ମୁମ୍ବାଇ: ବିଜନେସ ମ୍ୟାନ ରାଜ କୁନ୍ଦ୍ରାଙ୍କ କଳାଧନ୍ଦାର କୁଣ୍ଡଳୀ ଖୋଲିବାକୁ ସ୍ତ୍ରୀ ତଥା ଅଭିନେତ୍ରୀ ଶିଳ୍ପା ସେଟ୍ଟୀଙ୍କ ଘରେ ପହଁଞ୍ଚିଛି କ୍ରାଇମବ୍ରାଞ୍ଚ । ଅଶ୍ଳୀଳ ଫିଲ୍ମ ସୁଟିଂ ମାମଲାରେ ଗିରଫ ହୋଇ ପୋଲିସ ରିମାଣ୍ଡରେ ଅଛନ୍ତି ରାଜ କୁନ୍ଦ୍ରା । ଏବେ ମାମଲାର ଖୋଲତାଡ ପାଇଁ ରାଜଙ୍କୁ ସାଙ୍ଗରେ ଧରି ଶିଳ୍ପାଙ୍କ ଘରେ ପଶିଛି କ୍ରାଇମବ୍ରାଞ୍ଚ ।
ଧିରେ ଧିରେ ବଢିଚାଲିଛି ରାଜଙ୍କ ଅଡୁଆ, ଯାହା ଅଭିନେତ୍ରୀ ଶିଳ୍ପା ସେଟ୍ଟୀଙ୍କ ପାଇଁ ଚିନ୍ତାର ପାହାଡ ଛିଡା କରିଛି । ଆଉ ଏହାରି ମଧ୍ୟରେ ମୁମ୍ବାଇ କ୍ରାଇମବ୍ରାଞ୍ଚର ଟିମ ରାଜଙ୍କୁ ନେଇ ଶିଳ୍ପାଙ୍କ ଘରେ ପହଁଞ୍ଚିଛି ।
ଶୁକ୍ରବାର ରାଜଙ୍କ ପୋଲିସ ରିମାଣ୍ଡ 27 ଜୁଲାଇ ଯାଏଁ ବଢାଇଦେଇଛନ୍ତି ମୁମ୍ବାଇ କୋର୍ଟ । ଏହାପୂର୍ବରୁ ରାଜଙ୍କୁ ଭାୟଖଲା ଜେଲରୁ ନେଇ କୋର୍ଟରେ ହାଜର କରାଯାଇଥିଲା । ପୋଲିସର ସମସ୍ତ ଦଲିଲ ଶୁଣିବା ପରେ କୋର୍ଟ ରାଜଙ୍କ ରିମାଣ୍ଡ 5 ଦିନ ବଢାଇ ଦେଇଛନ୍ତି ।
ପର୍ଣ୍ଣୋଗ୍ରାଫି ମାମଲାରେ ଗିରଫ ବଲିଉଡ ଅଭିନେତ୍ରୀ ଶିଳ୍ପା ସେଟ୍ଟୀଙ୍କ ସ୍ବାମୀ ରାଜ କୁନ୍ଦ୍ରାଙ୍କୁ ନେଇ ଏବେ ଇଣ୍ଟରନ୍ୟାସନାଲ କନେକ୍ସନ ମଧ୍ୟ ସାମ୍ନାକୁ ଆସିସାରିଛି । ସେପଟେ ରାଜ କୁନ୍ଦ୍ରା ପୋଲିସର ଗିରଫଦାରୀକୁ ଚ୍ୟାଲେଞ୍ଜ କରି ହାଇକୋର୍ଟର ଦ୍ବାରସ୍ଥ ହୋଇଛନ୍ତି । ମୁମ୍ବାଇ ପୋଲିସ 41A ନୋଟିସ ଦେଇନଥିବା କହିଛନ୍ତି ରାଜ । ପୋଲିସ ସାମ୍ନାରେ ହାଜର ପାଇଁ 41A ନୋଟିସ ଦିଆଯାଇଥାଏ ।
ସ୍ବାମୀଙ୍କ ଗିରଫଦାରୀ ପରେ ସ୍ତ୍ରୀ ଶିଳ୍ପାଙ୍କ ନିରବତାକୁ ନେଇ ଘନଉଛି ସସପେନ୍ସ । ପର୍ଣ୍ଣୋଗ୍ରାଫି ବିଜନେସରେ ଶିଳ୍ପା ସେଟ୍ଟୀଙ୍କ ଭୂମିକାକୁ ନେଇ ପ୍ରଶ୍ନ ଉଠିବାରେ ଲାଗିଥିଲା ।
ପର୍ଣ୍ଣୋଗ୍ରାଫି ମାମଲାରେ ବିଜନେସମ୍ୟାନ ରାଜ କୁନ୍ଦ୍ରାଙ୍କ ସ୍ତ୍ରୀ ତଥା ଅଭିନେତ୍ରୀ ଶିଳ୍ପା ସେଟ୍ଟୀଙ୍କ କୌଣସି ସକ୍ରିୟ ଭୂମିକା ନଥିବା ସାମ୍ବାଦିକ ସମ୍ମିଳନୀରେ କହିଥିଲା ମୁମ୍ବାଇ ପୋଲିସ । ଏହି ମାମଲାରେ ଶିଳ୍ପା ସେଟ୍ଟୀଙ୍କର କୌଣସି ଭୂମିକା ରହିଥିବା ବର୍ତ୍ତମାନସୁଦ୍ଧା ତଦନ୍ତରୁ ସ୍ପଷ୍ଟ ହୋଇନଥିବା ନିଜ ବୟାନରେ ମୁମ୍ବାଇ ପୋଲିସ କମିଶନର ମିଲିନ୍ଦ ଭାରମ୍ବେ କହିଥିବାବେଳେ ଶୁକ୍ରବାର ଅଭିନେତ୍ରୀଙ୍କ ଘରେ ହାଜର ହୋଇଛି କ୍ରାଇମବ୍ରାଞ୍ଚ ।
