ହାଇଦ୍ରାବାଦ: ବଲିଉଡର ଜଣାଶୁଣା ଅଭିନେତା, ଲେଖକ ତଥା ଚଳଚ୍ଚିତ୍ର ନିର୍ମାତା ଫରହାନ୍ ଅଖତର ତାଙ୍କ ଗର୍ଲଫ୍ରେଣ୍ଡ ଶିବାନୀ ଦାଣ୍ଡେକରଙ୍କୁ ବିବାହ କରୁଛନ୍ତି। ବିବାହ ଉତ୍ସବରୁ ଏକ ଫଟୋ ସାମ୍ନାକୁ ଆସିଛି, ଯେଉଁଥିରେ ଫରହାନ ଏବଂ ଶିବାନୀ ବର ଏବଂ କନିଆ ବେଶରେ ସଜେଇ ହୋଇଛନ୍ତି । ଫରହାନ-ଶିବାନୀଙ୍କ ବିବାହ କାର୍ଯ୍ୟକ୍ରମ ମୁମ୍ବାଇସ୍ଥିତ ଖଣ୍ଡାଲା ଫାର୍ମହାଉସରେ ଚାଲିଛି। ଫରହାନ୍ ଅଖତର ଏବଂ ଶିବାନୀ ଦାଣ୍ଡେକରଙ୍କ ଏହି ଫଟୋ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି।
ହ୍ରିତିକ ରୋଶନ ତାଙ୍କ ପରିବାର ସହିତ ଫରହାନ-ଶିବାନୀଙ୍କ ବିବାହରେ ପହଞ୍ଚିଛନ୍ତି । ଚଳଚ୍ଚିତ୍ର ନିର୍ମାତା ଆଶୁତୋଷ ଗ୍ବାରିକର ଏବଂ ସତୀଶ କୌଶିକଙ୍କ ସମେତ ଅନେକ ତାରକା ଏହି ବିବାହ କାର୍ଯ୍ୟକ୍ରମରେ ଯୋଗ ଦେଇଛନ୍ତି। ଏହି ସମୟରେ, ଶିବାନୀଙ୍କ ଭଉଣୀ ଅନୁଷା ଦାଣ୍ଡେକର ଏଠାରେ ଉପସ୍ଥିତ ଅଛନ୍ତି । ଏହା ସହିତ ବଲିଉଡ ଅଭିନେତ୍ରୀ ରିୟା ଚକ୍ରବର୍ତ୍ତୀ ମଧ୍ୟ ଉପସ୍ଥିତ ଅଛନ୍ତି। ବିବାହର ପ୍ରଥମ ଫଟୋରେ ଫରହାନ ଏକ କଳା ରଙ୍ଗର ସୁଟ ପିନ୍ଧିଥିବାବେଳେ ଶିବାନୀ ଏକ ଲାଲ୍ ଗାଉନରେ ବହୁତ ସୁନ୍ଦର ଦେଖାଯାଉଛନ୍ତି ।
ଫରହାନ-ଶିବାନୀଙ୍କ ବିବାହ ଖବର ଦୀର୍ଘ ସମୟ ଧରି ଚର୍ଚ୍ଚାରେ ରହି ଆସିଥିଲା । ଏହି ଦମ୍ପତି ଏବେ ବିବାହ ବନ୍ଧନରେ ବାନ୍ଧି ହେବାକୁ ଯାଉଛନ୍ତି । ଗୁରୁବାର ଦିନ ଫରହାନଙ୍କ ଘରେ ବହୁ ଅତିଥିଙ୍କ ଯିବାଆସିବା ଲାଗିରହିଥିଲା । ସେହି ଦିନ ଫରହାନ-ଶିବାନୀଙ୍କ ମେହେନ୍ଦି-ହଳଦୀ ସମାରୋହ ଆୟୋଜିତ ହୋଇଥିଲା।
ବ୍ୟୁରୋ ରିପୋର୍ଟ, ଇଟିଭି ଭାରତ
