖେଳିଥିଲେ ।
ତେବେ ଟି -20 କ୍ରିକେଟର ଜଣେ ବୋଲରଙ୍କ ଦ୍ବାରା 295 ମ୍ୟାଚରେ 390 ଟି ୱିକେଟ୍ ତାଲିକାରେ ଶ୍ରୀଲଙ୍କାର କିମ୍ବଦନ୍ତୀ ଲାସିଥ ମାଲିଙ୍ଗା 2ୟ ସ୍ଥାନରେ ଥିବାବେଳେ ୱେଷ୍ଟଇଣ୍ଡିଜ୍ ଅଲରାଉଣ୍ଡର ସୁନୀଲ ନାରିନ 339 ମ୍ୟାଚରେ 383 ୱିକେଟ ସହ ତୃତୀୟ ସ୍ଥାନରେ ଅଛନ୍ତି । 229 ଟି ମ୍ୟାଚରୁ 253 ୱିକେଟ୍ ନେଇ ତାଲିକାର ଶ୍ରେଷ୍ଠ 20 ରେ ଅମିତ ମିଶ୍ର ଏକମାତ୍ର ଭାରତୀୟ ଭାବେ ଅଛନ୍ତି ।
