ପ୍ୟାରିସ: ପର୍ଯ୍ୟାୟକ୍ରମେ ଫ୍ରାନ୍ସରେ କୋହଳ ହେଉଛି ଲକଡାଉନ କଟକଣା । ଏନେଇ ସୋମବାର ଘୋଷଣା କରିଛନ୍ତି ରାଷ୍ଟ୍ରପତି ଇମାନୁଏଲ ମାକ୍ରନ । ଏହି ଘୋଷଣା ଅନୁଯାୟୀ ପର୍ଯ୍ୟାୟକ୍ରମେ କଟକଣା କୋହଳ ସହ ଦେଶରେ ସମସ୍ତ କାଫେ ଓ ରେସ୍ତୋରାଁ ଖୋଲାଯିବା ପାଇଁ ଅନୁମତି ମିଳିଛି । ଏଥିସହ ଅନ୍ୟ ୟୁରୋପୀଆନ ରାଷ୍ଟ୍ରକୁ ଯାତାୟତ ପାଇଁ ମଧ୍ୟ ଗ୍ରୀନ ସିଗନାଲ ଦେଇଛନ୍ତି ରାଷ୍ଟ୍ରପତି ।
ମାର୍ଚ୍ଚ 17ରେ ଦେଶରେ ପ୍ରଥମେ ଲକଡାଉନ ଲାଗୁ ହୋଇଥିବା ବେଳେ ଏହାକୁ ମେ’ 11 ପର୍ଯ୍ୟନ୍ତ ବଳବତ୍ତର ରଖାଯାଇଥିଲା । ଏହାପରେ ଧିରେ ଧିରେ କଟକଣା କୋହଳ ପ୍ରକ୍ରିୟା ଆରମ୍ଭ ହୋଇଥିଲା । ଶେଷ ସୂଚନା ମୁତାବକ କେବଳ ମାୟୋଟେ ଓ ଫ୍ରେଞ୍ଚ ଗୁଇଆନା ବ୍ୟତୀତ ଦେଶର ସମସ୍ତ ଅଞ୍ଚଳକୁ ସ୍ବାଭାବିକ ହେବା ପାଇଁ ଗ୍ରୀନ ସିଗନାଲ ଦିଆଯାଇଛି । କଟକଣା କୋହଳ ପ୍ରକ୍ରିୟାରେ ବାଦ ଦିଆଯାଇଥିବା ଦୁଇ କେନ୍ଦ୍ରଶାସିତ ଅଞ୍ଚଳରେ ଏବେ ବି ସଂକ୍ରମଣ ସଂଖ୍ୟା ବଢିଚାଲିଥିବାରୁ ଏପରି ନିଷ୍ପତ୍ତି ନିଆଯାଇଛି । ତେବେ ପ୍ୟାରିସର ଇଲେ-ଡେ-ଫ୍ରାନ୍ସକୁ ମଧ୍ୟ ଖୋଲିବା ପାଇଁ ଅନୁମତି ଦିଆଯାଇଥିବା ଜଣାପଡିଛି ।
ରାଷ୍ଟ୍ରପତି ମାକ୍ରନ ଏହି ଗୁରୁତ୍ବପୂର୍ଣ୍ଣ ଘୋଷଣା କରିବା ସମୟରେ ଖୁସି ପ୍ରକାଶ କରି ଦେଶର ଅର୍ଥନୀତିକୁ ପୁଣି ଟ୍ରାକକୁ ଫେରାଇ ଆଣିବା ପାଇଁ ଜନତାଙ୍କ ସହଯୋଗ ଦରକାର ଥିବା ପ୍ରକାଶ କରିଛନ୍ତି । ସେ କହିଛନ୍ତି କି ଦେଶରେ ବାର ଓ ରେସ୍ତୋରାଁ ଖୋଲିବାର ଅର୍ଥ ହେଉଛି ଅନେକ ଲୋକ ନିଜ ରୋଜଗାର ଫେରି ପାଇବା ଓ ଦେଶର ଅର୍ଥନୀତି ପୁଣି ସଶକ୍ତ ହେବା । ତେବେ ଦେଶରେ ସର୍ବାଧିକ ମାମଲା ଚିହ୍ନଟ ହୋଇଥିବା ପ୍ୟାରିସରେ ମଧ୍ୟ ସ୍ଥିତି ପୁଣି ସ୍ବାଭାବିକ ହେବ ବୋଲି ମାକ୍ରନ ପ୍ରତିଶୃତି ଦେଇଛନ୍ତି ।
କିନ୍ତୁ ଏସବୁ ଭିତରେ ଲୋକେ ସାମାଜିକ ଦୂରତା ଓ ମାସ୍କର ବ୍ୟବହାର ଆଦି ଜରୁରୀ ପଦକ୍ଷେପ ଯେପରି ନଭୁଲନ୍ତି ସେଥିପାଇଁ ମାକ୍ରନ ଦେଶବାସୀଙ୍କୁ ଅନୁରୋଧ କରିଛନ୍ତି । ଦେଶର ଉନ୍ନତି ପାଇଁ ସତର୍କତାମୂଳକ ପଦକ୍ଷେପ ସହ ସମସ୍ତଙ୍କର ସହଯୋଗ ଏକାନ୍ତ ଆବଶ୍ୟକ । ତେଣୁ ଲୋକେ ଖୁସିରେ ଆତ୍ମହରା ହେବା ଅପେକ୍ଷା ଦେଶର ସୁରକ୍ଷା ପ୍ରତି ନିଜର ଦାୟିତ୍ବବୋଧତା ଅନୁଭବ କରିବା ଦରକାର ବୋଲି ମାକ୍ରନ ଦେଶବାସୀଙ୍କୁ ସମ୍ବୋଧନ କରି କହିଛନ୍ତି ।
@IANS
