ତେଗୁସିଗଲପା: ଆମେରିକୀୟ ଦେଶ ହଣ୍ଡୁରାସରେ ଏକ ମାଛଧରା ଡଙ୍ଗା ଓଲଟିବା ଫଳରେ 26 ଜଣଙ୍କର ମୃତ୍ୟୁ ହୋଇଛି । ଏକ ଅନ୍ତର୍ଜାତୀୟ ଗଣମାଧ୍ୟମର ରିପୋର୍ଟ ଅନୁସାରେ ଏହି ଡଙ୍ଗା ପୂର୍ବ ମୋସ୍କିଟିୟା କ୍ଷେତ୍ରରେ କୈରିବିୟନ ତଟ ନିକଟରେ ବୁଡିଯାଇଥିଲା । ଯେଉଁଥିରେ 73 ଜଣ ମତ୍ସଜୀବୀ ଥିବାବେଳେ ଏଥିରୁ 26 ଜଣଙ୍କର ମୃତ୍ୟୁ ଘଟିଛି । ଅନ୍ୟ 47 ଜଣଙ୍କୁ ଉଦ୍ଧାର କରାଯାଇ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଛି ।
ତେବେ ସ୍ଥାନୀୟ ଗଣମାଧ୍ୟମର ରିପୋର୍ଟ ମୁତାବିକ, ମାଛ ଧରିବା ପାଇଁ ସମୁଦ୍ର ଭିତରକୁ ମତ୍ସଜୀବୀ ମାନେ ଯାଇଥିବାବେଳେ ନୌକାଟି ଭାରସ୍ୟାମ ହରାଇ ନିୟନ୍ତ୍ରଣ ବାହାରକୁ ଚାଲିଯାଇଥିଲା । କ୍ୟାପ୍ଟେନ ଏସଓଏସ ସଙ୍କେତ ଦେଇଥିଲେ ମଧ୍ୟ ଏହାର କିଛି ସମୟ ପରେ ତାଙ୍କର ମୃତ୍ୟୁ ହୋଇଯାଇଥିଲା । ଯେଉଁଥିପାଇଁ ଡଙ୍ଗାଟି ଆଉ ନିୟନ୍ତ୍ରଣକୁ ଆସିପାରିନଥିଲା ।
ତେବେ ଦୁର୍ଘଟଣାର କାରଣ ଜଣାପଡିନଥିବାବେଳେ ସମୁଦ୍ରରେ ଝଡ ତୋଫାନ ଯୋଗୁଁ ଏପରି ଘଟିଥିବା ସନ୍ଦେହ କରାଯାଉଛି । ଏନେଇ ଘଟଣାର ଯାଞ୍ଚ ପ୍ରକ୍ରିୟା ଆରମ୍ଭ କରାଯାଇଛି ।
