ମୁମ୍ବାଇ: ରବିବାର ଖିଲାଡି ଅକ୍ଷୟ କୁମାରଙ୍କ କୋରୋନା ରିପୋର୍ଟ ପଜିଟିଭ ଆସିଥିଲା । ପଜିଟିଭ ଚିହ୍ନଟ ପରେ ସେ ନିଜକୁ ହୋମ କ୍ବାରେଣ୍ଟାଇନ କରିଛନ୍ତି । ଏନେଇ ସେ ଟ୍ବିଟ ମାଧ୍ୟମରେ ସୂଚନା ଦେଇଥିଲେ । ‘ରାମସେତୁ’ ଫିଲ୍ମ ସୁଟିଂ ସମୟରେ ତାଙ୍କ ସଂସ୍ପର୍ଷରେ ଆସିଥିବା ଲୋକଙ୍କୁ ମଧ୍ୟ କୋରୋନା ପରୀକ୍ଷା କରାଇବା କହିଥିଲେ । ହେଲେ ଇତିମଧ୍ୟରେ ଶୁଣିବାକୁ ମିଳୁଛି ଯେ ‘ରାମସେତୁ’ର 45 ଜଣ ଜୁନିଅର ଆର୍ଟିଷ୍ଟ କୋରୋନା ସଂକ୍ରମିତ ବାହାରିଛନ୍ତି ।
ଫେଡରେସନ ଅଫ ୱେଷ୍ଟର୍ଣ୍ଣ ଇଣ୍ଡିଆ ସିନେ ଏମ୍ପ୍ଲୋଇଜର ସାଧାରଣ ସଚିବ ଅଶୋକ ଦୁବେ ସୂଚନା ଦେଇ କୁହିଛନ୍ତି, ‘ରାମସେତୁ ସେଟରେ ସମ୍ପୂର୍ଣ୍ଣ ସତର୍କତା ଅବଲମ୍ବନ କରିବା ସତ୍ତ୍ବେ ଆମ ଜୁନିଅର ଆର୍ଟିଷ୍ଟ ଆସୋସିଏସନର 45 ଜଣ କୋରୋନା ପଜିଟିଭ ବାହାରିଛନ୍ତି । ଯେଉଁମାନଙ୍କୁ ବର୍ତ୍ତମାନ କ୍ବାରେଣ୍ଟାଇନରେ ରଖାଯାଇଛି ।’
ସେହିପରି ଅକ୍ଷୟଙ୍କ ରିପୋର୍ଟ ପଜିଟିଭ ଆସିବା ପରେ ଫିଲ୍ମର ସୋମବାର ସୁଟ୍ ରଦ୍ଦ କରିଦେଇଛନ୍ତି ମେକର୍ସ । ଆସନ୍ତା 14, 15 ଦିନ ପରେ ପୁନଃ ଫିଲ୍ମର ସୁଟିଂ ଆରମ୍ଭ ହେବ ବୋଲି ଶୁଣିବାକୁ ମିଳୁଛି ।
