ମୁମ୍ବାଇ: ଆଜି(ଶନିବାର) ପୂର୍ବତନ ଅର୍ଥମନ୍ତ୍ରୀ ଅରୁଣ ଜେଟଲୀ 66 ବର୍ଷ ବୟସରେ ଶେଷ ନିଶ୍ବାସ ତ୍ୟାଗ କରିଛନ୍ତି । ବିଜେପିର ଟାଣୁଆ ନେତା ଅରୁଣଙ୍କ ଦେହାନ୍ତରେ ଦେଶରେ ଶୋକର ଛାୟା ଖେଳିଯାଇଛି । ବଲିଉଡରେ ମଧ୍ୟ ଦେଖିବାକୁ ମିଳିଛି ଦୁଃଖର ବାତାବରଣ । ତାଙ୍କ ମୃତ୍ୟୁରେ ଶୋକ ପ୍ରକାଶ କରିଛନ୍ତି ବଲିଉଡ ସେଲିବ୍ରିଟି । ଗତ 9 ତାରିଖରୁ ଏମ୍ସରେ ଭର୍ତ୍ତି ହୋଇଥିବା ଅରୁଣ ଆଜି ଅପରାହ୍ନ 12.07ରେ ଆଖି ବୁଝିଥିଲେ ।
ଏହି ଦୁଃଖ ମୁହୂର୍ତ୍ତରେ ବି-ଟାଉନର ମିଷ୍ଟର ଝକାସ ଅନିଲ କପୁର ଟ୍ବିଟ କରି ଅରୁଣଙ୍କ ମୃତ୍ୟୁରେ ଶୋକ ପ୍ରକାଶ କରିଛନ୍ତି । ସେ ଟ୍ବିଟ କରି ଲେଖିଛନ୍ତି, ‘ଅରୁଣ ଜେଟଲୀଙ୍କ ସହ ଦୀର୍ଘ 20 ବର୍ଷ ପୂର୍ବେ ସାକ୍ଷାତ ହୋଇଥିଲା ଆଉ ସେବେଠାରୁ ତାଙ୍କ ପ୍ରଶଂସକ ରୂପେ ରହିଆସୁଛି । ତାଙ୍କ ମୃତ୍ୟୁ ଦେଶ ପାଇଁ ବଡ କ୍ଷତି ପହଞ୍ଚାଇଛି । ଆମେ ସର୍ବଦା ତାଙ୍କୁ ସ୍ମରଣ କରିବା ସହ ତାଙ୍କ ପରିବାର ପ୍ରତି ସମବେଦନା ଜ୍ଞାପନ କରିଛନ୍ତି ।’
ସେହିପରି ରିତେଶ ଦେଶମୁଖ ମଧ୍ୟ ଲେଖିଛନ୍ତି, ‘ଅରୁଣଙ୍କ ମୃତ୍ୟୁରେ ମୁଁ ଖୁବ୍ ଦୁଃଖି । ତାଙ୍କୁ ଶ୍ରଦ୍ଧାଞ୍ଜଳୀ ଜଣାଇବା ସହ ପରିବାରକୁ ସମବେଦନା ଜଣାଇଛନ୍ତି । ଅନ୍ୟପଟେ ଫିଲ୍ମ ନିର୍ମାତା କରନ ଜୋହର ମଧ୍ୟ ଟ୍ବିଟ କରି ଲେଖିଛନ୍ତି, ‘ଆଜି ଦେଶ ବଡ ନେତାଙ୍କୁ ହରାଇଛି । ମୋର ତାଙ୍କ ପରିବାର ସମବେଦନା ରହିଛି ।’
ଅଭିନେତାରୁ ନେତା ସାଜିଥିବା ଆକ୍ସନ ହିରୋ ସନ୍ନି ଦେଓଲ ମଧ୍ୟ ଟ୍ବିଟ କରି ଦୁଃଖ ପ୍ରକାଶ କରିଛନ୍ତି । ଏହିପରି ଲୋକପ୍ରିୟ ଗାୟିକା ଆଶା ଭୋଶଲେ ଏହି ଦୁଃଖଦ ଖବର ଶୁଣି ଖୁବ୍ ଦୁଃଖି ହୋଇଯାଇଛନ୍ତି ବୋଲି ଟ୍ବିଟରେ ଲେଖିଛନ୍ତି ।
ଅନ୍ୟପଟେ ଫେମସ ସଙ୍ଗୀତକାର ଓ ଗାୟକ ଅଦନାନ ସାମି ମଧ୍ୟ ତାଙ୍କ ଆତ୍ମର ସଦଗତି ପାଇଁ ଟ୍ବିଟ କରି ପ୍ରାର୍ଥନା କରିଛନ୍ତି ।
ପ୍ରକାଶ ଥାଉକି 2014 ମୋଦି ସରକାରରେ ଆସିଲା ପରେ ଅର୍ଥମନ୍ତ୍ରୀ ରୂପେ ଅରୁଣ ଜେଟଲୀ ଶପଥ ଗ୍ରହଣ କରିଥିଲେ । ଚଳତି ବର୍ଷ ଅସୁସ୍ଥ ଥିବାରୁ ସେ ନିର୍ବାଚନ ଲଢିପାରିନଥିଲେ ।
