ଓଟୱା: କାନାଡା ସଂସଦରେ ନାଜି ସୈନିକଙ୍କୁ ସମ୍ମାନ ଦିଆଯିବାକୁ ନେଇ ହାଉସ୍ ସ୍ପିକରଙ୍କ ଇସ୍ତଫା । କାନାଡା ହାଉସ୍ ସ୍ପିକର ଆନ୍ଥୋନୀ ରୋଟା ନିଜ ପଦରୁ ଇସ୍ତଫା ଦେଇଛନ୍ତି । ଗତ ଶୁକ୍ରବାର ଦିନ ୟୁକ୍ରେନ ରାଷ୍ଟ୍ରପତି ଭୋଲଦମିର ଜେଲେନସ୍କି କାନାଡ଼ା ଗସ୍ତରେ ଯାଇଥିଲେ । ତାଙ୍କ ସହିତ ଦ୍ବିତୀୟ ବିଶ୍ବଯୁଦ୍ଧର ୯୮ ବର୍ଷୀୟ ନାଜି ସୈନିକ ୟାରୋସ୍ଲାଭ ହୁଙ୍କା ଥିଲେ । ଜେନେଲସ୍କି କାନାଡ଼ାର ହାଉସ୍ ଅଫ୍ କମନ୍ସକୁ ସମ୍ବୋଧିତ କରିବା ପରେ ସାଂସଦମାନେ ନିଜ ଆସନରୁ ଛିଡ଼ା ହୋଇ ହୁଙ୍କାଙ୍କୁ ସମ୍ମାନ ଜଣାଇଥିଲେ(ଷ୍ଟାଣ୍ଡିଂ ଓଭେସନ) ଏବଂ ପ୍ରଶଂସା କରିଥିଲେ ।
ଏହାମଧ୍ୟ ପଢନ୍ତୁ: India-Canada tensions: ଆମେ ଉଭୟ ଦେଶ ପାଇଁ ଚିନ୍ତିତ କହିଲା ଆମେରିକା
ବାଚସ୍ପତି ରୋଟା ସଂସଦରେ ହୁଙ୍କାଙ୍କୁ ଯୁଦ୍ଧର ହିରୋ ଭାବେ ପରିଚିତ କରାଇଥିଲେ, ଯିଏକି ପ୍ରଥମ ୟୁକ୍ରେନ ଡିଭିଜନ ପାଇଁ ଲଢ଼େଇ କରିଥିଲେ । ସଂସଦରେ ନାଜି ସୈନିକଙ୍କୁ ଏଭଳି ସମ୍ମାନ ଦିଆଯିବାକୁ ନେଇ ବିରୋଧୀ ଦଳ ଟ୍ରୁଡୋ ସରକାର ଏବଂ ବାଚସ୍ପତି ରୋଟାଙ୍କୁ ତୀବ୍ର ସମାଲୋଚନା କରିଥିଲେ । ସମାଲୋଚିତ ହେବା ଯୋଗୁଁ ରୋଟା ସ୍ପିକର ପଦରୁ ନିଜର ଇସ୍ତଫା ଘୋଷଣା କରିଛନ୍ତି । ଏହାକୁ ନେଇ ସେ କହିଛନ୍ତି, ଏହି ହାଉସ୍(ସଂସଦ) ଆମ ସମସ୍ତଙ୍କ ଠାରୁ ଊର୍ଦ୍ଧ୍ବରେ । ଏଥିପାଇଁ ମୁଁ ସ୍ପିକର ପଦରୁ ହଟିଯିବା ଉଚିତ୍ । ହୁଙ୍କା ଯାହା କରିଥିଲେ, ସେଥିପାଇଁ ଅନେକ ଲୋକ ଏବଂ ସମୁଦାୟଙ୍କୁ କଷ୍ଟ ପହଞ୍ଚିଥିଲା । ତନ୍ମଧ୍ୟରେ ୟୁହଦୀ ଲୋକ, ପୋଲ୍ସ ଓ ଅନ୍ୟ ସମୁଦାୟର ଲୋକ ସାମିଲ ଥିଲେ । ତେବେ ଇସ୍ତଫା ପୂର୍ବରୁ ଆନ୍ଥୋନୀ ରୋଟା ନାଜି ସୈନିକଙ୍କୁ ସମ୍ମାନିତ କରିବା ନେଇ କାନାଡ଼ାବାସୀଙ୍କୁ ଏବଂ ୟୁହତୀ ସମୁଦାୟଙ୍କୁ କ୍ଷମା ମାଗିଥିଲେ ।
ପ୍ରକାଶ ଥାଉକି, ଚଳିତ ସପ୍ତାହରେ ୟୁକ୍ରେନ୍ ରାଷ୍ଟ୍ରପତି ଜେଲେନସ୍କିଙ୍କ କାନାଡ଼ା ଯାତ୍ରା ସମୟରେ ପୂର୍ବ ନାଜି ସୈନିକ ୟାରୋସ୍ଲାଭ ହୁଙ୍କାଙ୍କୁ ହାଉସ୍ ଅଫ୍ କମନ୍ସଙ୍କୁ ଆମନ୍ତ୍ରିତ କରାଯାଇଥିଲା । କାନାଡ଼ା ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡୋ ହୁଙ୍କାଙ୍କୁ ସାକ୍ଷାତ କରିବା ସହିତ ସମ୍ମାନିତ କରିଥିଲେ । ସ୍ପିକର ରୋଟାଙ୍କ ସମେତ ସାଂସଦମାନେ ତାଙ୍କୁ ଷ୍ଟାଣ୍ଡିଂ ଓଭେସନ ଦେଇଥିଲେ । ଯାହାକୁ ବହୁ ମାନବାଧିକାର ସଂଗଠନ ଓ ୟେହୁଦୀ ସଂଗଠନ ଦୃଢ ନିନ୍ଦା କରି କହିଥିଲେ ଯେ, ହୁଙ୍କା ନାଜି ସୈନିକ ୟୁନିଟ୍ରେ କାମ କରିଥିଲେ, ଯାହାକି ଏସ୍ଏସ୍ ୧୪ତମ ୱେଫେନ ଗ୍ରେନଡିୟର ଡିଭିଜନ ରୂପେ ଜଣାଯାଏ ।
ଏହାପରେ ରୋଟା ହାଉସ୍ ଅଫ୍ କମନ୍ସରେ କହିଥିଲେ ଯେ, ମୋତେ ଏ ସମ୍ପର୍କରେ ଜଣାନଥିଲା । ଏହି ବ୍ୟକ୍ତିଙ୍କୁ(ହୁଙ୍କା) ଚିହ୍ନିବାରେ ମୋର ଭୁଲ୍ ପାଇଁ ମୁଁ ଦୁଃଖିତ । ଏଥିପାଇଁ ମୁଁ କ୍ଷମା ପ୍ରାର୍ଥନା କରୁଛି । ମୋର ଆଚରଣ ଓ ଟିପ୍ପଣୀ ପାଇଁ ମୁଁ ଅନେକ ଲୋକଙ୍କୁ ଆଘାତ ପହଞ୍ଚାଇ ଥିବାରୁ ଦୁଃଖିତ ଏବଂ ଏନେଇ କାନାଡା ଓ ସମଗ୍ର ୟେହୁଦୀ ସମ୍ପ୍ରଦାୟକୁ କ୍ଷମା ମାଗୁଛି ।
