ମୁମ୍ବାଇ: ବମ୍ବେ ହାଇକୋର୍ଟରୁ ବଲିଉଡ ଅଭିନେତ୍ରୀ କଙ୍ଗନା ରଣାୱତଙ୍କୁ ଲାଗିଛି ଝଟକା । ଅଭିନେତ୍ରୀଙ୍କ ବିରୋଧରେ ମାନହାନୀ ମାମଲା ଦାଏର କରିଥିଲେ ଜାଭେଦ ଅଖତର । ଏହାକୁ ରଦ୍ଦ କରିବା ପାଇଁ ବମ୍ବେ ହାଇକୋର୍ଟରେ ଏକ ଯାଚିକା ଦାଖଲ କରିଥିଲେ କଙ୍ଗନା । ଏହାକୁ କୋର୍ଟ ଖାରଜ କରିଦେଇଛନ୍ତି ।
ଜାଭେଦ ଅଖତରଙ୍କ ପକ୍ଷରୁ କଙ୍ଗନା ରଣାୱତଙ୍କ ବିରୋଧରେ ମାନହାନୀ ମାମଲା ଦାଏର କରାଯାଇଥିଲା । ଜାଭେଦ ଅଖତରଙ୍କ ଅଭିଯୋଗ ଅନୁଯାୟୀ, କଙ୍ଗନା ଜାତୀୟ ଟେଲିଭିଜନରେ ତାଙ୍କ ଗାରିମାକୁ ଆଘାତ ପହଞ୍ଚାଇଛନ୍ତି । ସୁଶାନ୍ତ ସିଂହ ରାଜପୁତଙ୍କୁ ନେଇ କରାଯାଇଥିବା ସାକ୍ଷାତକାର ବିଷୟ ଉଠାଇଥିଲେ ଜାଭେଦ ଅଖତର ।
ବଲିଉଡ ଅଭିନେତା ସୁଶାନ୍ତ ସିଂହ ରାଜପୁତଙ୍କ ଦେହାନ୍ତ ପରେ ଏକ ଇଣ୍ଟରଭ୍ୟୁରେ କଙ୍ଗନା ଜାଭେଦ ଅଖତରଙ୍କ ନାଁ ନେଇ ତାଙ୍କ ଉପରେ ଅନେକ ଅଭିଯୋଗ ଲଗାଇଥିଲେ । ଅଭିନେତ୍ରୀଙ୍କ ଅଭିଯୋଗ ପରେ ତାଙ୍କ ବିରୋଧରେ ଆକ୍ସନ ନେଇଥିଲେ ଜାଭେଦ ଅଖତର । ଏହାପରେ ଡିସେମ୍ବରରେ କୋର୍ଟ କଙ୍ଗନାଙ୍କ ବିରୋଧରେ ଜୁହୁ ପୋଲିସକୁ ଯାଞ୍ଚ ଆଦେଶ ଦେଇଥିଲେ । ଏହାକୁ ନେଇ କଙ୍ଗନାଙ୍କୁ ନୋଟିସ ଜାରି କରିଥିଲା ପୋଲିସ ।
ଏହାପୂର୍ବରୁ ଜାମିନ ଆବେଦନ ପାଇଁ ଯାଚିକା ଦାଖଲ କରିଥିଲେ କଙ୍ଗନା । ଏହା ଉପରେ ଶୁଣାଣି କରି କୋର୍ଟ କଙ୍ଗନାଙ୍କୁ ଜାମିନ ପ୍ରଦାନ କରିଥିଲେ । ଜାଭେଦ ଅଖତର କଙ୍ଗନା ରଣାୱତଙ୍କ ଉପରେ ଟିଭି ଇଣ୍ଟରଭ୍ୟୁରେ କଥିତ ଭାବରେ ମାନହାନୀ କରିଥିବା ଅଭିଯୋଗ ଲଗାଇଥିଲେ ।
