ହାଇଦ୍ରାବାଦ: ୱେଷ୍ଟ ଇଣ୍ଡିଜ ଅଲରାଉଣ୍ଡର ଡ୍ବାଏନ ବ୍ରାଭୋ କହିଛନ୍ତି ଯେ ଚେନ୍ନାଇ ସୁପର କିଙ୍ଗ୍ସ (ସିଏସକେ) ମ୍ୟାନେଜମେଣ୍ଟ ତାଙ୍କ ଉପରେ ଯେଉଁ ବିଶ୍ବାସ ଦେଖାଇଛି ତାହା ତାଙ୍କୁ କ୍ୟାରିୟରରେ ସଫଳତା ପାଇବାରେ ବେଶ ସହାୟକ ହୋଇଛି । ତେବେ ବର୍ତ୍ତମାନ ଅବସରର ନିକଟବର୍ତ୍ତୀ ହୋଇଥିବା ଭାରତର ପୂର୍ବତନ ଅଧିନାୟକ ଏମଏସ ଧୋନିଙ୍କ ପାଇଁ ସେ କିଛି କରିବାକୁ ଚାହୁଁଛନ୍ତି ବୋଲି କହିଛନ୍ତି ।
ଏକ ଅନଲାଇନ ଟକ ସୋରେ ବ୍ରାଭୋ କହିଛନ୍ତି ଯେ କିପରି ସିଏସକେ ତାଙ୍କୁ ଓ ସେନ ୱାଟସନ ଭଳି ଖେଳାଳିଙ୍କୁ ଜୀବନରେ ଦ୍ବିତୀୟ ଥର କିଛି କରି ଦେଖାଇବାର ସୁଯୋଗ ଦେଇଛି ।
“ଅନ୍ୟ ଦଳରେ, ଯଦି ଆପଣ ଭଲ ପ୍ରଦର୍ଶନ କରନ୍ତି ନାହିଁ, ତେବେ ଆପଣ ଚାପଗ୍ରସ୍ତ ଅନୁଭବ କରନ୍ତି । କିନ୍ତୁ ସିଏସକେରେ ଆପଣ ତାହା ଅନୁଭବ କରିବେ ନାହିଁ । ସେନ ୱାଟସନ ଖୋଲାଖୋଲି ଭାବରେ କହିଛନ୍ତି ଯଦି ସେ ଯଦି ଅନ୍ୟ ଫ୍ରାଞ୍ଚାଇଜ ପାଇଁ ଖେଳୁଥାନ୍ତେ ତେବେ ତାଙ୍କୁ ଡ୍ରପ କରିଦିଆ ଯାଇଥାନ୍ତା କିମ୍ବା ସେ ଅବସର ନେବାକୁ ଚିନ୍ତା କରିଥାନ୍ତେ । ମୁଁ ଭାବୁନାହିଁ ସିଏସକେ ପରି ଆଉ କୌଣସି ଫ୍ରାଞ୍ଚାଇଜ ଅଛି । ଏଥିପାଇଁ ଅଧିକାଂଶ ଶ୍ରେୟ ଧୋନି ଏବଂ ଫ୍ଲେମିଂକୁ ଦିଆଯିବା ଉଚିତ,’’ ବୋଲି ବ୍ରାଭୋ କହିଛନ୍ତି।
2011 ଠାରୁ ସିଏସକେର ସଫଳ ଯାତ୍ରାରେ ପ୍ରମୁଖ ଭୂମିକା ଗ୍ରହଣ କରିଥିବା ବ୍ରାଭୋ ଏହି ପ୍ରାଞ୍ଚାଇଜ ପାଇଁ 104ଟି ୱିକେଟ ନେଇଛନ୍ତି । ଏହାସହ ସେ ଦୁଇଥର ପର୍ପଲ କ୍ୟାପ ଓ ଦୁଇ ଥର ୱିନର ମେଡାଲ ମଧ୍ୟ ଜିତିଛନ୍ତି ।
ସେ କହିଛନ୍ତି, “ମୁଁ ନିଜକୁ ଅନେକ ଥର ପଚାରିଛି, ଏମଏସଙ୍କ ପରି ଜଣେ କେହି ମୋ ଉପରେ ଏତେ ବିଶ୍ବାସ କାହିଁକି କରନ୍ତି ? ମୋର ନିଜସ୍ବ ବୋର୍ଡ ଏବଂ ଚୟନକର୍ତ୍ତାଙ୍କର ସମାନ ବିଶ୍ବାସ ମୋ ଉପରେ ନାହିଁ । କିନ୍ତୁ ମାହି ମୋର ପ୍ରତିଭା ଏବଂ ମୁଁ ଯେଉଁ ପ୍ରକାର ଖେଳେ ତାକୁ ଖୁବ ସମ୍ମାନ କରନ୍ତି । ଯାହା ମୋ ପାଇଁ ଖୁବ ବଡ କଥା ।’’
“ମୁଁ ତାଙ୍କ ପାଇଁ କିଛି କରିବାକୁ ଚାହୁଁଥିଲି । ସେ ତାଙ୍କ କ୍ୟାରିୟରର ଶେଷ ପର୍ଯ୍ୟାୟରେ ପହଁଞ୍ଚିଛନ୍ତି । ତାଙ୍କ କ୍ୟାରିଅର ଅତୁଳନୀୟ ରହିଛି । ଅନ୍ୟମାନଙ୍କ ସହ ମୋ କ୍ୟାରିୟରରେ ମଧ୍ୟ ଧୋନିଙ୍କର ବହୁତ ବଡ ପ୍ରଭାବ ପଡିଛି ,’’ ବୋଲି ବ୍ରାଭୋ କହିଛନ୍ତି । ବ୍ରାଭୋ ତାଙ୍କର ନୂଆ ଗୀତ “ନଂ 7” ବିଷୟରେ କହିଛନ୍ତି ଯାହାର ଲିରିକ୍ସ ଧୋନିଙ୍କ ଉପରେ ଆଧାରିତ ।
