ହାଇଦ୍ରାବାଦ: ମହାକାଶର ଅନେକ ଗୂଢ ରହସ୍ୟ ଉପରୁ ପରଦା ହଟାଇବା ପାଇଁ ମାନବର ଚେଷ୍ଟା ବହୁ ପୁରୁଣା । ପୃଥିବୀ ବ୍ୟତୀତ ଅନ୍ୟ ଗ୍ରହର ସଂରଚନା ବୁଝିବା ସହ ସେଠାରେ ମାନବ ସତ୍ତାର ସମ୍ଭାବନା ନେଇ ମଧ୍ୟ ଅଧ୍ୟୟନ ଜାରି ରହିଛି । ଏମିତିରେ ରାତିର ନିରୋଳା ଆକାଶରେ ଶୀତଳ ଜ୍ୟୋତ୍ସ୍ନା ଦେଉଥିବା ଚନ୍ଦ୍ରପୃଷ୍ଠରେ ପାଦ ଥାପିବା ମାନବଜାତି ପାଇଁ କିଛି ଛୋଟ ଘଟଣା ନଥିଲା । ଆଜି ବି ପ୍ରତିଟି ମଣିଷର ମୁହଁରେ ରହିଛି ଏହି ଐତିହାସିକ ଘଟଣାକୁ ବାସ୍ତବତାରେ ପରିଣତ କରିଥିବା ମଣିଷର ନାମ ।
ଜୁଲାଇ 20,1969 ମସିହାରେ ଏହି ମହାକାଶଚାରୀ ଚନ୍ଦ୍ରପୃଷ୍ଠରେ ପାଦ ଥାପି ସୃଷ୍ଟି କରିଥିଲେ ଇତିହାସ । ଆଉ ପାଲଟି ଯାଇଥିଲେ ଚନ୍ଦ୍ର ପୃଷ୍ଠରେ ପାଦ ଥାପିଥିବା ପ୍ରଥମ ମହାକାଶଚାରୀ । ସେ ହେଉଛନ୍ତି ଆମେରିକୀୟ ମହାକାଶଚାରୀ ନିଲ ଆର୍ମଷ୍ଟ୍ରଙ୍ଗ । ଲୁନାର ଲ୍ୟାଣ୍ଡିଂ ମଡ୍ୟୁଲ ଇଗଲରୁ ଓହ୍ଲାଇ ଚନ୍ଦ୍ରପୃଷ୍ଠରେ ପାଦ ଥାପିବା ସହ ‘ଜୁଲାଇ 20, 1969 । 10.56pm EDT’ ବୋଲି କହିଥିଲେ ନିଲ । ପୃଥିବୀଠାରୁ ପ୍ରାୟ 240,000 ମାଇଲ ଦୂରରେ ଥିଲେ ସୁଦ୍ଧା ତାଙ୍କର ଏହି ସ୍ବର୍ଣ୍ଣିମ ଇତିହାସ ସୃଷ୍ଟିକାରୀ ମୁହୂର୍ତ୍ତକୁ ଘରେ ବସି ଉପଭୋଗ କରିଥିଲେ ଅଗଣିତ ବିଶ୍ବବାସୀ ।
କିପରି ଥିଲା ନିଲଙ୍କ ଏହି ଐତିହାସିକ ମିଶନ ଦେଖନ୍ତୁ :
ଚନ୍ଦ୍ରପୃଷ୍ଠରେ ଅବତରଣ କରି ପୃଥିବୀକୁ ଫେରିବା ପରେ ଆପୋଲୋ 11ର ତିନି ମହାକାଶଚାରୀଙ୍କୁ ନିଜ ସହରରେ ସ୍ବାଗତ କରିବା ପାଇଁ ନ୍ୟୁୟର୍କ ସଡକରେ ଲମ୍ବିଥିଲା ପ୍ରଶଂସକଙ୍କ ଲମ୍ବା ଲାଇନ । ଇତିହାସ ସୃଷ୍ଟି କରିଥିବା ଏହି ହିରୋମାନଙ୍କୁ ସମ୍ମାନ ଜଣାଇବା ପାଇଁ ଏକ ଟିକର ଟେପ ପ୍ୟାରେଡ ମଧ୍ୟ ଅନୁଷ୍ଠିତ ହୋଇଥିଲା । ଏହାପରେ ଏକାଧିକ ପୁରସ୍କାର ଓ ସମ୍ମାନର ସମେତ ମେଡାଲ ଫର୍ ଫ୍ରିଡମ ଓ କଗ୍ରେସନାଲ ସ୍ପେଶ ମେଡାଲର ମଧ୍ୟ ଅଧିକାରୀ ହୋଇଥିଲେ ନିଲ ଆର୍ମଷ୍ଟ୍ରଙ୍ଗ ।
