ହାଇଦ୍ରାବାଦ: ଇଟିଭି ଭାରତରେ ଭାରତର ଯୁବ ବ୍ୟାଡମିଣ୍ଟନ ଷ୍ଟାର ଚିରାଗ ସେଟ୍ଟି । ମହମାରୀ କୋରୋନା ଭାଇରସ ଲକଡାଉନ ସମୟରେ ମୁମ୍ବାଇର ସ୍ଥିତି, ଟୋକିଓ ଅଲମ୍ପିକ ସମେତ ପୁରୁଷ ଡବଲ୍ସ ପାର୍ଟନର ସାତ୍ତିକ ସାଇରାଜ ରେଙ୍କିରେଡ୍ଡିଙ୍କୁ ନେଇ ପ୍ରତିକ୍ରିୟା ରଖିଛନ୍ତି ।
ଲକଡାଉନରେ କେମିତି ସମୟ କଟୁଛି ଚିରାଗ...?
ଚିରାଗ କହିଛନ୍ତି "ମୁମ୍ବାଇରେ ସକାଳ 6.00ରୁ 7.00 ଗୋଟିଏ ଘଣ୍ଟାର ଅଭ୍ୟାସ ସେସନ ରହିଛି । ଏହି ସମୟରେ ଯୋଗ ଅଭ୍ୟାସ ସହ ଅନ୍ୟ ଅଭ୍ୟାସ ମଧ୍ୟ କରୁଛୁ । ସନ୍ଧ୍ୟାରେ ମଧ୍ୟ ସମାନ ଭାବେ 4.00ରେ 5.00ଟା ପର୍ଯ୍ୟନ୍ତ ଅଭ୍ୟାସ ସମୟ ରହିଛି ।"
ଘରେ ରହି ଅଭ୍ୟାସ ଜାରି ରଖିବା କେବେ କଷ୍ଟକର ?
22 ବର୍ଷିୟ ସର୍ଟଲର ଚିରାଗ କହିଛନ୍ତି "ବହୁତ କଷ୍ଟ, ଅଧିକ ସମୟ ବାହାରେ ରହିବାର ଅଭ୍ୟାସ ହୋଇଯାଇଛି । ଟୁର୍ଣ୍ଣାମେଣ୍ଟ ସବୁ ବାହାରେ ହେଉଥିବାରୁ ଯାତ୍ରା ମଧଅୟ କରିବାକୁ ପଡେ । ଏବେ 2ମାସରୁ ଅଧିକ ସମୟ ହୋଇଗଲାଣି ତ ବହୁତ କଷ୍ଟ । ତେବେ ଏପରି ସମୟରେ ଅନ୍ୟ ବିକଳ୍ପ ମଧ୍ୟ ନାହିଁ । ସବୁ ଲୋକ ସମାନ ଅସୁବିଧାର ସାମ୍ନା କରୁଛନ୍ତି । ଖୁବଶୀଘ୍ର ସବୁକିଛି ଠିକ୍ ହୋଇଯିବ ବୋଲି ଆଶା ।"
ବ୍ୟାଡମିଣ୍ଟନକୁ କ୍ୟାରିୟର କରିବା ନେଇ କେବେ ଭାବିଲେ ?
2018 କମନୱେଲ୍ଥ ଗେମ୍ସରେ ଡବଲ୍ସ ଇଭେଣ୍ଟରେ ରୌପ୍ୟ ପଦକ ଜିତିସାରିଥିବା ଚିରାଗ ଉତ୍ତରରେ କହିଛନ୍ତି, " ବ୍ୟାଡମିଣ୍ଟନ ପ୍ରଥମରୁ ପସନ୍ଦର ଖେଳ ଭାବେ ରହିଥିଲା । ତେବେ 16 ବର୍ଷର ଥିବାବେଳେ, ଭାବିନେଇଥିଲେ କି ସର୍ଟଲର ହେବି ଓ ବ୍ୟାଡମିଣ୍ଟନରେ ହିଁ କ୍ୟାରିୟର ଗଢିବି ।"
ଅଲମ୍ପିକ ଯୋଗ୍ୟତା ହାସଲ ଅପେକ୍ଷାକୁ ନେଇ କଣ ଭାବୁଛନ୍ତି ?
ପୁରୁଷ ବ୍ୟାଡମିଣ୍ଟନ ଡବଲ୍ସ ଅଲମ୍ପିକ୍ସ ଇେଭେଣ୍ଟରେ ଭାରତର ବଡ ଆଶା ଚିରାଗ ସେଟ୍ଟି କହିଛନ୍ତି, " ଅଲମ୍ପିକ୍ସକୁ ନେଇ ନିରାଶ ଥିଲୁ । କୋରୋନା ଭାଇରସ ଲକଡାଉନ ପୂର୍ବରୁ ପ୍ରଦର୍ଶନ ଭଲ ରହିଥିଲା । ଅଲମ୍ପିକ ଯୋଗ୍ୟତା ହାସଲ କରିବାକୁ କମ ସମୟ ରହିଥିଲା । ମାତ୍ର କୋରୋନା ଭାଇରସ ଯୋଗୁଁ ସବୁ ଇଭେଣ୍ଟ ବନ୍ଦ ହୋଇଥିଲା । ସମଗ୍ର ବିଶ୍ବ ଏଥିରେ ପ୍ରଭାବିତ ହୋଇଛି । ବର୍ତ୍ତମାନ ବିଶ୍ବ ବ୍ୟାଡମିଣ୍ଟନ ଫେଡେରେସନ ଅଲମ୍ପିକ ଯୋଗ୍ୟତା ହାସଲ ପାଇଁ ନୂଆ ନିୟମ ନେଇଆସିଛି । ତେବେ ନୂଆ ନିୟମ ଅନୁଯାୟୀ ମଧ୍ୟ ଯୋଗ୍ୟତା ହାସଲ ପାଇଁ ଲକ୍ଷ୍ୟ ରହିଛି । ତେବେ ଯୋଗ୍ୟତା ହାସଲ ନେଇ ଅଧିକ ଚିନ୍ତା କରୁନାହୁଁ, ଆମେ କେବଳ ମ୍ୟାଚ ରେ ଶତପ୍ରତିଶତ ପ୍ରଦର୍ଶନ ଉପରେ ଧ୍ୟାନ ଦେବାକୁ ଲକ୍ଷ୍ୟ ରଖିଛୁ ।"
ବ୍ୟୁରୋ ରିପୋର୍ଟ, ଇଟିଭି ଭାରତ
