ମୁମ୍ବାଇ: କୋରୋନା କାଳରେ ସେଲିବ୍ରିଟିଙ୍କ ଆତ୍ମହତ୍ୟା ଖବର ସବୁଦିନ ସାମ୍ନାକୁ ଆସୁଛି । 2020 ସାଜିଛି କଳା ଜଗତ ପାଇଁ କାଳ । କାରଣ ଏବର୍ଷ ଚାଲିଗଲାଣି ଅନେକ କଳାକାରଙ୍କ ଜୀବନ । ଗୁରୁବାର ଫେମସ ଟିଭି ଆକ୍ଟର ସମୀର ଶର୍ମା ଆତ୍ମହତ୍ୟା କରିଥିବା ଖବର ଚର୍ଚ୍ଚାର ବିଷୟ ପାଲଟିଥିବା ବେଳେ ଆଜି ଆଉ ଜଣେ ଅଭିନେତ୍ରୀ ଆତ୍ମହତ୍ୟା କରି ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଛନ୍ତି । ଭୋଜପୁରୀ ଅଭିନେତ୍ରୀ ଅନୁପମା ପାଠକ ମୁମ୍ବାଇ ସ୍ଥିତ ନିଜ ନିବାସରେ ଫାଶି ଲଗାଇ ଆତ୍ମହତ୍ୟା କରିଛନ୍ତି । 40 ବର୍ଷୀୟ ଅନୁପମା ଗତ 2 ତାରିଖରେ ଆତ୍ମହତ୍ୟା କରିଥିଲେ । ବର୍ତ୍ତମାନ ମୁମ୍ବାଇ ପୋଲିସ ଅଭିଯୋଗ ଦାଖଲ କରି ତାଙ୍କ ଆତ୍ମହତ୍ୟାରେ ତଦନ୍ତ ଆରମ୍ଭ କରିଛି ।
ହେଲେ ଆତ୍ମହତ୍ୟା ପୂର୍ବରୁ ସେ ଫେସବୁକରେ ନିଜ ପରିସ୍ଥିତି ବିଷୟରେ 10 ମିନିଟର ଏକ ଭିଡିଓରେ ଜଣାଇଥିଲେ । ସେ ଭିଡିଓରେ ଲୋକଙ୍କୁ ଅନୁରୋଧ କରି କହିଛନ୍ତି, ‘ଜୀବନରେ କେବେ କାହା ଉପରେ ଭରସା କରିବ ନାହିଁ । କାରଣ ସଚ୍ଚୋଟ ଲୋକଙ୍କ ଫାଇଦା ସବୁବେଳେ ଉଠାନ୍ତି ଲୋକେ। ମୁଁ ମୋ ଜୀବନରେ ଗୋଟିଏ ଜିନିଷ ଶିଖିଛି ଯେ ଲୋକ ବହୁତ ସ୍ବାର୍ଥୀ ଓ ଅନ୍ୟଙ୍କ ଚିନ୍ତା କେବେ କରନ୍ତି ନାହିଁ।’
ପ୍ରକାଶ ଥାଉକି ଅନୁପମା ବିହାରର ପୂର୍ଣ୍ଣିୟା ଜିଲ୍ଲା ନିବାସୀ । କାମ ପାଇଁ ସେ ମୁମ୍ବାଇରେ ରହୁଥିଲେ । ସେ ଭୋଜପୁରୀ ଫିଲ୍ମ ବ୍ୟତୀତ କିଛି ଟିଭି ସିରିୟଲରେ ମଧ୍ୟ କାମ କରିଥିଲେ ।
