ନୂଆଦିଲ୍ଲୀ: ଭାରତୀୟ ସଟଲର କିଦାମ୍ବୀ ଶ୍ରୀକାନ୍ତ ଓ ପରୁପଲ୍ଲୀ କଶ୍ୟପ ଚଳିତ ଇଣ୍ଡିଆ ଓପନ୍ ବ୍ୟାଡମିଣ୍ଟନ ଟୁର୍ଣ୍ଣାମେଣ୍ଟର ସେମିଫାଇନାଲରେ ପହଁଚିଛନ୍ତି । ଶୁକ୍ରବାର ଖେଳାଯାଇଥିବା କ୍ୱାର୍ଟରଫାଇନାଲରେ ଶ୍ରୀକାନ୍ତ ନିଜ ଦେଶର ବି. ସାଇ ପ୍ରଣୀତଙ୍କୁ ୨୧-୨୩, ୨୧-୧୧, ୨୧-୧୯ ଗେମରେ ପରାସ୍ତ କରିଛନ୍ତି । ସେହିପରି କଶ୍ୟପ ଚାଇନିଜ ତାଇପେଇର ୱାଙ୍ଗ ଜୁ ୱେଇଙ୍କୁ ସିଧାସଳଖ ୨୧-୧୬, ୨୧-୧୧ ଗେମରେ ହରାଇ ଅନ୍ତିମ-୪ରେ ସ୍ଥାନ ପକ୍କା କରିଛନ୍ତି।
ଶ୍ରୀକାନ୍ତ ନିଜର ଶେଷ ୯ ଟୁର୍ଣ୍ଣାମେଣ୍ଟରେ ୮ଥର କ୍ୱାର୍ଟରଫାଇନାଲ ମୁକାବିଲା ଜିତିଛନ୍ତି ।ସେହିପରି ଭାରତର ଅନ୍ୟତମ ତାରକା ଏଚଏସ ପ୍ରଣୟ କ୍ୱାର୍ଟରଫାଇନାଲରେ ଡେନମାର୍କର ଭିକ୍ଟର ଆକ୍ସେଲସେନଙ୍କଠାରୁ ୧୦-୨୧, ୧୬-୨୧ ଗେମରେ ହାରି ବିଦାୟ ନେଇଛନ୍ତି। ସେମିରେ ଶ୍ରୀକାନ୍ତଙ୍କ ସାମ୍ନା ଜୁଜିଆଙ୍ଗ ହୁଆଙ୍କ ସହ ଏବଂ କଶ୍ୟପଙ୍କ ସାମ୍ନା ଭିକ୍ଟରଙ୍କ ସହ ହେବ ।
