ଲଣ୍ଡନ: ଆମେରିକାରେ ଆରମ୍ଭ ହୋଇ ଇଂଲଣ୍ଡରେ ପହଞ୍ଚିଥିବା ଜାତିଆଣ ବିରୋଧୀ ବିକ୍ଷୋଭ । ହେଲେ ଇଂଲଣ୍ଡରେ କେତେକ ଅସାମାଜିକ ବ୍ୟକ୍ତିଙ୍କ ସମ୍ପୃକ୍ତି ଯୋଗୁଁ ବିକ୍ଷୋଭର ପରିଭାଷା ବଦଳିବା ସହ ଅନେକ ହିଂସାକାଣ୍ଡ ଘଟିଥିଲା । ତେବେ ଏହି ହିଂସାକାଣ୍ଡର ସିସିଟିଭି ଫୁଟେଜ ସୋମବାର ଜାରି କରିଛି ଦେଶର ମେଟ୍ରୋପୋଲିଟାନ ପୋଲିସ । ଏହି ଫୁଟେଜରେ 12 ଜଣଙ୍କୁ ଚିହ୍ନଟ କରି ସେମାନଙ୍କୁ ଠିକଣା ଦେବା ପାଇଁ ଲୋକଙ୍କ ସାହାଯ୍ୟ ଲୋଡିଛି ପୋଲିସ ।
ଦେଶରେ ଏହି ଆନ୍ଦୋଳନ ଆଳରେ ହୋଇଥିବା ହିଂସାକାଣ୍ଡରେ ଏଯାବତ୍ 100ରୁ ଉର୍ଦ୍ଧ୍ବ ପୋଲିସକର୍ମୀ ଆହତ ହୋଇଥିବା ଦେଖାଯାଇଛି । କେବଳ ସେତିକି ନୁହେଁ ପୋଲିସ ଘୋଡା ଓ କୁକୁର ମଧ୍ୟ ଏଥିରେ ଆହତ ହୋଇଥିବା ଜଣା ପଡିଛି । ସେପଟେ ପ୍ରାୟ 300 ଲୋକେ ଏହି ଘଟଣାରେ ଗିରଫ ହୋଇଥିବା ଜଣା ପଡିଛି । ଦେଶରେ ହିଂସା ନାମରେ ଅନେକ ସାର୍ବଜନୀନ ସମ୍ପତ୍ତି ନଷ୍ଟ ସହ ଅନେକ ଜନନାୟକଙ୍କ ପ୍ରତିମୂର୍ତ୍ତି ମଧ୍ୟ ଭଙ୍ଗା ଯାଇଥିଲା । ତେବେ ଏଥିରେ ଅଭିଯୁକ୍ତଙ୍କୁ ତୁରନ୍ତ ଗିରଫ କରିବା ପାଇଁ ପୋଲିସ ସମସ୍ତ ଚେଷ୍ଟା ଆରମ୍ଭ କରିଥିଲା ।
ପୂର୍ବରୁ ସ୍କଟଲାଣ୍ଡ ୟାର୍ଡ 35 ଜଣ ସମ୍ପୃକ୍ତଙ୍କ ଫଟୋ ଜାରି କରିବା ସହ ଏଯାବତ୍ ମୋଟ 48ଜଣଙ୍କ ଫଟୋ ପୋଲିସକୁ ହସ୍ତାନ୍ତର ହୋଇଛି । ତେବେ ସୋମବାର ପୋଲିସ ହାତରେ ସମ୍ପୃକ୍ତ ସ୍ଥାନର ସିସିଟିଭି ଫୁଟେଜ ଲାଗିଥିବା ବେଳେ ଏଥିରୁ 12 ଜଣ ସମ୍ପୃକ୍ତଙ୍କୁ ଚିହନ୍ଟ କରି ଏମାନଙ୍କୁ ଖୋଜିବାରେ ସାଧାରଣ ଲୋକଙ୍କ ସହାୟତା ଲୋଡିଛି ପୋଲିସ । ଦେଶରେ ସାଧାରଣ ନାଗରିକ ମଧ୍ୟ ପୋଲିସକୁ ସହଯୋଗ କରୁଥିବା ରବିବାର କମାଣ୍ଡର ଆଲେକ୍ସ ମୁରେ କହିଥିଲେ ।
ପୋଲିସ ସୂଚନା ଦେଇ ଏହା ମଧ୍ୟ କହିଛି କି ଏହି ବିକ୍ଷୋଭରେ ହଜାର ହଜାର ଲୋକେ ସାମିଲ ହୋଇଥିଲେ ସତ, ହେଲେ ସମସ୍ତଙ୍କ ଉଦ୍ଦେଶ୍ୟ ସମାନ ନଥିଲା । କିଛି ବିକ୍ଷୋଭ ଦ୍ବାରା ସରକାରଙ୍କୁ ନିଜ ମତ ଦେବାକୁ ଚାହୁଁଥିବା ବେଳେ କିଛିଙ୍କ ଉଦ୍ଦେଶ୍ୟ ରହିଥିଲା ହିଂସାକାଣ୍ଡ ଘଟାଇବା ଓ ଅନ୍ୟ ସାଧାରଣ ନାଗରିକଙ୍କୁ ଏଥିରେ ସାମିଲ ହେବା ପାଉଁ ପ୍ରରୋଚିତ କରିବା । ପୋଲିସ କର୍ମଚାରୀଙ୍କ ବିରୋଧରେ ଏହି ହିଂସା ତୀବ୍ରତର ହୋଇଥିବା ଦେଖାଯାଇଥିବା ବେଳେ ସେମାନଙ୍କ ଅପଦସ୍ତ କରିବା ପାଇଁ ଅନେକ ଖରାପ ଶବ୍ଦ ଓ ଖରାପ ବ୍ୟବହାର ହୋଇଥିଲା ।
ଏସମ୍ପର୍କରେ କମାଣ୍ଡର ମୁରେ କହିଛନ୍ତି କି ତଦନ୍ତ ଜାରି ରହିଛି ଏବଂ ଖୁବଶୀଘ୍ର ସମସ୍ତ ଦୋଷୀ ପୋଲିସ ହେପାଜତରେ ରହିବା ନେଇ ଆଶା ରହିଛି । ଏଥିପାଇଁ ସାଧାରଣ ନାଗରିକଙ୍କୁ ସହାୟତା ନିତାନ୍ତ ଆବଶ୍ୟକ ।
@IANS
