ଲଣ୍ଡନ: ପୋଷ୍ଟ ବ୍ରେକ୍ସିଟ ଆଲୋଚନାକୁ ନେଇ ଦୀର୍ଘ ଦିନ ଧରି ୟୁକେ ଓ ୟୁରୋପିଆନ ୟୁନିଅନ ମଧ୍ୟ ଜାରି ରହିଛି ଟଣା ଓଟରା । ଏମିତିରେ ଆଗାମୀ ସପ୍ତାହେ ମଧ୍ୟରେ ବ୍ରେକ୍ସିଟରୁ ୟୁକେ ଓହରିବା ନେଇ ପ୍ରଧାନମନ୍ତ୍ରୀ ବୋରିଶ ଜନସନ ରବିବାର ସୂଚନା ଦେଇଛନ୍ତି । ଯଦି ଆଗାମୀ ଅକ୍ଟୋବର 15 ସୁଦ୍ଧା କୌଣସି ଚୁକ୍ତି ଆଗକୁ ନ ଆସେ ତେବେ ୟୁକେ ଏହି ପଦକ୍ଷେପ ନେବ ବୋଲି ବୋରିଶ ସ୍ପଷ୍ଟ କରିଛନ୍ତି । ତେବେ ୟୁରୋପିଆନ ୟୁନିୟନ ବର୍ତ୍ତମାନର ସ୍ଥିତି ନେଇ ଯଦି ପୁନଃବିଚାର କରେ ତେବେ ୟୁକେ ନିଜର ନିଷ୍ପତ୍ତି ବଦଳାଇବ ବୋଲି ମଧ୍ୟ ବୋରିଶ ଇଙ୍ଗିତ କରିଛନ୍ତି ।
ଅନ୍ୟପଟେ ୟୁକେର ଏପରି ନିଷ୍ପତ୍ତି ଦେଖି ଏହା ୟୁକେର ବ୍ରେକ୍ସିଟରେ ବିଫଳତା ବୋଲି ଆକ୍ଷେପ କରିଛି ୟୁରୋପିଆନ ୟୁନିଅନ । ସୂଚନା ଅନୁଯାୟୀ ଚଳିତବର୍ଷ ଜାନୁଆରୀ ମାସ 31 ତାରିଖରେ 27ଟି ରାଷ୍ଟ୍ରୀୟ ସଂଘ ୟୁରୋପିଆନ ୟୁନିଅନରୁ ୟୁକେ ଓହରିଥିଲା । ଗତ 40 ବର୍ଷ ଧରି ୟୁକେ ଏହି ସଂଘର ଏକ ଅଂଶ ରହିଥିବା ବେଳେ ଶେଷ 3ରୁ 4 ବର୍ଷର ଚେଷ୍ଟା ପରେ ଶେଷରେ 2020ରେ ୟୁକେ ଏଥିରୁ ଓହରିଥିଲା । ୟୁକେର ଏହି ନିଷ୍ପତ୍ତି ରାଜନୈତିକ ଝଡ ସୃଷ୍ଟି କରିଥିବା ବେଳେ ସଂଘରୁ ଓହରିବା ପୂର୍ବରୁ ୟୁକେକୁ 11 ମାସ ଟ୍ରାଞ୍ଜିସନ ପିରିୟଡରେ ରହିବାକୁ ହେବ ବୋଲି ଚୂଡାନ୍ତ ହୋଇଥିଲା । ଯାହା ଡିସେମ୍ବର ମାସରେ ଶେଷ ହେବାକୁ ଯାଉଛି ।
ଏହି ନିଷ୍ପତ୍ତି ଆଧାରରେ ଆସନ୍ତା ବର୍ଷ ଆରମ୍ଭରୁ ୟୁକେକୁ ଅନେକ ଅର୍ଥନୈତିକ ଓ ବ୍ୟବସାୟିକ ପ୍ରତିବନ୍ଧକ ଦେଇ ଗତି କରିବାକୁ ହେବ ବୋଲି ସ୍ପଷ୍ଟ ହୋଇଛି । ହେଲେ ଏସମସ୍ତ ବାଧା ବିଘ୍ନ ସତ୍ତ୍ବେ ୟୁକେର ବିକାଶରେ ବାଧା ସୃଷ୍ଟି ହେବ ନାହିଁ ବୋଲି ବୋରିଶ ଦୃଢୋକ୍ତି ଦେଇଛନ୍ତି । ସେପଟେ ଏନେଇ ବ୍ରିଟିଶ ମୁଖ୍ୟ ବାର୍ତ୍ତାବହକ ଡେଭିଡ ଫ୍ରୋଷ୍ଟ ଓ ତାଙ୍କର ୟୁରୋପିଆନ ୟୁନିଅନ ପ୍ରତିଦ୍ବନ୍ଦୀ ମିସେଲ ବାର୍ଣ୍ଣିଅର ଆସନ୍ତା ମଙ୍ଗଳବାର ଏସମ୍ପର୍କରେ ଲଣ୍ଡନରେ ଆଲୋଚନା କରିବା ନେଇ ସ୍ପଷ୍ଟ ହୋଇଛି ।
ବାର୍ଣ୍ଣିଅରଙ୍କ କହିବା ଅନୁଯାୟୀ ଗତ ସପ୍ତାହ ସମ୍ପୃକ୍ତ ସ୍ଥିତିକୁ ନେଇ ସେ ଚିନ୍ତିତ ଥିଲେ । ଏନେଇ ୟୁକେ ସଠିକ୍ ଭାବେ ଯୁରୋପିଆନ ୟୁନିଅନ ସହ ସ୍ଥିତି ସୁଧାରିବା ଦିଗରେ କାର୍ଯ୍ୟ କରିନାହିଁ ବୋଲି ସେ ମତ ଦେଇଛନ୍ତି । ସେପଟେ ବୋରିଶଙ୍କ ଏପରି ନିଷ୍ପତ୍ତିକୁ ନେଇ ଆଇରିସ ବୈଦେଶିକ ମନ୍ତ୍ରୀ ସିମୋନ କୋଭେନି ମଧ୍ୟ ଅସନ୍ତୋଷ ପ୍ରକାଶ କରିଛନ୍ତି । ସେ କହିଛନ୍ତି କି ଏହା ଏକ ତରବରିଆ ନିଷ୍ପତ୍ତି । ଯାହାର ପରିଣାମ ଆଗକୁ ୟୁକେକୁ ଭୋକିବାକୁ ପଡିବ ବୋଲି ସେ ଆଶଙ୍କା ପ୍ରକାଶ କରିଛନ୍ତି ।
ତେବେ ଏହି ମାମଲାରେ ୟୁରୋପିଆନ ୟୁନିଅନ ନଭେମ୍ବର ପର୍ଯ୍ୟନ୍ତ ସମୟ ମାଗିଥିବା ବେଳେ ବୋରିଶ କିନ୍ତୁ ଅକ୍ଟୋବର 15କୁ ତାରିଖ ଯାଏଁ ଅବଧି ଘୋଷଣା କରିଛନ୍ତି । ସେ କହିଛନ୍ତି କି ଅକ୍ଟୋବର 15 ସୁଦ୍ଧା ଯଦି ୟୁରୋପିଆନ ୟୁନିଅନରେ ଏହାର କୌଣସି ସମାଧାନ କରାନଯାଏ ତେବେ ଆଗକୁ ଏହି ସମ୍ପର୍କର କୌଣସି ଭବିଷ୍ୟତ ରହିବ ନାହିଁ ।
ବ୍ୟୁରୋ ରିପୋର୍ଟ, ଇଟିଭି ଭାରତ
