ମୁମ୍ବାଇ: ବର୍ତ୍ତମାନ ‘ମିମି’ ଫିଲ୍ମର ପ୍ରସ୍ତୁତିରେ ଲାଗିପଡିଛନ୍ତି ସୁନ୍ଦରୀ ଅଭିନେତ୍ରୀ କ୍ରିତି ସାନନ । ଯାହାର ଫାଷ୍ଟ ଲୁକ ପୋଷ୍ଟର ଗତ କାଲି ଜାରି ହୋଇଥିଲା । ନିଜ ଶାନଦାର ଅଭିନୟ ଜରିଆରେ କ୍ରିତି ଏବେ ବଲିଉଡରେ ଟପ ହିରୋଇନଙ୍କ ମଧ୍ୟରେ ସାମିଲ ହୋଇ ସାରିଲେଣି । ତାଙ୍କୁ ଗୋଟିଏ ପରେ ଗୋଟିଏ ଫିଲ୍ମ ଅଫର ମିଳିବାରେ ଲାଗିଛି । ନିକଟରେ କ୍ୟୁଟ ଅଭିନେତା କାର୍ତ୍ତିକ ଆର୍ୟାନଙ୍କ ସହ ଆସିଥିବା ତାଙ୍କ ଫିଲ୍ମ ‘ଲୁକା ଛୁପି’ ଦର୍ଶକଙ୍କ ମନ କିଣିବାରେ ସଫଳ ହୋଇଥିଲା ।
ଆଉ ସେ ଖୁବ୍ ଶୀଘ୍ର ଖିଲାଡି କୁମାରଙ୍କ ବହୁ ଚର୍ଚ୍ଚିତ କମେଡି ଡ୍ରାମା ଫିଲ୍ମ ‘ହାଉସଫୁଲ 4’ରେ ମଧ୍ୟ ନଜର ଆସିବେ । ଆଜିକାଲି ସେ ଅକ୍ଷୟଙ୍କ ପ୍ରଶଂସା କରିବାରେ ଲାଗିଛନ୍ତି । ନିକଟରେ ଏକ ସାକ୍ଷାତକାରରେ ଯୋଗ ଦେଇ ସେ ଫିଲ୍ମ ସୁଟିଂର ଅନୁଭବ ସେୟାର କରିଥିଲେ ।
ସେ ବଲିଉଡର "ଖିଲାଡି ଅକ୍ଷୟଙ୍କ ସହ କାମ କରି ବହୁତ ଖୁସି ଅଛନ୍ତି । ଅକ୍ଷୟଙ୍କ ସବୁଠାରୁ ଭଲ ଗୁଣ ହେଲା କି ସେ କେବେ ଗର୍ବ କରନ୍ତି ନାହିଁ । ଆଉ ସେ କେବେ ମଧ୍ୟ ଜୁନିୟର କଳାକାରଙ୍କ ସହ ସିନିୟର ପରି ବ୍ୟବହାର କରନ୍ତି ନାହିଁ । ସେ ଛୁଆଙ୍କ ଭଳି ସୁଟରେ ଖେଳନ୍ତି ବୋଲି" କହିଥିଲେ କ୍ରିତି ।
ପ୍ରକାଶ ଥାଉକି ‘ହାଉସଫୁଲ 4’ରେ ଅକ୍ଷୟ ଓ କ୍ରିତିଙ୍କ ବ୍ୟତୀତ ରିତେଶ ଦେଶମୁଖ, ବବି ଦେଓଲ, ଚଙ୍କି ପାଣ୍ଡେ, ରାଣା ଦଗ୍ଗୁବତୀ, ନୱାଜୁଦ୍ଦିନ ସିଦ୍ଦିକି, କ୍ରିତି ଖରବନ୍ଦା, ବୋମନ ଇରାନୀ ଓ ପୂଜା ହେଗେଡ ମୁଖ୍ୟ ଭୂମିକାରେ ଦେଖାଯିବେ । ଏହି ମଲ୍ଟି ଷ୍ଟାରର ଫିଲ୍ମଟି ଅକ୍ଟୋବର 25ରେ ରିଲିଜ ହେବାକୁ ଯାଉଛି ।
