ହାଇଦ୍ରାବାଦ: 18 ଦିନରେ ପହଞ୍ଚିଲା ଇସ୍ରାଇଲ-ହମାସ ଓ୍ବାର । ସମୟ ଯେତେ ଗଡୁଛି ସେତେ ଜଟିଳ ହେବାରେ ଲାଗିଛି ବିଶ୍ବର ସ୍ଥିିତି । 2 ସପ୍ତାହରୁ ଉର୍ଦ୍ଧ୍ବ ଦିନ ଧରି ଲାଗିରହିଥିବା ଏହି ଯୁଦ୍ଧ ଅଧିକରୁ ଅଧିକ ଭୟଙ୍କର ହୋଇଚାଲିଛି । ପାଲେଷ୍ଟାଇନ ଆତଙ୍କୀ ସଂଗଠନ ହମାସର ଦାବି ଅନୁଯାୟୀ ଗତ 24 ଘଣ୍ଟା ମଧ୍ୟରେ ଇସ୍ରାଏଲର ଏୟାର ଷ୍ଟ୍ରାଇକରେ ଗାଜାରେ 140ରୁ ଉର୍ଦ୍ଧ୍ବ ଜଣଙ୍କ ମୃତ୍ୟୁ ହୋଇଥିବା ବେଳେ ଶତାଧିକ ଆହତ ହୋଇଛନ୍ତି । ସେପଟେ ଇସ୍ରାଏଲ ସେନା ସୂଚନା ଅନୁଯାୟୀ, ଗତ 24 ଘଣ୍ଟା ମଧ୍ୟରେ ଗାଜା ପଟ୍ଟିରେ ପାଖାପାଖି 320ଟି ଆକ୍ରମଣ ହୋଇଛି ।
2 ସପ୍ତାହରୁ ଊର୍ଦ୍ଧ୍ବ ଦିନ ହେଲା ଇସ୍ରାଇଲ-ହମାସ ଓ୍ବାର । ଅକ୍ଟୋବର 7ରେ ହମାସ ପକ୍ଷରୁ ଇସ୍ରାଏଲ ଉପରେ ପ୍ରଥମେ ରକେଟ୍ ମାଡ଼ ପରେ ଇସ୍ରାଏଲ ପ୍ରତିଶୋଧ ପରାୟଣ ହୋଇ ଭୟଙ୍କର ଆକ୍ରମଣ କରି ଚାଲିଛି । ଇସ୍ରାଏଲ ଏୟାରଷ୍ଟ୍ରାଇକ୍ରେ ଗାଜା ଓ ପାଲେଷ୍ଟାଇନରେ ଏବେସୁଦ୍ଧା 5,080ରୁ ଉର୍ଦ୍ଧ୍ୱ ଜଣଙ୍କ ଜୀବନ ଯାଇଥିବା ବେଳେ 15 ହଜାରରୁ ଉର୍ଦ୍ଧ୍ବ ଆହତ ହୋଇଥିବା ସୂଚନା ରହିଛି । ଗତ 24 ଘଣ୍ଟା ମଧ୍ୟରେ ଇସ୍ରାଏଲ ଗାଜା ପଟ୍ଟିରେ ହମାସର ପାଖାପାଖି 400 ଆଡ୍ଡାକୁ ଟାର୍ଗେଟ କରି ବୋମା ବର୍ଷଣ କରିଥିବା ଦାବି କରିଛି । ଏକାଧିକ ହମାସ କମାଣ୍ଡର ନିପାତ ହେଇଥିବା ନେଇ ସୂଚନା ମିଳିଛି ।
ଅନ୍ୟପଟେ ହମାସ ପଣବନ୍ଦୀ କରି ରଖିଥିବା ଇସ୍ରାଏଲ ନାଗରିକମାନଙ୍କୁ ମୁକୁଳାଇବାକୁ ଚେଷ୍ଟା ଜୋରଦାର କରିଛନ୍ତି ଇସ୍ରାଇଲ ସେନା । ଏହାମଧ୍ୟରେ ଆଉ 2ଜଣ ପଣବନ୍ଦୀଙ୍କୁ ହମାସ ମୁକ୍ତ କରିଛି । 85 ବର୍ଷୀୟା ୟୋଚେବ୍ଡ ଓ 79 ବର୍ଷୀୟା ନୁରିତ କପରଙ୍କୁ ଛଡାଯାଇଛି । ରଫା ବର୍ଡରରେ ଆମ୍ବୁଲାନ୍ସ ଯୋଗେ ସେମାନେ ଇଜିପ୍ଟରେ ପହଞ୍ଚିଛନ୍ତି । ପୂର୍ବରୁ ମଧ୍ୟ 2 ବନ୍ଧକକୁ ମୁକୁଳାଇଥିଲା ହମାସ ।