ଚଣ୍ଡୀଗଡ: ଆପଣ ପ୍ରାୟତଃ ବିଭିନ୍ନ ଦୋକାନ, ସପିଂ ମଲ୍ ଏବଂ ରେସ୍ତୋରାଁଗୁଡିକରେ QR କୋଡ୍ ଦେଖିଥିବେ । ବ୍ୟବହାର ମଧ୍ୟ କରିଥିବେ । QR କୋଡ୍ ମାଧ୍ୟରେ ଅର୍ଥ ନେଣ ଦେଣ କରିଥିବେ, ହେଲେ କେବେ QR କୋର୍ଡ ମାଧ୍ୟମରେ ବୃକ୍ଷ ବାବଦରେ ଜାଣିବାକୁ ପାଇନଥିବେ । ଆଜ୍ଞା ହଁ, ଗୁରୁ ନାନକ ଦେବ ବିଶ୍ୱବିଦ୍ୟାଳୟର ଉଦ୍ଭିଦ ଏବଂ ପରିବେଶ ବିଭାଗ ଏପରି କିଛି ନିଆରା ଉଦ୍ଧାବନ କରିଛି । ଯାହଦ୍ବାରା ଆପଣ QR କୋର୍ଡ ବ୍ୟବହାର କରି ଗଛ ବାବଦରେ ଜାଣିପାରିବେ ।
ପଞ୍ଜାବ ଗୁରୁ ନାନକ ଦେବ ବିଶ୍ୱବିଦ୍ୟାଳୟର ଉଦ୍ଭିଦ ଏବଂ ପରିବେଶ ବିଭାଗର ଏହି ଉଦ୍ଭାବନ ଦ୍ବାରା ଛାତ୍ର କିମ୍ବା ପର୍ଯ୍ୟଟକ ସମସ୍ତଙ୍କ ପାଇଁ ଗଛ ବିଷୟରେ ସୂଚନା ପାଇବା ସହଜ ହୋଇଛି । ଏହି ପଦକ୍ଷେପ ହେଉଛି ବୃକ୍ଷ ସୂଚନା ପାଇଁ ସୃଷ୍ଟି ହୋଇଥିବା ଏକ QR କୋଡ୍, ଯାହା ଥରେ ସ୍କାନ୍ କଲେ ସେହି ବୃକ୍ଷ ବିଷୟରେ ସମସ୍ତ ତଥ୍ୟ ଅତି ସହଜରେ ମିଳିପାରିବ । କେବଳ ଏତିକି ନୁହେଁ, ଗଛ ମୂଳରୁ ପତ୍ର, ଶାଖା ଇତ୍ୟାଦି ସମସ୍ତ ଜ୍ଞାନ କେବଳ ଏକ QR କୋଡ୍ ସ୍କାନ୍ କରି ପାଇଯିବେ । ଏହା ସମଗ୍ର ବିଶ୍ୱବିଦ୍ୟାଳୟର ଛାତ୍ରମାନଙ୍କୁ ଉପକୃତ କରିବ । ଏଥିସହ ବିଶ୍ୱବିଦ୍ୟାଳୟକୁ ପରିଦର୍ଶନରେ ଆସୁଥିବା ଅନ୍ୟମାନଙ୍କ ଜ୍ଞାନକୁ ବୃଦ୍ଧି କରିବ ଏବଂ ସେହି ବୃକ୍ଷ ବାବଦରେ ଅଧିକ ସୂଚନା ଦେବ ।
ଗୁରୁ ନାନକ ଦେବ ବିଶ୍ୱବିଦ୍ୟାଳୟର ଉଦ୍ଭିଦ ଏବଂ ଇକୋଲୋଜି ବିଭାଗର ମୁଖ୍ୟ ଗୁରୁବିନ୍ଦର ସିଂ କହିଛନ୍ତି ଯେ, "ଏହି କାମ ଏକାକି କରିବା ସମ୍ଭବ ନୁହେଁ । ତେଣୁ ସେ ତାଙ୍କ କାର୍ଯ୍ୟକୁ MSc ଛାତ୍ରମାନଙ୍କୁ ନ୍ୟସ୍ତ କରିଥିଲେ ଏବଂ ଦଳଗତ କାର୍ଯ୍ୟ ଏହି ଉପଲବ୍ଧିକୁ ସମ୍ଭବ କରିପାରିଛି । ଯେଉଁ ଛାତ୍ର ଗଛରେ QR କୋଡ୍ ସଂଯୋଗ କରିଛନ୍ତି, ସେହି ଛାତ୍ରଙ୍କ ନାମ ମଧ୍ୟ ସେହି QR କୋଡ୍ ସହିତ ରହିଛି । ଡାଟାବେସ୍ ମାଧ୍ୟମରେ ସମ୍ପୂର୍ଣ୍ଣ ସୂଚନା ଉପଲବ୍ଧ କରାଯାଇଛି । ସମଗ୍ର ବିଶ୍ୱବିଦ୍ୟାଳୟରେ 50 ରୁ 60 ହଜାର ଗଛ ଅଛି ।" ନିକଟ ଭବିଷ୍ୟତରେ ବିଶ୍ବବିଦ୍ୟାଳୟରେ ସମସ୍ତ ଗଛ ସାମ୍ମୁଖରେ QR କୋଡ୍ ରଖିବାକୁ ଯୋଜନା ଚାଲିଥିବା କହିଛନ୍ତି ।
