ମୁମ୍ବାଇ: ‘ବାଗି’ ଫ୍ରାଞ୍ଚାଇଜର ଦୁଇଟି ଫିଲ୍ମ ହିଟ୍ ହେଲା ପରେ ଏବେ ମେକର୍ସ ପ୍ରସ୍ତୁତ ହୋଇସାରିଲେଣି ଏହାର ତୃତୀୟ ସଂସ୍କରଣ ଫିଲ୍ମ ‘ବାଗୀ 3’ନିର୍ମାଣ କରିବାକୁ । ଯେଉଁଥିରେ ଆକ୍ସନ ହିରୋ ଟାଇଗର ଶ୍ରଫ, ରିତେଶ ଦେଶମୁଖ ଓ ସୁନ୍ଦରୀ ଶ୍ରଦ୍ଧା କପୁରଙ୍କୁ ଦେଖିବାକୁ ମିଳିବ । ଲେଖକ ତଥା ନିର୍ଦ୍ଦେଶକ ଫରହାଦ ସାମଜୀ ଫିଲ୍ମରେ ଦୁଇ ମୁଖ୍ୟ ଅଭିନେତାଙ୍କ ନାମ ରାମ ଲକ୍ଷଣ ରଖିଛନ୍ତି ।
ଏକ ସାକ୍ଷାତକାରରେ ଫରହାଦ ଜଣାଇଛନ୍ତି ଯେ ‘ବାଗୀ 3’ କିପରି ଆକ୍ସନ ଥ୍ରିଲର ଫିଲ୍ମ ହେବାକୁ ଯାଉଛି । ରିତେଶଙ୍କ ବିଷୟରେ ଆଲୋଚନା କରି ଫରହାଦ କହିଥିଲେ ଯେ ରିତେଶ ସବୁବେଳେ ନିଜ କମେଡି ଅଭିନୟ ପାଇଁ ଚର୍ଚ୍ଚିତ। ‘ଏକ ଭିଲେନ’ ଫିଲ୍ମରେ ଦର୍ଶକ ତାଙ୍କ ସାଇକୋ ଭୂମିକାକୁ ମଧ୍ୟ ଖୁବ୍ ଏନଜୟ କରିଥିଲେ।
‘ବାଗୀ’ ଫ୍ରାଞ୍ଚାଇଜର ପୂର୍ବ ଦୁଇଟି ଫିଲ୍ମ ଅପେକ୍ଷା ‘ବାଗୀ 3’ରେ ଦର୍ଶକ କମେଡିର ମଧ୍ୟ ଖୋରାକ ପାଇବେ । ଯାହା ଦର୍ଶକଙ୍କ ସାମ୍ନାକୁ ଆଣିବେ ରିତେଶ । କିନ୍ତୁ ଫିଲ୍ମର ଗୋଟିଏ ଘଟଣା ପରେ ରିତେଶଙ୍କ ଆକ୍ସନ ଅବତାର ଦେଖିବାକୁ ମିଳିବ । ରିତେଶ ଓ ଟାଇଗର ଆମ ଫିଲ୍ମର ରାମ, ଲକ୍ଷଣ ପରି ବୋଲି କହିଥିଲେ ଫରହାଦ।
ପ୍ରକାଶ ଥାଉକି ଆସନ୍ତା ମାସରେ ‘ବାଗୀ 3’ର ସୁଟିଂ ଆରମ୍ଭ କରିବେ ମେକର୍ସ । ଅନ୍ୟପଟେ ଅକ୍ଟୋବର 26ରେ ରିଲିଜ ହେବାକୁ ଯାଉଛି ଫରହାଦଙ୍କ ନିର୍ଦ୍ଦେଶିତ କମେଡି ଫିଲ୍ମ ‘ହାଉସଫୁଲ 4’।
