କାନବେରା: ଅଷ୍ଟ୍ରେଲିଆବାସୀଙ୍କ ପାଇଁ ଏବେ ଧିରେ ଧିରେ ଖୋଲୁଛି ତାଲାବନ୍ଦ । ରାସ୍ତା ଘାଟକୁ ଓହ୍ଲାଉଛନ୍ତି ସାଧାରଣ ଲୋକେ । ଦୋକାନ ବଜାର ଖୋଲିବା ସହ କାର୍ଯ୍ୟାଳୟ ଖୋଲିବା ନେଇ ମଧ୍ୟ ମିଳିଛି ଅନୁମତି । ଦୀର୍ଘ ଦୁଇ ମାସ ପରେ ନିଜ ସ୍ବାଧୀନତା ଫେରିପାଇ ସତେ ଯେମତି ଆତ୍ମହରା ହୋଇ ପଡିଛନ୍ତି ଅଷ୍ଟ୍ରେଲିଆବାସୀ । ଫଳରେ ଲୋକେ ପର୍ଯ୍ୟାୟକ୍ରମେ କୋହଳ ହେଉଥିବା କଟକଣାକୁ ନେଇ ଅସ୍ଥିର ହୋଇ ପଡୁଥିବା ଦେଖିବାକୁ ମିଳୁଛନ୍ତି ।
ଏମିତିରେ ଲୋକଙ୍କୁ ମନୋବଳ ସ୍ଥିର ରଖି ସରକାରଙ୍କୁ ନିଷ୍ପତ୍ତି ସହ ଧୈର୍ଯ୍ୟ ରଖିବାକୁ ନିର୍ଦ୍ଦେଶ ଦିଆଯାଇଛି । ସମସ୍ତ କଟକଣାକୁ ତରବର ହୋଇ କୋହଳ କରିବା ବିପଦକୁ ଡାକିବା ପରି ହେବ । ତେଣୁ ସ୍ଥିତି ଦେଖି ଧିରେ ଧିରେ ଆବଶ୍ୟକସ୍ଥଳରେ କଟକଣା କୋହଳ କରାଯାଉଛି । ଏନେଇ ଦକ୍ଷିଷ ଅଷ୍ଟ୍ରେଲିଆ ମୁଖ୍ୟ ଷ୍ଟିଭେନ ମାର୍ସଲଙ୍କ କହିବା ଅନୁଯାୟୀ ସରକାର ସତର୍କ ହୋଇ ଲକଡାଉନ କୋହଳ କରୁଛନ୍ତି । ଏଥିରେ ବ୍ୟସ୍ତତା ପ୍ରକାଶ କରିବାର କୌଣସି କାରଣ ନାହିଁ ।
ଦକ୍ଷିଣ ଅଷ୍ଟ୍ରେଲିଆରେ ଲକଡାଉନ କଟକଣା ଦ୍ବିତୀୟ ପର୍ଯ୍ୟାୟରେ କୋହଳ ହୋଇଛି । ଏଥିସହ ସମ୍ପୃକ୍ତ ଅଞ୍ଚଳରେ 80 ଲୋକେ ଏକାଠି ହୋଇପାରିବାର ଅନୁମତି ମଧ୍ୟ ମିଳିଛି । ସେହିପରି ଭିକ୍ଟୋରିଆରେ ମାର୍ଚ୍ଚ ପରେ ଖୋଲିଛି ପବ୍, କ୍ଲବ, କ୍ୟାଫେ ଓ ରେସ୍ତୋରାଁ । ସୋମବାର ସୁଦ୍ଧା ଦେଶରେ 7204 ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି । ତେବେ ପ୍ରଧାନମନ୍ତ୍ରୀ ସ୍କଟ ମୋରିସନ ମେ’ ମାସରେ ତ୍ରିସ୍ତରୀୟ କଟକଣା କୋହଳ ପ୍ରକ୍ରିୟା ଲାଗୁ ନେଇ ଘୋଷଣା କରିଥିଲେ । ଏହା ଆଧାରରେ ଜୁଲାଇ ମାସ ସୁଦ୍ଧା ଦେଶକୁ କୋରୋନାମୁକ୍ତ କରିବା ପାଇଁ ସେ ଆହ୍ବାନ ଦେଇଛନ୍ତି ।
@IANS
