ମୁମ୍ବାଇ: ପପୁଲାର ନିର୍ଦ୍ଦେଶକ ବିବେକ ଅଗ୍ନିହୋତ୍ରୀ ତାଙ୍କର ଆଗାମୀ ଫିଲ୍ମ ‘କଶ୍ମୀର ଫାଇଲ୍ସ’କୁ ନେଇ ଖୁବ୍ ବ୍ୟସ୍ତ । ଯେଉଁଥିରେ ମୁଖ୍ୟ ଭୂମିକାରେ ନଜର ଆସିବେ ଡିସ୍କୋ ଡାନ୍ସର ମିଥୁନ ଚକ୍ରବର୍ତ୍ତୀ । ନିକଟରେ ଫିଲ୍ମର ସୁଟିଂ ବନ୍ଦ କରିବାକୁ ପଡିଥିଲା, କାରଣ ମିଥୁନ ସେଟରେ ଅସୁସ୍ଥ ହୋଇପଡିଥିଲେ । ଖବର ଅନୁଯାୟୀ ପେଟ ସଂକ୍ରମଣ ହେତୁ ଅଭିନେତାଙ୍କ ଅବସ୍ଥା ଖରାପ ହୋଇଯାଇଥିଲା । ଯେଉଁଥି ପାଇଁ ବିବେକଙ୍କୁ ସୁଟିଂ ବନ୍ଦ କରିବାକୁ ପଡିଲା । ଏହି ଘଟଣା ବିଷୟରେ ବର୍ଣ୍ଣନା କରୁଥିବାବେଳେ ଅଗ୍ନିହୋତ୍ରୀ ଆହୁରି ମଧ୍ୟ ପ୍ରକାଶ କରିଛନ୍ତି ଯେ ମିଥୁନ ଖରାପ ଅବସ୍ଥାରେ ଥାଇ ମଧ୍ୟ ଏହାର ସୁଟିଂ ଶେଷ କରିଛନ୍ତି ।
ଏହା ବିଷୟରେ ଆଲୋଚନା କରି ବିବେକ ଆହୁରି କହିଥିଲେ, ‘ଆମେ ଏକ ଆକ୍ସନ ସିକ୍ବେନ୍ସର ସୁଟିଂ କରୁଥିଲୁ । ଯାହା ମିଥୁନଙ୍କ ଭୂମିକାରେ ଥିଲା । ହେଲେ ହଠାତ୍ ତାଙ୍କୁ ପେଟ ଇନଫେକ୍ସନର ସାମ୍ନା କରିବାକୁ ପଡିଥିଲା । କୌଣସି ବି ବ୍ୟକ୍ତି ଅପରି ଅବସ୍ଥାରେ ଠିଆ ମଧ୍ୟ ହୋଇପାରିନଥାଆନ୍ତେ । ହେଲେ ମିଥୁନ କିଛି ସମୟ ପାଇଁ ବାହାରକୁ ଯାଇ ପୁଣି ଆସି ଫିଲ୍ମର ସେହି ସୁଟ ଶେଷ କରିଥିଲେ । ଏହା ଏତେ ଖରାପ ଥିଲା ଯେ ଏପରି ଅବସ୍ଥାରେ ମୁଁ କେବେ କଳ୍ପନା କରିପାରୁନାହିଁ କେହି ସୁଟିଂ କରିପାରିବେ ବୋଲି । ହେଲେ ମିଥୁନ ଏହା କରିକି ଦେଖାଇଛନ୍ତି । ଏଥିପାଇଁ ତାଙ୍କୁ ସୁପରଷ୍ଟାର କୁହାଯାଏ ।’
ପ୍ରକାଶ ଥାଉକି ‘କଶ୍ମୀର ଫାଇଲ୍ସ’ କଶ୍ମୀର ପଣ୍ଡିତଙ୍କ ଲୋମହର୍ଷଣକାରୀ କାହାଣୀକୁ ନେଇ ଆଧାରିତ । 1989 ଏବଂ 1990ର କାହାଣୀ ଫିଲ୍ମରେ ପର୍ଯ୍ୟବେଶିତ କରାଯାଇଛି । ବିବେକ ପୂର୍ବରୁ ଜଣାଇଥିଲେ ଯେ ଫିଲ୍ମ ଫ୍ୟାକ୍ଟସ ଉପରେ ନୁହେଁ ବରଂ ଅନୁଭୂତି ଉପରେ ଆଧାରିତ । ଯାହାକୁ ନେଇ ଚର୍ଚ୍ଚା ହୋଇଥିଲା ।
