ହାଇଦ୍ରାବାଦ: ଆଫଗାନିସ୍ତାନରେ ପୁଣି ବଡ ଧରଣର ବିସ୍ଫୋରଣ । ରାଜଧାନୀ କାବୁଲର ସାମରିକ ବିମାନ ବନ୍ଦର ନିକଟରେ ଏହି ବିସ୍ଫୋରଣ ଘଟିଛି (blast in kabul military airport) । ଏଥିରେ ଅତି କମରେ 10 ଜଣଙ୍କର ମୃତ୍ୟୁ ଘଟିଥିବା ବେଳେ 8 ଜଣ ଆହତ ହୋଇଥିବା ଆଶଙ୍କା କରାଯାଉଛି । ଆହତଙ୍କ ମଧ୍ୟରେ କିଛି ଗୁରୁତର ମଧ୍ୟ ରହିଛନ୍ତି । ବିସ୍ଫୋରଣ ସମ୍ପର୍କରେ ତାଲିବାନର ଆଭ୍ୟନ୍ତରୀଣ ମନ୍ତ୍ରଣାଳୟ ମୁଖପାତ୍ରଙ୍କ ସୂଚନା ସାମ୍ନାକୁ ଆସିଛି ।
ତାଲିବାନର ଆଭ୍ୟନ୍ତରୀଣ ମନ୍ତ୍ରଣାଳୟର ମୁଖପାତ୍ର ଅବଦୁଲ ନାଫି ଟକ୍କୁର କହିଛନ୍ତି, କାବୁଲର ସାମରିକ ବିମାନ ବନ୍ଦରର ମୁଖ୍ୟ ଫାଟକ ନିକଟରେ ଏହି ବିସ୍ଫୋରଣ ହୋଇଛି (blast at Kabul military airport)। ଏପର୍ଯ୍ୟନ୍ତ ଏହି ଆକ୍ରମଣ ପାଇଁ କେହି ବିଦ୍ରୋହୀ ବା ଜିହାଦୀ ଗୋଷ୍ଠୀ ନିଜକୁ ଦାୟୀ କରିନାହାଁନ୍ତି । ଆହତଙ୍କୁ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଛି । ଆଫଗାନିସ୍ତାନରେ ମୌଳବାଦୀ ଗୋଷ୍ଠୀ ତାଲିବାନ କ୍ଷମତାକୁ ଆସିବା ପରେ ଆଫଗାନିସ୍ତାନ ତତ୍କାଳୀନ ରାଷ୍ଟ୍ରପତି ଅସରଫ ଘନି ଦେଶ ଛାଡି ପଳାୟନ କରିଥିଲେ । ପରେ ପ୍ରାୟ ଦୁଇ ଦଶନ୍ଧି ଧରି ସକ୍ରିୟ ଥିବା ଆମେରିକା ସେନା ମଧ୍ୟ ଦେଶ ଛାଡି ଚାଲିଯାଇଥିଲେ ।
