ଭୁବନେଶ୍ବର: ଆସନ୍ତା ବାହୁଡାରେ ରୂପେଲି ପରଦାକୁ ଆସିବ ଆଉ ଏକ ଭିନ୍ନ ଧରଣର ଓଡ଼ିଆ ଚଳଚ୍ଚିତ୍ର 'ବୈଶାଳୀ' । ଶୁକ୍ରବାର ଏକ ରଙ୍ଗାରଙ୍ଗ ଉତ୍ସବରେ ଏହି ଚଳଚ୍ଚିତ୍ରର ସଙ୍ଗୀତ ଶୁଭ ଉନ୍ମୋଚନ ହୋଇଥିଲା ।
ନୂଆ କରି ଓଲିଉଡ ଇଣ୍ଡଷ୍ଟ୍ରୀରେ ପ୍ରଯୋଜନା ଭାର ସାମ୍ଭାଳିଥିବା ସୁଧୀର ଜୈନଙ୍କ ବୈଶାଳୀ ଫିଲ୍ମସ ବ୍ୟାନରରେ ନିର୍ମିତ ହେଉଛି ଓଡ଼ିଆ ମୌଳିକ କଥା ବସ୍ତୁକୁ ନେଇ ଚଳଚ୍ଚିତ୍ର 'ବୈଶାଳୀ'। ଯାହାର ନିର୍ଦ୍ଦେଶନାର ଦାୟିତ୍ବ ସୁନାମ ଧନ୍ୟ ନିର୍ଦ୍ଦେଶକ ଆଶୁତୋଷ ଦାସ ସମ୍ଭାଳିଥିବା ବେଳେ ଏହାର ସଙ୍ଗୀତକୁ ସୁମଧୁର କରିଛନ୍ତି ବିଶିଷ୍ଟ ସଙ୍ଗୀତ ନିର୍ଦ୍ଦେଶକ ଅଭିଜିତ ମଜୁମଦାର ।
ନିର୍ମଳ ନାୟକ ଓ ଅରୁଣ ମନ୍ତ୍ରୀଙ୍କ ଦ୍ବାରା ରଚିତ ଗୀତକୁ ଓଡ଼ିଶାର ସୁନାମଧନ୍ୟ କଣ୍ଠଶିଳ୍ପୀ ହ୍ୟୁମାନ ସାଗର, ମଣ୍ଟୁ ଛୁରିଆ, ଦୀପ୍ତିରେଖା, ସହିନୀ ଓ ଅମରିତା ଗାଇଥିବା ବେଳେ ବଲିଉଡର ସୁନାମଧନ୍ୟ କଣ୍ଠଶିଳ୍ପୀ ଉଦିତ ନାରାୟଣ ଏବଂ ପାମେଲା ଜୈନ ମଧ୍ୟ ଚଳଚ୍ଚିତ୍ରର ଗୀତରେ କଣ୍ଠ ଦାନ କରିଛନ୍ତି ।
ଆସନ୍ତା ବାହୁଡା ଅବସରରେ ରୂପେଲି ପରଦାରେ ଶୁଭମୁକ୍ତି ଅପେକ୍ଷାରେ ଥିବା ଏହି ଚଳଚ୍ଚିତ୍ରରେ ଭାର୍ସାଟାଇଲ କଳାକାର ବିଜୟ ମହାନ୍ତି, ଅପରାଜିତା ମହାନ୍ତି, ପ୍ରତିଭା ପଣ୍ଡା, ଗୁଡିଲି ପ୍ରମୁଖ ଅଭିନୟ କରିଥିବାର ଦେଖାଯିବେ । ଏହି ଚଳଚ୍ଚିତ୍ର ମାଧ୍ୟମରେ ଓଡ଼ିଆ ଇଣ୍ଡଷ୍ଟ୍ରୀରେ ପାଦ ଥାପିବାକୁ ଯାଉଛନ୍ତି ପ୍ରୀତ ଜୈନ ଓ ସୁମନ ପ୍ରିୟା ।
ଚଳଚ୍ଚିତ୍ରର ସୁଟିଂ ଓଡିଶା ବ୍ୟତୀତ ରାଜସ୍ଥାନ ଓ ଲଦାଖର ବିଭିନ୍ନ ମନୋରମ ସ୍ଥାନରେ ହୋଇଛି । 'ବୈଶାଳୀ'ର କାହାଣୀ ଓ ଗୀତ ଦର୍ଶକଙ୍କୁ ମନକୁ ଛୁଇଁ ପାରିବ ବୋଲି ଆଶା ରଖିଛନ୍ତି ଏହାର ପ୍ରଯୋଜକ ସୁଧୀର ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
