ହାଇଦ୍ରାବାଦ: ମାନବିକତାର ମହାନ ସୁଗନ୍ଧ ସର୍ବତ୍ର ବ୍ୟାପିଥାଏ । ଏଇ ଯେମିତି ଶହ ଶହ କିଲୋମିଟର ଦୂରରେ ଥିବା ପୂର୍ବତନ ଭାରତୀୟ କ୍ରିକେଟର ଭିଭିଏସ ଲକ୍ଷ୍ମଣଙ୍କ ଟ୍ବିଟ୍ରେ ସ୍ଥାନ ପାଇଛନ୍ତି କଟକର ଜଣେ ୫୦ ବର୍ଷୀୟ ବ୍ୟକ୍ତି । ଏହି ବ୍ୟକ୍ତିଙ୍କ ନିସ୍ବାର୍ଥପର ସେବା ଲକ୍ଷ୍ମଣଙ୍କ ମନକୁ ଆନ୍ଦୋଳିତ କରିଛି । କଟକ ଜିଲ୍ଲାର ୫୦ ବର୍ଷୀୟ ଏହି ବ୍ୟକ୍ତି ହେଉଛନ୍ତି ଅଭିମନ୍ୟୁ ଦାସ । ସ୍ବାର୍ଥବାଦୀ ସମାଜରେ ଅଭିମନ୍ୟୁ ପାଲଟିଛନ୍ତି ମାନବିକତାର ଅନନ୍ୟ ନିଦର୍ଶନ ଯାହା ଲକ୍ଷ୍ମଣଙ୍କୁ ପ୍ରଂଶସା କରିବାକୁ ବାଧ୍ୟ କରିଛି ।
ଟ୍ବିଟ୍ରେ କିମ୍ବଦନ୍ତୀ କ୍ରିକେଟର ଲକ୍ଷ୍ମଣ ଲେଖିଛନ୍ତି, "ଅଭିମନ୍ୟୁ ଦାସ, କଟକର ଜଣେ ୫୦ ବର୍ଷୀୟ ବୁକ୍ ବାଇଣ୍ଡ୍ର, ମୃତ ଦେହକୁ ସମ୍ମାନ ଜଣାନ୍ତି, ଅନାବଶ୍ୟକ ଏବଂ ଅବହେଳିତ ମୃତ ଶରୀରକୁ ନିଜେ ଶେଷକୃତ୍ୟ କରନ୍ତି । ସେ ମଧ୍ୟ ହଜାର ହଜାର କ୍ୟାନସର ରୋଗୀଙ୍କ ସେବା କରନ୍ତି, ସେମାନଙ୍କ ମଧ୍ୟରୁ ଅଧିକାଂଶ ଭୂମିହୀନ ଓ ପରିତ୍ୟକ୍ତ । ତାଙ୍କର ଏହି ନିସ୍ବାର୍ଥପର ସେବା ପାଇଁ ସଲାମ୍ ।"
ସୂଚନା ଅନୁଯାୟୀ, ମୃତଦେହକୁ ସମ୍ମାନ ଜଣାଉଥିବା ଅଭିମନ୍ୟୁ ଦାସ୍ ପୁସ୍ତକ ବନ୍ଧେଇ କାମ କରନ୍ତି । ଟିକିଏ ଫୁରସତ୍ ମିଳିଲେ ଦୁନିଆ ଆଖିରେ ଅଦରକାରୀ, ଅଲୋଡା ପାଲଟିଥିବା ମୃତ୍ୟୁ ପରେ ବି ସମ୍ମାନ ଅପେକ୍ଷାରେ ଥିବା ମରଶରୀରକୁ ସେ ଆଦର ସହକାରେ ଶେଷକୃତ୍ୟ କରନ୍ତି ।
ବଞ୍ଚିଥିବାବେଳେ ଜଣେ ମଣିଷକୁ ପରିବାର ପ୍ରିୟଜନଙ୍କ ସାଥ୍ ଓ ସମ୍ମାନ ମିଳେ, ମୃତ୍ୟୁବେଳେ ଆତ୍ମୀୟ ଆଦର ସହକାରେ ଶେଷକୃତ୍ୟ କରନ୍ତି । ତେବେ ସମସ୍ତଙ୍କ ଭାଗ୍ୟରେ ଏହା ନଥାଏ । ସମାଜରେ ଅନେକଜଣ ଅଛନ୍ତି ଯେଉଁମାନଙ୍କ ଏଥିରୁ ବଞ୍ଚିତ ହୋଇଥାନ୍ତି । ସେମାନଙ୍କୁ ଶେଷକାର୍ଯ୍ୟରେ ସାହା ହୁଅନ୍ତି ଅଭିମନ୍ୟୁ । କେବଳ ସେତିକି ନୁହେଁ ହଜାର ହଜାର କ୍ୟାନସର୍ ପୀଡିତ ରୋଗୀଙ୍କୁ ମଧ୍ୟ ସେବା କରନ୍ତି ।
ତେବେ ଅଭିମନ୍ୟୁଙ୍କ ଏହି ନିସ୍ବାର୍ଥପର ସେବା ପଛରେ ଏକ ଦୁଃଖଦ ସତ ରହିଛି । କୁହାଯାଏ, ନିଜର ମାଆଙ୍କ ସମେତ ପରିବାରର ୪ ଜଣ ସଦସ୍ୟଙ୍କୁ ସେ ହରାଇଛନ୍ତି, କ୍ୟାନସର୍ ତାଙ୍କର ସାରା ପରିବାର ଉଜାଡି ଦେଇଛି । ସେ ନିୟମିତ କଟକ ଆଚାର୍ଯ୍ୟ ହରିହର ଆଞ୍ଚଳିକ କ୍ୟାନସର ସେଣ୍ଟରକୁ ଯାଆନ୍ତି ଓ ଏଯାବତ ପ୍ରାୟ ୭,୦୦୦ କ୍ୟାନସର ରୋଗୀଙ୍କୁ ସେବା ଯୋଗାଇଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
