ମୁମ୍ବାଇ: ସୁପରଷ୍ଟାର ସଲମାନ ଖାନଙ୍କ ରିୟାଲିଟି ଶୋ ବିଗ ବସ 13ରେ ଦର୍ଶକ ସବୁବେଳେ ଟ୍ବିଷ୍ଟ ଦେଖିବାକୁ ପାଉଛନ୍ତି । ବିଗ ବସ ହାଉସରେ ସବୁ ପ୍ରତିଯୋଗୀଙ୍କ ମୁଣ୍ଡ ଉପରେ ଏଲିମିନେସନ ଖଣ୍ଡା ଝୁଲୁଥିବାର ନଜର ଆସୁଛି । ସେହିଠାରେ ଏଥର ଏଲିମିନେସନ ଏପିସୋଡ ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଛି । ନିକଟରେ ବଜରଦସ୍ତ ଏଣ୍ଟ୍ରି କରିଥିବା ୱାଇଲ୍ଡ କାର୍ଡ ପ୍ରତିଯୋଗୀ ତହସୀନ ପୁନାୱାଲା ମାତ୍ର ଗୋଟିଏ ସପ୍ତାହ ମଧ୍ୟରେ ଶୋରୁ ଏଲିମିନେଟ ହୋଇଯାଇଛନ୍ତି । ଯାହା ପ୍ରତିଯୋଗୀଙ୍କ ସହ ଦର୍ଶକଙ୍କୁ ମଧ୍ୟ ହଜମ ହେଉନାହିଁ।
ତହସୀନ ବିଗ ବସ ହାଉସରୁ ଏତେ ଶୀଘ୍ର ବାହାରି ଯିବା ଫ୍ୟାନ୍ସଙ୍କୁ ଝଟକା ଲାଗିଛି । ସେ ବିଗ ବସ ଘରେ ଦମଦାର ଏଣ୍ଟ୍ରି କରିଥିଲେ । ଆଉ ତାଙ୍କ ଗୋଟିଏ ସପ୍ତାହର ଖେଳକୁ ଦେଖି ଏମିତି ଲାଗୁଥିଲା ଯେ ସେ ଦୀର୍ଘସମୟ ପର୍ଯ୍ୟନ୍ତ ଘରେ ତିଷ୍ଠି ରହିବେ। ସେ ବିଗ ବସ ହାଉସରୁ ବାହାରିକୁ ନେଇ ସୋସିଆଲ ମିଡିଆରେ ମେକର୍ସଙ୍କ ଉପରେ ପ୍ରଶ୍ନ ଉଠାଇବାରେ ଲାଗିଛନ୍ତି ଦର୍ଶକ।
ପ୍ରକାଶ ଥାଉକି ବିଗ ବସ ହାଉସରୁ ତହସୀନଙ୍କ ଯାତ୍ରା ଦର୍ଶକଙ୍କ କମ ଭୋଟ ଦ୍ବାରା ନୁହେଁ ବରଂ ରାଜନୈତିକ କାରଣ ପାଇଁ ଶେଷ ହୋଇଛି । ଶୋର ଆୟୋଜକଙ୍କୁ ତାଙ୍କ ଓକିଲଙ୍କ ଫୋନ ଆସିଥିଲା । ଆଉ ତାଙ୍କୁ ରାଜନୈତିକ ଏବଂ ଆଇନ କାରଣ ପାଇଁ ଶୋରୁ ବାହାର କରିବାକୁ ଅନୁରୋଧ କରାଯାଇଥିଲା। ଏହି କାରଣ ପାଇଁ ତହସୀନଙ୍କୁ ଶୋରୁ ଏଲିମିନେଟ କରାଯାଇଛି।
ଏହି ମାମଲା ଉପରେ ଏଯାବତ ତହସୀନଙ୍କ କୌଣସି ପ୍ରତିକ୍ରିୟା ସାମ୍ନାକୁ ଆସିନାହିଁ । କିନ୍ତୁ ଶୁଣିବାକୁ ମିଳୁଛି ଯେ ତହସୀନଙ୍କ ପକ୍ଷରୁ ଏହି ମାମଲା ଉପରେ ଖୁବଶୀଘ୍ର ଷ୍ଟେଟମେଣ୍ଟ ଜାରି ହୋଇପାରେ । ଅନ୍ୟପଟେ ତାଙ୍କ ପତ୍ନୀ ମୋନିକା ୱାଡ୍ରା ଇନଷ୍ଟାଗ୍ରାମରେ ଏକ ଷ୍ଟୋରୀ ସେୟାର କରି ତହସୀନଙ୍କ ବିଗ ବସ ହାଉସରୁ ବାହାରିବାର କାରଣ ଜଣାଇଛନ୍ତି ।
ସେ ପୋଷ୍ଟରେ ଲେଖିଛନ୍ତି, ‘ଏତେ ପ୍ରେମ ଏବଂ ସପୋର୍ଟ ପାଇଁ ଆପଣଙ୍କୁ ଧନ୍ୟବାଦ । ଅଯୋଧ୍ୟା ମାମଲା ଏବଂ ଦେଶର ବର୍ତ୍ତମାନ ପରିସ୍ଥିତି ସହ ସମ୍ପୃକ୍ତ ଥିବା କିଛି ଲିଗାଲ, ରାଜନୈତିକ କମେଣ୍ଟମେଣ୍ଟଟ୍ସ ପାଇଁ ତହସୀନଙ୍କୁ ବିଗ ବସ ହାଉସରୁ ଏଲିମିନେଟ କରାଯାଇଛି। ’
