ମୁମ୍ବାଇ: ଇସ୍ରାଏଲ-ପାଲେଷ୍ଟାଇନ ପ୍ରସଙ୍ଗରେ ବଲିଉଡ ଅଭିନେତ୍ରୀ କଙ୍ଗନା ରଣାୱତ ଏବଂ ପୂର୍ବତନ ଭାରତୀୟ ଦଳର ଅଲରାଉଣ୍ଡର ଇରଫାନ ପଠାନ ମୁହାଁମୁହିଁ ହୋଇଛନ୍ତି। ଯେତେବେଳେ ଇରଫାନ୍ ଇସ୍ରାଏଲ୍-ପାଲେଷ୍ଟାଇନ ବିଷୟରେ ଟ୍ବିଟ କରି ପାଲେଷ୍ଟାଇନକୁ ସମର୍ଥନ କରିଥିଲେ ସେତେବେଳେ ଦୁଇଜଣଙ୍କ ଏହି ବିବାଦ ଆରମ୍ଭ ହୋଇଥିଲା।
ସେ ଏହି ପ୍ରସଙ୍ଗରେ ଟ୍ବିଟ କରିବା ମାତ୍ରେ କଙ୍ଗନା ଏଥିପାଇଁ ପୂର୍ବତନ ଅଲରାଉଣ୍ଡର କ୍ରିକେଟରଙ୍କୁ କଟୁ କଥା ଶୁଣାଇଥିଲେ । ଏହାର ଜବାବରେ ଇରଫାନ ବର୍ତ୍ତମାନ ଅନ୍ୟ ଏକ ଟ୍ବିଟରେ କଙ୍ଗନାଙ୍କୁ ଉପଯୁକ୍ତ ଉତ୍ତର ଦେଇଛନ୍ତି। ପ୍ରଥମେ, ଇରଫାନ ଟ୍ବିଟରରେ ପାଲେଷ୍ଟାଇନକୁ ସମର୍ଥନ କରି ଲେଖିଛନ୍ତି, ‘ଯଦି ତୁମର ଟିକିଏ ମାନବିକତା ବାକି ଅଛି, ତେବେ ଏବେ ପାଲେଷ୍ଟାଇନରେ ଯାହା ଘଟୁଛି, ତାହା ଆଦୌ ସମର୍ଥନ କରିବ ନାହିଁ।’
ପଠାନଙ୍କ ଏହି ଟ୍ବିଟ ପରେ କଙ୍ଗନା ତାଙ୍କ ଇନଷ୍ଟାଗ୍ରାମରେ ଷ୍ଟୋରୀରେ ଏକ ପୋଷ୍ଟ ସେୟାର କରି ତାଙ୍କୁ ଟାର୍ଗେଟ କରିଥିଲେ। ଏଠାରେ କଙ୍ଗନା ବିଜେପି ବିଧାୟକ ଦୀନେଶ ଚୌଧୁରୀଙ୍କ ଏକ ଟ୍ବିଟ ସେୟାର କରିଛନ୍ତି । ଯେଉଁଥିରେ ଲେଖାଥିଲା ଯେ, ‘ଇରଫାନ ପଠାନଙ୍କର ଅନ୍ୟ ଦେଶ ପ୍ରତି ଏତେ ଭଲପାଇବା ଅଛି, କିନ୍ତୁ ସେ ନିଜ ଦେଶରେ ବଙ୍ଗଳା ହିଂସାକାଣ୍ଡ ଉପରେ ଟ୍ବିଟ କରିବାକୁ ସକ୍ଷମ ନୁହନ୍ତି।’
ଏହା ପରେ ଇରଫାନ ଅଭିନେତ୍ରୀଙ୍କୁ ଜବାବ ଦେଇ ଲେଖିଛନ୍ତି, ‘ମୋର ସମସ୍ତ ଟ୍ବିଟ ମାନବିକତା ନହେଲେ ଦେଶବାସୀଙ୍କ ପାଇଁ ଅଟେ। ଏଥିରେ ସର୍ବୋଚ୍ଚ ସ୍ତରରେ ଦେଶ ପ୍ରତିନିଧିତ୍ବ କରିଥିବା ବ୍ୟକ୍ତିଙ୍କ ଦର୍ଶନ ରହିଛି। ଅନ୍ୟପଟେ, ମୋତେ କଙ୍ଗନାଙ୍କ ଠାରୁ ଶୁଣିବାକୁ ପଡୁଛି, ଯିଏ ଘୃଣା ବିସ୍ତାର କରୁବାରୁ ତାଙ୍କ ଟ୍ବିଟର ଆକାଉଣ୍ଟକୁ ରଦ୍ଦ କରିଦିଆଯାଇଛି ଏବଂ କିଛି ଲୋକଙ୍କ ଦେୟ ଆକାଉଣ୍ଟ କେବଳ ଘୃଣା ଦ୍ବାରା ବିସ୍ତାର ହୋଇଛି।’
