ମୁମ୍ବାଇ: ଧାରା 370ର ବିଭିନ୍ନ ଅନୁଚ୍ଛେଦ ଓ 35 (ଏ)ର ଉଚ୍ଛେଦ ପାଇଁ ରାଜ୍ୟସଭାରେ ଆଗତ ପ୍ରସ୍ତାବ ଆଗତ ହେବା ଏ ସମ୍ପର୍କରେ ପ୍ରତିକ୍ରିୟା ରଖିଛନ୍ତି ବି-ଟାଉନ ସେଲିବ୍ରିଟି । ଅଭିନେତ୍ରୀ ରବୀନା ଟଣ୍ଡନଙ୍କ ଠାରୁ ଆରମ୍ଭ କରି ଲୋକପ୍ରିୟ ଲେଖକ ଓ ଖେଳାଳୀ ଟ୍ବିଟର ଆକାଉଣ୍ଟ ମାଧ୍ୟମରେ ନିଜର ପ୍ରତିକ୍ରିୟା ରଖିଛନ୍ତି।
ଅଭିନେତ୍ରୀ ରବୀନା ଟଣ୍ଡନ ଜାତୀୟ ପତକାର ଫଟୋ ସେୟାର କରି ପ୍ରତିକ୍ରିୟା ଦେଇଥିବା ବେଳେ କୁସ୍ତି ଚାମ୍ପିଆନ ବବିତା ଫୋଗାଟ ଟ୍ବିଟରରେ ଲେଖିଛନ୍ତି, ‘‘ଦେଶର ସ୍ବାଧୀନତା ଦେଖିବାକୁ ମତେ ସୌଭାଗ୍ୟ ମିଳିନଥିଲା, କଶ୍ମୀରକୁ 370 ଓ 35 (ଏ) ମୁକ୍ତି ମିଳିଥିବାର ଦେଖିବା ମୋର ପରମ ସୌଭାଗ୍ୟ ହେବ। ଭାରତ ମାତା କି ଜୟ । ’’
ଅନ୍ୟପଟେ ଲେଖକ ଚେତନ ଭଗତ ଲେଖିଛନ୍ତି, ‘‘ପରିଶେଷରେ 2019 ଅଗଷ୍ଟ 5ରେ କଶ୍ମୀର ମୁକ୍ତି ହେଲା । ସ୍ବାଧୀନତାରେ ବଢ ଆଉ ସ୍ବାଧୀନତାରେ ଭବିଷ୍ୟ ଗଢ ।’’ ଖାଲି ଏତିକି ନୁହେଁ ଚେତନ ଏପରି ତିନୋଟି ଟ୍ବିଟ କରି ନିଜ ଖୁସି ଜାହିର କରିଛନ୍ତି । ଫିଲ୍ମ ନିର୍ମାତା କୁନାଲ କୋହଲି ଲେଖିଛନ୍ତି, ‘‘ଆମ ଆଖି ସାମ୍ନାରେ ନୂଆ ଇତିହାସ ଲେଖାହେଲା ।’’
ସେହିପରି କଙ୍ଗନା ରଣାୱତଙ୍କ ଭଉଣୀ ରଙ୍ଗୋଲୀ ଚାନ୍ଦେଲ ମଧ୍ୟ ଟ୍ବିଟରରେ ଲେଖିଛନ୍ତି, ‘‘ଏହାକୁ କୁହନ୍ତି ସରକାର ବାଃ । ନରେନ୍ଦ୍ର ମୋଦିଙ୍କ ନାମ ଭାରତ ଇତିହାସରେ ସ୍ବର୍ଣ୍ଣ ଶବ୍ଦରେ ଲେଖାଯିବ । ’’ ଅନ୍ୟପଟେ ଅଭିନେତ୍ରୀ ପାୟଲ ରୋହତ୍ୟାଗି ମଧ୍ୟ ଏହି ପ୍ରସଙ୍ଗରେ ନିଜର ଏକ ଭିଡିଓ ସେୟାର କରି ସବୁ ଭାରତବାସୀଙ୍କ ସହ ଭାରତ ସରକାରଙ୍କୁ ଧନ୍ୟବାଦ ଜଣାଇଛନ୍ତି ।
