ମୁମ୍ବାଇ: ଚର୍ଚ୍ଚାରେ ପ୍ରିୟଙ୍କା ଚୋପ୍ରା ଓ ନିକ୍ ଜୋନସଙ୍କ ସମ୍ପର୍କ । ପ୍ରିୟଙ୍କା ତାଙ୍କ ଇନଷ୍ଟାଗ୍ରାମ ଆକାଉଣ୍ଟରୁ ତାଙ୍କ ନାମ ଆଗରୁ ସ୍ବାମୀଙ୍କ ସରନେମ ‘ଜୋନାସ୍’ କୁ ହଟାଇ ଦେଇଛନ୍ତି । ଯାହାକୁ ନେଇ ଫ୍ୟାନ୍ସଙ୍କ ମନରେ ଉଙ୍କି ମାରିଛି ଅଜବ ପ୍ରଶ୍ନ । ବଲିଉଡ ଓ ହଲିଉଡର ପପୁଲାର୍ କପଲ ପ୍ରିୟଙ୍କା ଚୋପ୍ରା-ନିକ ଜୋନାସ୍ ସମ୍ପର୍କରେ ପଡିବ କି ଫାଟ ଏ ନେଇ ଚାର୍ଚ୍ଚା ଜୋର ଧରିଛି ।
ନିକ୍ ଏବଂ ପ୍ରିୟଙ୍କାଙ୍କ ସଂପର୍କରେ ବିବାଦ ଦେଖାଦେଇଛି ବୋଲି ଅନୁମାନ କରାଯାଉଛି। ଏପରିକି ଉଭୟଙ୍କ ବିବାହ ବିଚ୍ଛେଦ ହେବାକୁ ଯାଉଛି ବୋଲି କୁହାଯାଉଛି । ପ୍ରିୟଙ୍କା ଇନଷ୍ଟା ବାୟୋରୁ ସ୍ବାମୀ ନିକ୍ ଜୋନାସଙ୍କ ସହ ତାଙ୍କ ସରନେମ ‘ଚୋପ୍ରା’ କୁ ବି ହଟାଇ ଦେଇଛନ୍ତି।
ଏ ନେଇ ଅନେକ ସୋସିଆଲ ମିଡିଆ ୟୁଜର୍ସ ଏବଂ ପ୍ରଶଂସକ ଏଥିରେ ବିରକ୍ତ ହୋଇ ଟୁଇଟ୍ କରୁଛନ୍ତି। ଜଣେ ୟୁଜର୍ସ ଲେଖିଛନ୍ତି, ‘ଏହା ହୋଇପାରିବ ନାହିଁ ଯେ ନିକ-ପ୍ରିୟଙ୍କାଙ୍କ ବ୍ରେକଅପ୍ ହୋଇଯାଇଛି। ସେହିପରି ଅନ୍ୟ ଜଣେ ୟୁଜର୍ ଲେଖିଛନ୍ତି, ‘କଣ ନିକ୍-ପ୍ରିୟଙ୍କାଙ୍କ ଛାଡପତ୍ର ହୋଇଗଲା?’ ସ୍ବାମୀଙ୍କ ନାମ ସହିତ ନିଜର ସରନେମ ମଧ୍ୟ ହଟାଇ ଦେଇଛନ୍ତି ପ୍ରିୟଙ୍କା ।
ଏ ନେଇ ପ୍ରିୟଙ୍କାଙ୍କ ଜଣେ ବନ୍ଧୁ କହିଛନ୍ତି ଉଭୟଙ୍କ ସମ୍ପର୍କକୁ ନେଇ ଉଠୁଥିବା ଗୁଜବ ମିଥ୍ୟା । ପ୍ରିୟଙ୍କା କେବଳ ତାଙ୍କ ପ୍ରଥମ ନାମ ବ୍ୟବହାର କରିଛନ୍ତି କାରଣ ସେ ତାଙ୍କ ଆଗାମୀ ପ୍ରୋଜେକ୍ଟରେ ଏହି ନାମ ବ୍ୟବହାର କରିବେ । ଏହାଛଡା ଆଉ କିଛି ସତ ନୁହେଁ । ସେ କେବଳ ଜୋନୋସଙ୍କ ନାମ ହଟାଇ ନାହାନ୍ତି ନିଜ ସରନେମ ମଧ୍ୟ ହଟାଇଛନ୍ତି ବୋଲି କହିଛନ୍ତି ପ୍ରିୟଙ୍କାଙ୍କ ବନ୍ଧୁ ।
ପ୍ରକାଶ ଥାଉ କି, ଡିସେମ୍ବର 2018 ରେ ଯୋଧପୁରର ଉମାଇଡ ଭବନ ପ୍ୟାଲେସରେ ପ୍ରିୟଙ୍କା ଏବଂ ନିକ୍ ବିବାହ କରିଥିଲେ। ପରସ୍ପରର ପରମ୍ପରାକୁ ସମ୍ମାନ ଜଣାଇ ହିନ୍ଦୁ ଏବଂ ଖ୍ରୀଷ୍ଟିଆନ ରୀତିନୀତିରେ ଏହି ଦମ୍ପତିଙ୍କ ଦୁଇଟି ବିବାହ ସମାରୋହ ହୋଇଥିଲା ।
ବ୍ୟୁରୋ ରିପୋର୍ଟ,ଇଟିଭି ଭାରତ