ପରବର୍ତ୍ତୀ ସମୟରେ ସେ ନ୍ୟାସନାଲ ଆଡଭାଇଜରି କମିଟି ଫର୍ ଏରୋନୋଟିକ୍ସ (ଏନଏସିଏ)ରେ ଯୋଗ ଦେଇଥିଲେ । ଯାହା ପରେ ପରେ ନ୍ୟାସନାଲ ଏରୋନୋଟିକ୍ସ ଆଣ୍ଡ ସ୍ପେଶ ଆଡମିନିଷ୍ଟ୍ରେସନ (ନାସା)ରେ ପରିଣତ ହୋଇଥିଲା । ସରକାରଙ୍କ ଅଧିକୃତ ଏହି ଏଜେନ୍ସିରେ ନିଲ ବିଭିନ୍ନ ଆକାରରେ ନିଜ ଶ୍ରମ ଦାନ କରିଥିଲେ । ସେ ଟେଷ୍ଟ ପାଇଲଟ ହେଉ ଅବା ଇଞ୍ଜିନିୟର, ପ୍ରତ୍ୟେକ ଭୂମିକାକୁ ବେଶ ସୂଚାରୁ ରୂପେ ସେ ନିଭାଇ ଥିଲେ । ଏହି ସମୟରେ ସେ ଏକ୍ସ-15 ପରି ଘଣ୍ଟାକୁ 4000 ମାଇଲ ଅତିକ୍ରମ କରୁଥିବା ହାଇ ସ୍ପିଡ ଏୟାର କ୍ରାଫ୍ଟର ଟେଷ୍ଟ ମଧ୍ୟ କରିଥିଲେ ।
1962ରେ ନାସାର ମହାକାଶଚାରୀ ଯୋଜନାରେ ସାମିଲ ହୋଇଥିଲେ । ଏହାପରେ ସେ ପରିବାର ସମେତ ହୋଷ୍ଟନ, ଟେକ୍ସାସକୁ ସ୍ଥାନାନ୍ତର ହୋଇଥିଲେ । ନିଜ ପ୍ରଥମ ମିଶନ ଜେମିନି 8 ରେ ସେ କମାଣ୍ଡ ପାଇଲଟ ଭାବେ ଭୂମିକା ଗ୍ରହଣ କରିଥିଲେ । ଏନେଇ ନିଲ ଓ ସହଯୋଗୀ ଡେଭିଡ ସ୍କଟଙ୍କୁ 1966 ମସିହାରେ ପୃଥିବୀର କକ୍ଷପଥକୁ ପଠାଯାଇଥିଲା । ଇତିହାସରେ ଏହା ପ୍ରଥମ ଘଟଣା ଥିଲା ଯେବେ ଦୁଇଟି ଯାନକୁ ସଫଳତାର ସହ ମହାକାଶକୁ ପଠାଯାଇଥିଲା । ଏହି ସମୟରେ ଉଭୟେ କିଛି ଅସବୁଧାର ସମ୍ମୁଖୀନ ହେବାରୁ ନିର୍ଦ୍ଧାରିତ ଅବଧି ପୂର୍ବରୁ ଦୁହେଁ ପୁଣି ଫେରି ଆସିଥିଲେ । ମିଶନ ଆରମ୍ଭ ହେବାର 11 ଘଣ୍ଟା ପରେ ଉଭୟେ ପାସିଫିକ ସାଗରରେ ଅବତରଣ କରିଥିଲେ । ପରେ ୟୁଏସଏସ ମାସନ ଉଭୟଙ୍କୁ ସେଠାରୁ ଉଦ୍ଧାର କରିଥିଲା ।
ନିଲଙ୍କ ପ୍ରାଥମିକ ଜୀବନ:
ଷ୍ଟିଫେନ କୋଏଙ୍ଗ ଆର୍ମଷ୍ଟ୍ରଙ୍ଗ ଓ ଭିଓଲା ଲୁଇସ ଏଙ୍ଗଲଙ୍କ ଔରସରୁ ଜନ୍ମ ଗ୍ରହଣ କରିଥିବା ତିନି ସନ୍ତାନ ସନ୍ତତୀଙ୍କ ମଧ୍ୟରେ ସବୁଠାରୁ ବଡ ଥିଲେ ନିଲ ଆର୍ମଷ୍ଟ୍ରଙ୍ଗ । ମାତ୍ର 6 ବର୍ଷ ବୟସରେ ଯେବେ ପ୍ରଥମ ଥର ପାଇଁ ନିଲ ବିମାନରେ ବସିଥିଲେ ସେବେଠାରୁ ବିମାନ ଓ ମହାକାଶ ପ୍ରତି ତାଙ୍କର ଏକ ରୁଚି ସୃଷ୍ଟି ହୋଇଥିଲା ।
