ମୁମ୍ବାଇ: ଭାଲେଣ୍ଟାଇନ ଡେ' ଅବସରରେ ରିଲିଜ ହେବାକୁ ଯାଉଛି ରଣବୀର ସିଂହ ଓ ଆଲିୟା ଭଟ୍ଟଙ୍କ ଫିଲ୍ମ 'ଗଲି ବୟ' । କିନ୍ତୁ ରିଲିଜର ମାତ୍ର ଗୋଟିଏ ଦିନ ପୂର୍ବରୁ ଏମତି କିଛି ବଡ ଖବର ସାମନାକୁ ଆସିଛି, ଯାହା ଶୁଣି ପ୍ରଶଂସକ ନିରାଶ ହୋଇପାରନ୍ତି । କାରଣ ସେନ୍ସର ବୋର୍ଡ ଫିଲ୍ମରେ ଥିବା ରଣବୀର ଓ ଆଲିୟାଙ୍କ 13ସେକେଣ୍ଡର କିସିଂ ସିନକୁ କାଟିବାକୁ ଆଦେଶ ଦେଇଛନ୍ତି ।
ତେବେ ଗତ କିଛିଦିନ ହେବ ରଣବୀର ଓ ଆଲିୟାଙ୍କର ଏହି ଲିପ ଲକ ଦେଖିବାକୁ ଦର୍ଶକଙ୍କ ମଧ୍ୟରେ ଉତ୍ସାହ ଦ୍ବିଗୁଣ ହୋଇଥିବାବେଳେ ଏବେ ସେନ୍ସର ବୋର୍ଡର ଏହି ଆଦେଶ ନିରାଶଜନକ ନିଶ୍ଚେ । ତେବେ ଏହା ପ୍ରଥମଥର ପାଇଁ ନୁହେଁ, ଯେଉଁଠି ସେନ୍ସର ବୋର୍ଡ ସିନ କାଟୁଛନ୍ତି । ଫିଲ୍ମ ପଦ୍ମାବତ, ଉଡତା ପଞ୍ଜାବ ଆଦି ଅନେକ ଫିଲ୍ମରୁ ମଧ୍ୟ ସିନ କାଟିବାକୁ ଆଦେଶ ପାଇଛନ୍ତି ନିର୍ମାତା ।
ପ୍ରକାଶ ଥାଉକି, ପ୍ରଥମ ଥର ପାଇଁ ବଡପରଦାରେ ଏକାଠି ନଜର ଆସୁଛନ୍ତି ରଣବୀର ସିଂହ ଓ ଆଲିୟା ଭଟ୍ଟ । କିଛିଦିନ ତଳେ ଫିଲ୍ମର ଟ୍ରେଲର ରିଲିଜ ହୋଇଥିବାବେଳେ ଉଭୟଙ୍କ ଯୋଡିକୁ ମଧ୍ୟ ଖୁବ ପସନ୍ଦ କରିଛନ୍ତି ଦର୍ଶକ । ଫିଲ୍ମର ନିର୍ଦ୍ଦେଶନା ଜୋୟା ଅଖତର ଦେଉଥିବାବେଳେ ଏବେ ଫିଲ୍ମର ଷ୍ଟାରକାଷ୍ଟ ଜୋରଦାର ଲାଗିପଡିଛନ୍ତି ଫିଲ୍ମର ପ୍ରମୋଶନରେ । ଆଲିୟା ଓ ରଣବୀରଙ୍କ ଏହି ଫିଲ୍ମଟି ବକ୍ସଅଫିସରେ ଖୁବ କମାଲ କରିବ କି ନାହିଁ ତାହା ତ କେବଳ ସମୟ ହିଁ କହିବ ।
