ମୁମ୍ବାଇ: କୃଷକ ଆନ୍ଦୋଳନ ସହ ଦେଶର ବଡ ପ୍ରସଙ୍ଗ ସାଜିଛି ଅଭିନେତ୍ରୀ କଙ୍ଗନା ରଣାୱତ ଓ ଦିଲଜିତ ଦୋସାଞ୍ଝଙ୍କ ବାକ୍ ଯୁଦ୍ଧ । ପରସ୍ପରକୁ ସୋସିଆଲ ମିଡିଆରେ ଜବାବ ଦେବାରେ ଲାଗିଛନ୍ତି ଏହି ଯୋଡି । ନିକଟରେ କଙ୍ଗନା କୃଷକ ଆନ୍ଦୋଳନ ବିରୋଧରେ ଏକ ଟ୍ବିଟ କରି ଜଣେ ଆନ୍ଦୋଳନକାରୀ ମହିଳାଙ୍କୁ ଶାହିନବାଗର ଜେଜେମା ବିଲକିସ୍ ବାନୋ ବୋଲି ବର୍ଣ୍ଣନା କରିଥିଲେ । ଯାହାକୁ ଆଧାର କରି ତାଙ୍କ ନିନ୍ଦା କରି କଡା ଜବାବ ଦେଇଥିଲେ ଦିଲଜିତ । ସେପଟେ କଙ୍ଗନା ମଧ୍ୟ କେଉଁ ଛାଡିବା ଝିଅ ସେ ମଧ୍ୟ ଟ୍ବିଟ ପରେ ଟ୍ବିଟ କରି ଦିଲଜିତଙ୍କୁ କଥାକୁ କାଟୁଥିବାର ନଜର ଆସିଥିଲେ । ବୁଧବାର ଏହି ଦୁଇଜଣଙ୍କ ବାକ୍ ଯୁଦ୍ଧ ସୋସିଆଲ ମିଡିଆରେ ନିଆଁ ପରି ବ୍ୟାପିଯାଇଥିଲା ।
ବର୍ତ୍ତମାନ ଏହି ମାମଲାରେ ଦିଲଜିତଙ୍କ ସମର୍ଥନରେ କିଛି ସେଲିବ୍ରିଟିଙ୍କୁ ଦେଖିବାକୁ ମିଳୁଛି । ଏହି କ୍ରମରେ ସାମିଲ ଅଛନ୍ତି ‘ସାକ୍ରେଡ ଗେମ୍ସ’ର କୁକୁ ତଥା ଅଭିନେତ୍ରୀ କୁବ୍ରା ସିଟ, ସୁଜୈନ ଖାନଙ୍କ ଭଉଣୀ ଫରାହ ଖାନ, ସ୍ବରା ଭାସ୍କର, ରିଚା ଚଡ୍ଡା, ଅନୁଭବ ସିହ୍ନା ଓ ମିକା ସିଂ ।
କୁବ୍ରା ଟ୍ବିଟ କରି ଲେଖିଛନ୍ତି, ‘ଆଇ ଲଭ ୟୁ ଦିଲଜିତ ।’ ସେହିପରି ଫରାହ ଲେଖିଛନ୍ତି, ‘ବିଶେଷକରି ଯେତେବେଳେ ପଞ୍ଜାବୀ ଲେପ୍ଟ ସାଇଡରେ ରାଇଟ୍ ଥାଏ ସେତେବେଳେ ଏକ ପଞ୍ଜାବୀ ଗ୍ରହଣ କରିବା ସହଜ ନୁହେଁ । ଦିଲଜିତ ତୁସି ଗ୍ରେଟ୍ ହୋ । ହୃଦୟରୁ ସିଧା କଥା କହିଛ ।’
ସବୁବେଳେ ନିଜ ବୟାନ ପାଇଁ ଚର୍ଚ୍ଚାରେ ରହୁଥିବା ସ୍ବରା, ଦିଲଜିତଙ୍କ ସମର୍ଥନ କରି ଲେଖିଛନ୍ତି, ‘ଦିଲଜିତ ଦୋସାଞ୍ଝ ଇଜ୍ ଏ ଷ୍ଟାର । ତୁମେ ବାସ୍ତବରେ ଜଣେ ହିରୋ ।’
ସ୍ବରାଙ୍କ ବ୍ୟତୀତ ରିଚା ଲେଖିଛନ୍ତି, ‘ତୁମେ ପବ୍ଲିକ ସାମ୍ନାରେ ଆସି ନିଜ ପକ୍ଷ ରଖିଛ । ପଞ୍ଜାବୀଙ୍କ ପାଇଁ ଲଢ ପ୍ଲିଜ ।’ ନିର୍ମାତା ଅନୁଭବ ଟ୍ବିଟରେ କହିଛନ୍ତି,‘ଜୋ ବୋଲେ ସୋ ନିହାଲ ।’
ପ୍ରକାଶ ଥାଉକି ଦିଲଜିତଙ୍କ ସମର୍ଥନରେ ପ୍ରଥମେ ସାମ୍ନାକୁ ଆସିଥିଲେ ଲୋକପ୍ରିୟ ଗାୟକ ମିକା । ସେ ଟ୍ବିଟ କରି କଙ୍ଗନାଙ୍କ ବିରୋଧରେ ଲେଖିଥିଲେ, ‘କଙ୍ଗନାଙ୍କ ପ୍ରତି ମୋର ଅତ୍ୟଧିକ ସମ୍ମାନ ଥିଲା, ତାଙ୍କ ଅଫିସ ଯେତେବେଳେ ବିଏମସି ଭାଙ୍ଗିଥିଲା ସେତେବେଳେ ମୁଁ ସମର୍ଥନ କରି ତାଙ୍କ ସପକ୍ଷରେ ଟ୍ବିଟ କରିଥିଲି । ମୁଁ ବର୍ତ୍ତମାନ ଭାବୁଛି ମୁଁ ଭୁଲ୍ କରିଥିଲି । କାରଣ କଙ୍ଗନା ଜଣେ ମହିଳା ହୋଇ ଜଣେ ବୃଦ୍ଧାଙ୍କୁ ସମ୍ମାନ ଦେଇନାହାଁନ୍ତି । ଯଦି ଆପଣଙ୍କର କୌଣସି ଶୈଳୀ ଅଛି ତେବେ କ୍ଷମା ମାଗନ୍ତୁ । ତୁମକୁ ଲଜ୍ୟା ଲାଗିବା କଥା ।’