ଏହି ରୁଚି ପାଇଁ ମାତ୍ର 16 ବର୍ଷ ବୟସରେ ସେ ଜଣେ ଲାଇସେନ୍ସପ୍ରାପ୍ତ ଛାତ୍ର ପାଇଲଟ ପାଲଟିଥିବା ବେଳେ 1947 ମସିହାରେ ସେ ନାଭାଲ ଏୟାର କ୍ୟାଡେଟ ପାଲଟିଥିଲେ । ଇତି ମଧ୍ୟରେ ସେ ଇଣ୍ଡିଆନାସ୍ଥିତ ୱେଷ୍ଟ ଲାଫାୟେଟ୍ଟେର ପର୍ଡ୍ୟୁ ୟୁନିଭର୍ସିଟିରୁ ଏରୋନୋଟିକାଲ ଇଞ୍ଜିନିୟରିଂ ପଢା ଆରମ୍ଭ କରିଥିଲେ । ଯାହା 1950 ମସିହାରେ ହୋଇଥିବା କୋରିଆନ ଯୁଦ୍ଧରେ ତାଙ୍କ ସେବା ପାଇଁ ବ୍ୟାହତ ହୋଇଥିଲା । ଏହି ସମୟରେ ତାଙ୍କୁ 3ଟି ଏୟାର ମେଡାଲ ହାସଲ ହୋଇଥିଲା ।
1955 ମସିହାରେ ସେ ନିଜ ଡିଗ୍ରୀ ହାସଲ କରିଥିଲେ । ଏହାପରେ ତତ୍କ୍ଷଣାତ ସେ ଜଣେ ସିଭିଲିଆନ ରିସର୍ଚ୍ଚ ପାଇଲଟ ଭାବେ ପ୍ରଥମେ ଏନଏସିଏ ଓ ପରେ ନାସାରେ କାର୍ଯ୍ୟ ଆରମ୍ଭ କରିଥିଲ । ନିଜ ଜୀବନ କାଳରେ ସେ ମୋଟ 1100 ଘଣ୍ଟାର ଉଡାଣ ଭରିଛନ୍ତି । ଏଥିରେ ସେ ଅନେକ ସୁପରସୋନିକ ଫାଇଟରର ମଧ୍ୟ ଟେଷ୍ଟିଂ କରିଛନ୍ତି ।
1956 ମସିହା ଜାନୁଆରୀ 28ରେ ଜାନେଟ ଶିଆରୋନଙ୍କ ସହ ତାଙ୍କର ବିବାହ ହୁଏ । ଏହାର ବର୍ଷେ ପରେ ପୁଅ ଏରିକଙ୍କ ସହ ଆରମ୍ଭ ହୁଏ ତାଙ୍କ ସଂସାର । ପରେ 1959ରେ ଜନ୍ମ ନିଅନ୍ତି ଝିଅ କାରେନ । ହେଲେ ଦୁଃଖର ବିଷୟ କି ବ୍ରେନ ଟ୍ୟୁମର ଓ ଅନ୍ୟ ଅସୁବିଧା କାରଣରୁ 1962 ମସିହାରେ କାରେନଙ୍କ ମୃତ୍ୟୁ ହୁଏ । ଏହି ବର୍ଷ ହିଁ ଜନ୍ମ ନେଇଥିଲେ ତୃତୀୟ ସନ୍ତାନ ମାର୍କ ।
2012 ମସିହାରେ ଓହିଓର ସିନସିନାଟିସ୍ଥିତ ଏକ ହସ୍ପିଟାଲରେ ନିଲଙ୍କ ହାର୍ଟରେ ବାଏପାସ ସର୍ଜରୀ କରାଯାଇଥିଲା । ଏହାର ଠିକ୍ ଦୁଇ ସପ୍ତାହ ପରେ ଅର୍ଥାତ ଅଗଷ୍ଟ 25, 2012 ମସିହାରେ ସର୍ଜରୀରୁ ହୋଇଥିବା ଅସୁବିଧା ଯୋଗୁଁ ଆଖି ବୁଜିଥିଲେ 82 ବର୍ଷୀୟ ନିଲ ଆର୍ମଷ୍ଟ୍ରଙ୍ଗ ।
ନିଜ ଜୀବନ କାଳରେ ନିଲ ନାସା ସହ ପ୍ରଥମେ ଡେପୁଟି ଆସୋସିଏଟ ଆଡମିନିଷ୍ଟ୍ରେଟର ଫର ଏରୋନଟିକ୍ସ ଭାବେ 1971 ଯାଏଁ କାର୍ଯ୍ୟ କରିଥିଲେ । ଏହାପରେ ସେ ସିନସିନାଟି ୟୁନିଭର୍ସିଟିରେ ଏରୋସ୍ପେଶ ଇଞ୍ଜିନିୟରିଂ ଅଧ୍ୟାପକ ଭାବେ ଯୋଗ ଦେଇଥିଲେ । ସେଠାରେ ସେ 8 ବର୍ଷ ଯାଏଁ କାର୍ଯ୍ୟରତ ଥିଲେ । ଏଥିସହ 1982ରୁ 1992 ପର୍ଯ୍ୟନ୍ତ ସେ କମ୍ପ୍ୟୁଟିଂ ଟେକ୍ନୋଲୋଜିସ ଫର୍ ଏଭିଏସନରେ ଚେୟାରମ୍ୟାନ ଭାବେ ମଧ୍ୟ କାର୍ଯ୍ୟରତ ରହିଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
