ବ୍ରିଟେନ:ଶୀତଦିନରେ ଗରିବ ଶ୍ରେଣୀର ପିଲାଙ୍କୁ ମାଗଣା ମଧ୍ୟାହ୍ନ ଭୋଜନ ଦେବାକୁ ନିଷ୍ପତ୍ତି ନେଇଛନ୍ତି ବ୍ରିଟିଶ ସରକାର । ଫୁଟବଲର୍ ମାର୍କସ୍ ରଶଫୋର୍ଡଙ୍କ ଏକ ନିରନ୍ତର ଅଭିଯାନ ପରେ ଏହି ପଦକ୍ଷେପ ନିଆଯାଇଛି । ତେବେ ଲଣ୍ଡନରେ ଏହା ପ୍ରଥମ ନୁହେଁ, ପୂର୍ବରୁ ମଧ୍ୟ ଶାସକ ଦଳ ପକ୍ଷରୁ ଛୁଟିଦିନ ମାନଙ୍କରେ ଗରିବ ପିଲାଙ୍କୁ ମାଗଣା ସ୍କୁଲ ଭୋଜନ ଦିଆଯାଇଥିଲା ।
ବ୍ରିଟିଶ ସରକାର ପ୍ରାୟ 400 ମିଲିଅନ ପାଉଣ୍ଡ (ପ୍ରାୟ 526.3 ମିଲିୟନ ଆମେରିକୀୟ ଡଲାର) ଖର୍ଚ୍ଚ କରିବେ, ଯେଉଁଥିରେ 170 ମିଲିୟନ ପାଉଣ୍ଡ (ପ୍ରାୟ 223.7 ମିଲିୟନ ଆମେରିକୀୟ ଡଲାର) ସ୍ଥାନୀୟ ପରିଷଦ ମାଧ୍ୟମରେ ବଣ୍ଟନ କରାଯିବ । ଯାହା ଖାଦ୍ୟ ଏବଂ ବିଲ ଥିବା ପରିବାରକୁ ସାହାଯ୍ୟ କରିବ ବୋଲି ଏକ ରିପୋର୍ଟରୁ ଜଣାପଡିଛି ।
ଗତ କିଛି ମାସ ମଧ୍ୟରେ, ଇଂଲଣ୍ଡରେ ଛୁଟିଦିନରେ ମାଗଣା ସ୍କୁଲ ଭୋଜନ ଯୋଗାଇବାରେ କିଛି ବ୍ୟତିକ୍ରମ ଦେଖାଦେଇଥିଲା । ହେଲେ ପରେ ଫୁଟବଲର୍ ମାର୍କସ୍ ରଶଫୋର୍ଡ ଗରିବଙ୍କୁ ଖାଦ୍ୟ ଯୋଗାଇବାକୁ ନେଇ ଅଭିଯାନ ଆରମ୍ଭ କରିଥିଲେ । ଶେଷରେ ପୁଣି ଥରେ ଏହି ସେବା ଯୋଗାଇବାକୁ ନିଷ୍ପତ୍ତି ନେଇଛନ୍ତି ବ୍ରିଟିଶ ସରକାର । ନୂଆ କୋଭିଡ ଗାଇଡ ଲାଇନ ଅନୁଯାୟୀ ଇଂଲଣ୍ଡରେ ସ୍କୁଲ, କଲେଜ ଏବଂ ବିଶ୍ବବିଦ୍ୟାଳୟ ଖୋଲା ରହିଛି ।
