ଚେନ୍ନାଇ: ଧୋନିଙ୍କ ପାଇଁ ଗୀତ ଲେଖିବା ସହ ଏହାର ଏକ ଛୋଟ ସାମ୍ପଲ ଟ୍ବିଟରେ ସେୟାର କରିଛନ୍ତି ୱେଷ୍ଟଇଣ୍ଡିଜ ଅଲରାଉଣ୍ଡର ଡ୍ବେନ ବ୍ରାଭୋ । ଏହାସହ ଇଣ୍ଡିଆନ ପ୍ରିମିୟର ଲିଗ ସମୟରେ ତାଙ୍କ ଉପରେ ସବୁବେଳେ ଭରସା ରଖିଥିବାରୁ ଧୋନିଙ୍କୁ ଚେନ୍ନାଇ ସୁପର କିଙ୍ଗ୍ସର ଇନଷ୍ଟାଗ୍ରାମ ଲାଇଭରେ ବ୍ରାଭୋ ଖୁବ ପ୍ରଶଂସା କରିଛନ୍ତି । ଆଇପିଏଲରେ ଚେନ୍ନାଇ ସୁପର କିଙ୍ଗ୍ସ କାହିଁକି ସବୁଠାରୁ ଖାସ ଓ ଏହାସହ କାହିଁକି ଏକ ସମ୍ପୃକ୍ତିର ଭାବ ରହିଛି ତାହା ମଧ୍ୟ କହିଛନ୍ତି ବ୍ରାଭୋ ।
ଧୋନିଙ୍କୁ ନେଇ ବ୍ରାଭୋ ଏକ ଗୀତ ଲେଖିଛନ୍ତି । ଏହି ଗୀତର ଏକ ଛୋଟ ଭିଡିଓ ଟ୍ବିଟରରେ ସେୟାର କରିଛି ଚେନ୍ନାଇ ସୁପର କିଙ୍ଗ୍ସ । ଗୀତ ଆରମ୍ଭରୁ ବ୍ରାଭୋ କହିଛନ୍ତି ଯେ, ‘‘ଏହି ଗୀତ ମୋ ଭାଇ ଧୋନି ପାଇଁ । ଆଉ ଜଣେ ମାଙ୍କ ଠାରୁ ମୋ ଭାଇ (My Brother from another mother) ।’’
‘‘ଧୋନି ଓ କୋଚ ଷ୍ଟିଫନ ଫ୍ଲେମିଙ୍ଗ ସବୁବେଳେ ମୋ ଉପରେ ଭରସା କରିଛନ୍ତି । ମୁଁ ଡେଥ ଓଭରରେ ବୋଲିଂ କରେ । ସିଏସକେ ସବୁବେଳେ ମୋ ଉପରେ ବିଶ୍ବାସ କରିଛି ଯେ ମୁଁ ଡେଥ ଓଭରରେ ଭଲ ପ୍ରଦର୍ଶନ କରି ପାରିବି । ଖେଳିବା ବେଳେ ସ୍ଥିତି ସବୁବେଳେ ସମାନ ନଥାଏ । କିନ୍ତୁ ମୁଁ ମୋ ନିଜ ଉପରେ ବିଶ୍ବାସ ରଖି ଖେଳେ,’’ ବୋଲି କହିଛନ୍ତି ବ୍ରାଭୋ ।
2011 ମସିହାରୁ ଡ୍ବେନ ବ୍ରାଭୋ ସିଏସକେ ପାଇଁ ଖେଳୁଛନ୍ତି । ଏଯାବତ ସେ 104ଟି ମ୍ୟାଚ ଖେଳି ସାରିଛନ୍ତି ।
ଏହାସହ ବ୍ରାଭୋ ଆହୁରି ମଧ୍ୟ କହିଛନ୍ତି ଯେ, ‘‘ସିଏସକେ ସହ କେଜାଣି କାହିଁକି ଏକ ପରିବାର ଭଳି ସମ୍ପର୍କ ରହିଛି । ଏହା କେବଳ ଏକ ଟିମ ନୁହେଁ ଏକ ପରିବାର । ବର୍ଷକୁ ବର୍ଷ ଯେତେ ନୂଆ ଖେଳାଳି ଆସିଛନ୍ତି ସମସ୍ତେ ଏହା ଅନୁଭବ କରିଛନ୍ତି । ଏହି ଟିମରେ ରହି ସମସ୍ତଙ୍କ ଖେଳରେ ସୁଧାର ଆସିଛି । ମୁଁ ଅନ୍ୟ ଫ୍ରାଞ୍ଚାଇଜି ପାଇଁ ମଧ୍ୟ ଖେଳିଛି ।’’
