ବେଜିଂ: ଆମେରିକା ବାଚସ୍ପତି ନାନ୍ସି ପେଲୋସିଙ୍କ ତାଇୱାନ ଗସ୍ତ ପରେ ତାତିଛି ଚୀନ । ଦୁଇ ରାଷ୍ଟ୍ରମଧ୍ୟରେ ଉତ୍ତେଜନା ବୃଦ୍ଧି ପାଇଛି । ତାଇୱାନକୁ ଭୟଭୀତ କରିବାକୁ ଯାଇ ଆଜି ବଡ ଧରଣର ସମରାଭ୍ୟାସ ଆରମ୍ଭ କରିଛି ଡ୍ରାଗନ । ଏଥିପାଇଁ ସେ ତାଇୱାନ ଚାରିପାଖେ ଥିବା ୬ଟି ଗୁରୁତ୍ବପୂର୍ଣ୍ଣ ଅଞ୍ଚଳ ଚୟନ କରିଛି । ଚୀନ ଯୁଦ୍ଧପୋତଗୁଡିକ ଏବେ ଏହି ଦ୍ବୀପଦେଶକୁ ଘେରାବନ୍ଦୀରେ ରଖିଛି । ଚୀନ ତାଇୱାନ ଜଳରାଶିରେ ଯୁଦ୍ଧପୋତ ଓ ଜାହଜ ମୁତୟନ କରିବା ସଙ୍ଗେ ସଙ୍ଗେ ଆଜି ଦିନ ୧୨ଟାରୁ ବୃହତ୍ ସମରାଭ୍ୟାସ ମଧ୍ୟ ଆରମ୍ଭ କରିଦେଇଛି । ଏହି ସାମରିକ ଡ୍ରିଲରେ ଲାଇଭ୍ ଫାୟାରିଂ ଅନ୍ତର୍ଭୁକ୍ତ ରହିଛି । ଏକ ଗଣମାଧ୍ୟମ ରିପୋର୍ଟରୁ ଏହା ଜଣାପଡିଛି । ସେପଟେ ତାଇୱାନ ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ ଚୀନର ଏହି ଡ୍ରିଲ୍ ଉପରେ ତୀକ୍ଷ୍ମ ନଜର ରଖାଯାଇଛି ।
ଏହାମଧ୍ୟ ପଢନ୍ତୁ:ପୁଣି ତାଇଓ୍ୱାନ ବାୟୁସୀମାରେ ପଶିଲା 27 ଚୀନ ଲଢୁଆ ବିମାନ
ଚୀନର ଏଭଳି ବଡ ଧରଣର ସମରାଭ୍ୟାସ ଉପରେ ବିଶ୍ବବ୍ୟାପୀ ଉଦବେଗ ପ୍ରକାଶ ପାଇଛି । ଚୀନର ଆକ୍ରମଣାତ୍ମକ ଆଭିମୁଖ୍ୟକୁ ନେଇ ତାଇୱାନ କର୍ତ୍ତୃପକ୍ଷ ଜାପାନ ସମେତ ବିଭିନ୍ନ ମିତ୍ର ରାଷ୍ଟ୍ରମାନଙ୍କ ସହ ଆଲୋଚନା କରିଛନ୍ତି । ସେହିପରି ତାଇୱାନକୁ ନେଇ ଚୀନ ଓ ଆମେରିକା ମଧ୍ୟରେ ବି ଉତ୍ତେଜନା ବୃଦ୍ଧି ପାଇଛି । ଏହି ଦ୍ବୀପଦେଶର ସ୍ବାଧୀନତାର ସୁରକ୍ଷା ପାଇଁ ଆମେରିକା ପ୍ରତିଶ୍ରୁତିବଦ୍ଧ ବୋଲି ଘୋଷଣା କରିବା ପରେ ପରେ ଡ୍ରାଗନର ନିଜର ଶକ୍ତି ପ୍ରଦର୍ଶନ କରିଛି । ନାନ୍ସି ପେଲୋସି ସ୍ବଦେଶ ଫେରିବା ମାତ୍ରେ ପ୍ରଥମେ ତାଇଓ୍ବାନ ବାୟୁସୀମାରେ ଚୀନ ବାୟୁସେନାର 27ରୁ ଅଧିକ ଲଢୁଆ ବିମାନ ପ୍ରବେଶ କରିଥିଲା । ଏହାସହିତ ତାଇୱାନର ଫଳ ସହ କିଛି ସାମଗ୍ରୀ ଉପରେ କଟକଣା ଲଗାଇଥିଲା ଚୀନ ।
କହିରଖୁଛୁ କି, କିଛିଦିନ ତଳେ ଆମେରିକା ରାଷ୍ଟ୍ରପତି ଜୋ ବାଇଡେନ ଓ ଜିନପିଙ୍ଗଙ୍କ ମଧ୍ୟରେ ଦୀର୍ଘ ସମୟ ଧରି ଫୋନରେ କଥାବାର୍ତ୍ତା ହୋଇଥିଲା । ସେହି ସମୟରେ ତାଇୱାନ ପ୍ରସଙ୍ଗ ଉଠିଥିଲା । ପେଲୋସି କିମ୍ବା ଅନ୍ୟ କେହି ଆମେରିକା ନେତାଙ୍କ ତାଇୱାନ ଗସ୍ତକୁ ବରଦାସ୍ତ କରାଯିବ ନାହିଁ ବୋଲି ଜିନପିଙ୍ଗ କହିଥିଲେ । ହେଲେ ଏହାରି ଭିତରେ ନାନ୍ସି ପେଲୋସିଙ୍କ ତାଇୱାନ ଗସ୍ତ ଚୀନ-ଆମେରିକା ମଧ୍ୟରେ ମୁହାଁମୁହିଁ ପରିସ୍ଥିତି ସୃଷ୍ଟି କରିଛି ।
