ଲଣ୍ଡନ: ବେକାର ଗଲା ଟ୍ରେଣ୍ଟ ବୋଲ୍ଡ ହ୍ୟାଟ୍ରିକ୍ କଙ୍ଗାରୁ ଶିକାର । କଙ୍ଗାରୁ ଦଳର ବୋଲିଂ ଆଟାକିଂ ଆଗରେ ଫିକା ପଡିଗଲା ବ୍ଲାକ୍କ୍ୟାପ ଦଳର ବ୍ୟାଟିଂ । ପାକିସ୍ତାନ ପରେ ଚଳିତ ବିଶ୍ବକପରେ ପୁଣି ଥରେ ଆଉ ଏକ ପରାଜୟ ପାଇଛି ନ୍ୟୁଜିଲାଣ୍ଡ ଦଳ । ଶନିବାର ଐତିହାସିକ ଲର୍ଡ୍ସ ଗ୍ରାଉଣ୍ଡରେ ଖେଳାଯାଇଥିବା ମ୍ୟାଚରେ 86ରନ ନ୍ୟୁଜିଲାଣ୍ଡକୁ ପରାସ୍ତ କରିଛି ଟେବୁଲ ଟପ୍ପର ଅଷ୍ଟ୍ରେଲିଆ ।
ତେବେ ପ୍ରଥମେ ବ୍ୟାଟିଂ କରି ଅଷ୍ଟ୍ରେଲିଆ ନିର୍ଦ୍ଧାରିତ ଓଭରରେ 9 ୱିକେଟ ହରାଇ 243ରନ କରିଥିଲା । ନ୍ୟୁଜିଲାଣ୍ଡର ପେସ୍ ଷ୍ଟାର ଟ୍ରେଣ୍ଟ ବୋଲ୍ଟ ଚଳିତ ବିଶ୍ବକପରେ 2ୟ ହ୍ୟାଟ୍ରିକ୍ ସଫଳାତା ପାଇଥିଲେ । ଅନ୍ୟପଟେ 243ରନର ସହଜ ବିଜୟ ଲକ୍ଷ୍ୟକୁ ପିଛା କରି ମାତ୍ର 157ରନରେ ଅଲଆଉଟ୍ ହୋଇଯାଇଥିଲା କଙ୍ଗାରୁ ପଡୋଶୀ ନ୍ୟୁଜିଲାଣ୍ଡ । ଅଷ୍ଟ୍ରେଲିଆ ୱିକେଟକିପର ବ୍ୟାଟ୍ସମ୍ୟାନ ଆଲେକ୍ସ କାରେ ପ୍ଲେୟାର ଅଫ୍ ଦି ମ୍ୟାଚ୍ ବିବେଚିତ ହୋଇଛନ୍ତି ।
ତେବେ ବିଜୟ ଲକ୍ଷ୍ୟର ପିଛା କରି କିୱି ଦଳର ଓପନିଂ ଯୋଡି ଫେଲ ମାରିଥିଲେ । ସେହିପରି ଅଧିନାୟକ କେନ୍ ଓ୍ବିଲିୟମସନ ସର୍ବାଧିକ ମାତ୍ର 40 ରନ କରିଥିଲେ । ଏଥିସହିତ ଅଭିଜ୍ଞ ରସ ଟେଲର 30, ମାର୍ଟିନ ଗୁପ୍ଟିଲ 20, ୱିକେଟକିପର ବ୍ୟାଟ୍ସମ୍ୟାନ ଟମ୍ ଲାଥମ 14 ରନ କରି ଆଉଟ ହୋଇଥିବାବେଳେ ଅନ୍ୟମାନେ ଦୁଇଅଙ୍କ ସ୍ପର୍ଶ କରିପାରି ନ ଥିଲେ । ତେବେ ଅଷ୍ଟ୍ରେଲିଆ ତରଫରୁ ମିଚେଲ ଷ୍ଟାର୍କ ସର୍ବାଧିକ 5 ୱିକେଟ୍ ଅକ୍ତିଆର କରିଛନ୍ତି ।
ସେହିପରି ପ୍ରଥମେ ବ୍ୟାଟିଂ କରିଥିବା ଅଷ୍ଟ୍ରେଲିଆ ତରଫରୁ ଉସ୍ମାନ ଖ୍ବାଜା ସର୍ବାଧିକ 88 ଓ ଆଲେକ୍ସ କାରେ 71 ରନ କରିଥିଲେ । ଅନ୍ୟପଟେ ଓ୍ବାର୍ନର (16), ଫିଞ୍ଚ୍ (8), ମାର୍କସ ଷ୍ଟୋଇନିସ (21), ପ୍ୟାଟ କୁମିନ୍ସ 23 ରନ କରି ଅପରାଜିତ ରହିଥିଲେ ।
