ଲଣ୍ଡନ: ଲକଡାଉନ ନିୟମ କୋହଳ ସହ ୟୁକେକୁ ଆସୁଥିବା ଅନ୍ୟ ପ୍ରାନ୍ତର ଆଗନ୍ତୁକଙ୍କ ପାଇଁ ସରକାର ଲାଗୁ କରିଥିଲେ 14 ଦିନିଆ ବାଧ୍ୟତାମୂଳକ କ୍ବାରେଣ୍ଟାଇନ ନିୟମ । ଏହା ଜୁନ 8ରୁ ଦେଶରେ ଲାଗୁ ହେବାର ଯୋଜନା ରହିଛି । ପ୍ରାଥମିକ ସ୍ତରରେ ଏଥିରୁ କେବଳ ବ୍ୟବସାୟ ଉଦ୍ଦେଶ୍ୟରେ ଆସୁଥିବା ବ୍ୟକ୍ତିଙ୍କୁ ବାଦ ଦେବା ପାଇଁ ନିଷ୍ପତ୍ତି ହୋଇଥିବା ବେଳେ ଏବେ ଏହି ନିୟମ କୋହଳ ହେବାକୁ ଯାଉଛି । ମଙ୍ଗଳବାର ୟୁକେ ସରକାର ଦେଇଥିବା ଦୈନିକ ବିବରଣୀରେ ସ୍ପଷ୍ଟ ହୋଇଛି ଧିରେ ଧିରେ ଏହି 14 ଦିନିଆ କ୍ବାରେଣ୍ଟାଇନ ନିୟମ ମଧ୍ୟ କୋହଳ ହେବ ।
ବର୍ତ୍ତମାନ ପାଇଁ କେତେକ ନିର୍ଦ୍ଦିଷ୍ଟ ବିଭାଗ ପାଇଁ ଏହି ନିୟମ ଲାଗୁ ନକରିବା ପାଇଁ କୁହାଯାଇଛି । ଏଥିରେ ଲରି ଡ୍ରାଇଭର, ପୋଲିସ ଅଧିକାରୀ, ସାମୟିକ ବା ଋତୁ ଚାଷୀ ଓ ସ୍ବାସ୍ଥ୍ୟକର୍ମୀଙ୍କୁ ବାଦ ଦେବା ପାଇଁ ନିଷ୍ପତ୍ତି ହୋଇଛି । ଏଥିସହ ଆଇରିସ ରିପବ୍ଲିକରୁ ଆସୁଥିବା ବ୍ୟକ୍ତିଙ୍କୁ ମଧ୍ୟ ଏଥିରୁ ବାଦ ଦେବା ପାଇଁ କୁହାଯାଇଛି । କିନ୍ତୁ ଏହି ନିଷ୍ପତ୍ତିରେ ସାମାନ୍ୟ ଚିନ୍ତା ପ୍ରକାଶ କରିଛନ୍ତି କେତେକ ସାଂସଦ ଓ ବ୍ୟାବସାୟିକ ପ୍ରତିଷ୍ଠାନ । ଏହାଦ୍ବାରା ଦେଶରେ ଟ୍ରାଭେଲ ବା ପରିବହନ ଉଦ୍ୟୋଗ ପ୍ରଭାବିତ ହେବ ବୋଲି ଆକଳନ କରାଯାଇଛି ।
ଆଗକୁ ଏହି ନିୟମରେ ଅଧିକ ଲୋକଙ୍କୁ ବାଦ ଦେବା ନେଇ ନିଷ୍ପତ୍ତି ନିଆଯାଇପାରେ । ତେବେ ଏହି ନିୟମ ଆଧାରରେ ଦେଶକୁ ବିମାନ ଯୋଗେ ଆସୁଥିବା ବ୍ୟକ୍ତିଙ୍କୁ 14 ଦିନିଆ ବାଧ୍ୟତାମୂଳକ କ୍ବାରେଣ୍ଟାଇନରେ ରହିବାକୁ ହେବ । ଯଦି କେହି ଏହି ନିୟମରେ ବ୍ୟତିକ୍ରମ କରନ୍ତି ତେବେ ସେମାନଙ୍କୁ 1000ପାଉଣ୍ଡକ ତଣ୍ଡ ଗଣିବାକୁ ହେବ ବୋଲି ସୂଚନା ରହିଛି । ସେପଟେ ଏନେଇ ଆବାସ ମନ୍ତ୍ରୀ ସିମୋନ କ୍ଲର୍କଙ୍କ କହିବା ଅନୁଯାୟୀ ଏହି ଏକ ଅସ୍ଥାୟୀ ସାମୟିକ ପଦକ୍ଷେପ । ଯାହା ଦେଶରେ ନୂଆ ସଂକ୍ରମଣର ପ୍ରବେଶକୁ ରୋକିବ । କିନ୍ତୁ ଏହା ଏକ ମହତ୍ତ୍ବପୂର୍ଣ୍ଣ ପଦକ୍ଷେପ । ଏନେଇ ଏକ ବସ୍ତୁତ ବିବରଣୀ ଚଳିତ ସପ୍ତାହ ସଂସଦରେ ଉପସ୍ଥାପନ ହେବ ।
@IANS
